Edhikiel 37 - Wëël Jwøk

Luubö Mana Nyooth Ki Ri Cuu Moa No Otal

¹ 'Ba Wuuö Jwøk cere acïp bääta, ni lwør aani ki teek Jwïëy moe ni cïp aani dï pwöla mo päŋ ki cuu mo jiy.

² Ni tïïc aani naa cäädha ki dï cuu moøge. 'Ba ka adïëri møn, dï pwöla bäre aputa joot no 'ogääbö ki cuu mo jiy, ni beege cuu mo otal døc.

³ Kanyøgø ena köö jïra, «?Wär dhaanhø, cuu moøgø løny ki man cäŋge kwøwø?» Ni dwøga gø jïre, ni «Wui, Kwäärö Wuuö Jwøk, bee ï ni ŋäc gø.»

⁴ Ni cäŋ köö jïra, ni «Cään cuu moøgø, ni kööï jïge, ‹Wui, u na cuu mo otal ii, wïnynyu dwør Wuuö Jwøk.›

⁵ Kwäärö Wuuö Jwøk luumma caane kiperu bee en, ena köö, ni ‹Jam jwïëy kïtha dëëtu nou cäŋu kwøw.

⁶ Dëëtu cäŋa ka mooyø ki läär ki rïŋö, ni rïëba rïŋ dëëtu ki buyö, ni jwïëa bäätu nou cäŋu kwøw; køøre ŋäyu ŋääö ni bee aani na Wuuö Jwøk.› »

⁷ Kanyøgø gena cäänna kaawat mana kööm aani. 'Ba kanya cäänna ge ennø, ka adïëri møn, dööt cuu aput wïnyö ni ge pööta rege kanya cøømge dëëtge; ni ö geni ni putge dëëtge kupö, ni man nø cøøa kare.

⁸ 'Ba na neena ge, ka adïëri møn, läär ki rïŋö aput ci dëëtge, ni rïëp geni ki buyö; 'ba ge ba jwïëy.

⁹ Køøre Wuuö Jwøk acäŋ köö jïra, «Wär dhaanhø, cään jam jwïëy, ni kööï jïre ni man beeye luumma caan Wuuö Jwøki, ena köö, ni ‹Wui, jam jwïëy, kwönnï ki yïth tuk piny moa na aŋween, ni ciï røk dëëlli moi no othøw ii, nee cäŋge kwøw.› »

¹⁰ Kanyøgø jam jwïëy acäänna kaawat mana kööm aani, ni ö jam jwïëy ni ci dëëtge, ni putge kwøw, ni cuŋge ki tietge; 'ba gena lwaak mo päl døc kiree.

¹¹ Køøre Wuuö Jwøk acäŋ köö jïra, «Wär dhaanhø, cuu moøgø a päära ge ki jø dhi øt Icriel bëët. Raŋï, gena köö, ni ‹Wa caala cuu mo otal, ni ŋäädhe marwa oränynyö, ni dïïr wïthwa bëët.›

¹² Kiper manøgønø, caanï jï dhi øt Icriel ni kööï, ni man beeye luumma caan Kwäärö Wuuö Jwøki kiperu, ena köö, ni ‹Ka adïëri møn, u na jiya, bwör mou jaba jabø, ni tïïa uuni nou ööu wøk ki yïth bwör mou, ni kïtha uuni yi ŋööm Icriel.

¹³ Køøre nø, u na jiya, ŋäyu ŋääö ni bee aani na Wuuö Jwøk, kanyo jaba bwör mou noo käla uuni wøk ki yïth bwör mou.

¹⁴ Aani jwïëya okïtha dëëtu ni kwøwu, ni kïtha uuni yi ŋöömö maru. Kar kaace nø, ŋäyu ŋääö ni bee aani na Wuuö Jwøk na caan luummögø na tïïc gø.› Luummögø caana Wuuö Jwøki.»

Luum Dwätö Mano Dwal Jø Icriel Na Aciel

¹⁵ Kanyøgø dwør Wuuö Jwøk aö bääta ni kööe,

¹⁶ «Wär dhaanhø, lwötï ka athøra aciel ni göörï luubö man bääte, ni kööï, ni ‹Man beeye kiper Juuda ki jø Icriel moa näk odwätö ki eni.› Køøre wärï cäŋ lwötö ka athøra mør ni cäŋï luubö man göör bääte, ni kööï, na ‹Athøra mar Ipariem beeye mar Jocep ki jø Icriel bëët moa näk odwätö ki eni.›

¹⁷ Køøre athøre moøgøøni wär dwalï na aciel nee tïmge na athøra aciel cerï.

¹⁸ «'Ba kanyo ö jø pou noo pëënyge ïïni, ni köge, ni ‹?Gïn ni tïïyï en løny ki man caanï tiere jïwa?›

¹⁹ wärï kööï jïge ni man beeye luumma caan Kwäärö Wuuö Jwøki, ena köö, ni ‹Aani, athøra mar Jocep käla kälö, ni beeye athøra mana en cer Ipariem ki jø Icriel moa näk odwätö ki eni, ni dwala gø ka athøra mar Juuda, ni tïïa ge na aciel, ni putge tïmö na athøra aciel cera.›

²⁰ 'Ba athøre moøgø, ni beege moa göötï bäätge ki luup, wär tïŋ maal nyïm jiy,

²¹ ni kööï jïge ni man beeye luumma caan Kwäärö Wuuö Jwøki, ena köö, ni ‹Ka adïëri møn, aani, jø Icriel käla wøk ki dï wïth juurre kwöra näk geno aa yïthge. Ge cuuŋa cuuŋö ki yïth kwörögø bëët ni duua geni yi ŋöömö marge;

²² ni tïïa geni na wï jur aciel yi ŋöömge, ni beeye bäät kïte mo Icriel. Geno tïmö bëët ni ge käära nyeya acielli, ni ba bëëtge këët ni gena wïth juurre ariiø wala ki man bëëtge ni geno pääŋŋö na buc nyeye ariiø.

²³ Ge ba bëëdö ni dëëtge ege päädö këët ki juuga reyø moge ki kït gïï wø lamge, na näk ec raac ki ge, wala ki teeŋ raay moge møga bëët. Kiper aani, ge piema piemø yïth raay moge moa wara enge yïthge, ni penya geni; ni bëëtge na jiy 'moa, ni bëëda ni aana Jwøk marge.

²⁴ « ‹Dhaanhnha ma Deebit otïmö na nyeya marge, ni tïmge ni ge ena tier dïkwääy aciel bëët. Geni, køør ciik 'moa ocaathge, ni bëëtge ni luup 'moa gwøkge gwøø ni kïthge ge bäät tïïc.

²⁵ Geno bëëdö yi ŋöömö mana cïba jï dhaanhnha ma Jeekap, ni beeye ŋöömma bëët kwäyu yie. Geni ko obwöre moge ki nyïïkwaacge geno bëëdö yi ŋöömö manøgø na bäre bäre, ni ö dhaanhnha ma Deebit ni put bëëte na bwödhi marge na bäre bäre.

²⁶ Aani, a tudö ki luum bëët mëër ki geni, ni ö luummögø ni put bëëte no otuudö na bäre bäre. Aani, tietge këëlla piny ni teek ni meeda kwäänge, ni ö øt lam mara na en kur keere ni wëëga gø bëëtö dïge na bäre bäre.

²⁷ Kar bëëtö mara otïmö ni ena dïge; ni bëëda ni aana Jwøk marge, ni bëëtge ni gena jiy 'moa.

²⁸ Køøre nø, oŋäc wïth juurre ni bee aani na Wuuö Jwøk na tïïc jø Icriel ni ena kur keerge, kanyo bëët øt lam mara na en kur keere ni ena dïge na bäre bäre.› »