Edhikiel 36 - Wëël Jwøk

Luum Gwïëth Mana Caan Kiper Kïte Mo Icriel

¹ «Wär dhaanhø, cään kïte mo Icriel ni kööï, ‹Wui, u na kïte mo Icriel, wïnynyu dwør Wuuö Jwøk.›

² Man beeye luumma caan Kwäärö Wuuö Jwøki, ena köö, ni ‹Nyïïmän mou gena ŋeethø bäätu ni buuge uuni ni köge, ni «Thuuri moa bäyö na käl ya acääŋŋe adööŋ jïwa na mowa.» ›

³ Kiper manøgønø, caanï jïge ni kööï ni man beeye luumma caan Kwäärö Wuuö Jwøki, ena köö, ni ‹Kiper mana ö nyïïmän mou na wëëkge ŋöömö maru ränynyö, ni cielge uuni dïër ki deŋŋu bäre, ni tïmu nou ena tiet juurre møga, nou bëëdö ni uuna gïr ajøøŋ dhøkge,

⁴ kiper manøgønø, u na kïte mo Icriel, wïnynyu dwør Kwäärö Wuuö Jwøk. Luumma caan Kwäärö Wuuö Jwøki jïïu, u na kïte mo Icriel, ki thuuri, ka aleye, ki gøli, ki kwöra no oränynyö, ki u na päänye moa no odööŋ na tëën, na twier na tïmö na gïr abuua jï wïth juurre moa en deŋŋu,

⁵ gïna caan Kwäärö Wuuö Jwøki jïïu bee en, ena köö: ni Aani, a cäänö ni cwïnya okëënynyö ki wïth juurre møga ki jø Ëdöm bëët. Geni, ŋöömö mara akälge kiper dëëtge ni cwïnyge päŋ ki met ec ki män, nee japa beyø na en yie twierge.›

⁶ Kiper manøgønø, cäänï kiper ŋööm Icriel ni kööï jï kïte, ki thuuri, ka aleye, ki gøli, ni man beeye luumma caan Kwäärö Wuuö Jwøki, ena köö, ni ‹Aani, a cäänö ni cwïnya okëënynyö naa wëër, kiper uuna bëëdö nou cooyø ka ajaany mar wïth juurre.›

⁷ Kiper manøgønø, man beeye luumma caan Kwäärö Wuuö Jwøki, ena köö, ni ‹Aana kööŋ døc ni wïth juurre moø ni en deŋŋu yøø ki dëëtge geno bëëdö ni ge cooyø ka ajaany.

⁸ « ‹'Ba u na kïte mo Icriel, jenni moa en bäätu oløth ni ŋweelge ki nyïëdi jï jiya ma jø Icriel; kiper ge duua paac ki kany mo cään.

⁹ Ï na ŋööm Icriel, ennø, a cädö kiperï ni nyoodha bäth ec mara jïrï; ïïno puur ni piith caammi yiï.

¹⁰ Jiy owëëga nyaay yiï, ni beege jø Icriel bëët. Päänye moï ocäŋ beetø, ni ö gïïa no oränynyö ni cäŋi geerrø.

¹¹ Jiy ki lääc paac kwäänge omeeda yiï, ni wëëga ge nyöödö ni nyaacge ni thööth døc. Jiy owëëga bëëtö yiï kaawat mana bëëtge dïkwøŋ, ni tïïa bëëtö marge ni beer ni kaala mana dïkwøŋ. Køøre nø, oŋäyï ni bee aani na Wuuö Jwøk.

¹² Jiya ma jø Icriel ge wëëga wääth bäätï, ni lwørge ïïni na kurge, ni putï tïmö ni ïïna kar bëëtö jïge na bäre bäre. Køøre nø obwöre moge ba wëëgï thøø këët.›

¹³ «'Ba man beeye luumma caan Kwäärö Wuuö Jwøki kiperï, ena köö, ni ‹Kiper mana købi, ni «Ïïna dïcäm jiy, ni wï jur marï iï wëëk dööŋŋe ni bäŋ obwöre jïge,»

¹⁴ kiper manøgønø, bäŋ jiy mo camï këët, ni wï jur marï ba wëëgï dööŋŋe këët ni bäŋ obwöre jïge. Luummögø caana aani, a na Kwäärö Wuuö Jwøk.

¹⁵ Aani, ï ba tïïa këët nee dee luup abuua mo wïnynyï baŋ juurre, ni bäŋe ajaany mo jwørï këët baŋ wïth juurre, wala ki man wëëgï jiy moï pädhö. Luummögø caana aani, a na Kwäärö Wuuö Jwøk.› »

Luum Bëëtö Mana Nyään Mar Jø Icriel

¹⁶ Køøre dwør Wuuö Jwøk acäŋ ö bääta ni kööe,

¹⁷ «Wär dhaanhø, kanya bëët jø Icrielli yi ŋöömö marge, ŋöömö apäätge ki bëëtö marge ki tïïe moge. Bëëtö marge ki baŋa, nëëni kaamar bäŋ waany mar dhaagø mo gïr mään opïï dëëre.

¹⁸ Kiper manøgønø, wëër mara akønynya bäätge kiper gena kuny piny ki rem jiy yi ŋöömö, ni wëëkge ŋöömö päät ki kït gïï wø lamge.

¹⁹ Aani, gena keetha dï wïth juurre, ni putge nibay yïth mïëri; ni ŋøla luup moge ki køør bëëtö marge ki tïïe moge.

²⁰ Kwöra cige yïthge bëët dï wïth juurre, ge bëëdö ni ge pääta nyeŋŋa na en kur keere, kiper jiy cäänö kiperge, ni ‹Moøgø beege jic Wuuö Jwøk ni ee cäŋ mänö yøø ki man bëëtge yi ŋöömme.›

²¹ 'Ba aani, a cädö kiper nyeŋŋa na en kur keere na päät jø Icrielli dï wïth juurre kwöra cige yïthge.

²² «Kiper manøgønø, caanï jï jø Icriel ni man beeye luumma caan Kwäärö Wuuö Jwøki, ena köö, ni ‹Wui, u na jø Icriel, gïï noo tïïa ii patha kiper nyeŋŋu, 'ba beeye kiper nyeŋŋa na en kur keere na päätu dï wïth juurre kwöra cou yïthge.

²³ Aani, ajiem mar nyeŋŋa na dwøŋ na en kur keere na päät dï wïth juurre nyoodha nyoodhø, ni beeye nyeŋŋa na päätu dïge. Køøre nø, ŋäc wïth juurre ŋääö ni bee aani na Wuuö Jwøk, kanyo nyoodha bëëtö mara na en kur keere ki rou ni nëënö jïge. Luummögø caana aani, a na Kwäärö Wuuö Jwøk.

²⁴ « ‹Kiper aani, u käla wøk dï wïth juurre, ni lïma uuni wøk ki yïth mïëri bëët, ni cäŋa uuni duu yi ŋöömö maru.

²⁵ Aani, dëëtu jøra jørø ki pïï mo tøŋ ni tïmu nou waany; aani, u penya penyø yïth japa reyø bëët na enu yïthge, ki yïth kït gïï wø lammu bëët.

²⁶ Aani, u mooa mooø ki cwïnynyi mo nyärö, ni kïtha dëëtu ki jwïëy mo nyään; cwïnynyi mou na teek na caal kïdi käla wøk dëëtu, ni mooa uuni ki cwïnynyi mo jööm kaamar rïŋö.

²⁷ Aani, jwïëy 'moa kïtha dëëtu ni tïïa uuni nou cäädhu køør luup 'moa ni gwøgu ciik 'moa.

²⁸ Uuni, u bëëdö yi ŋöömö mana cïba jï kwäyu; ni bëëdu ni uuna jiy 'moa, ni bëëda ni aana Jwøk maru.

²⁹ Aani, u piema piemø yïth jammi bëët moa tïïc uuni nou ba waany. Aani, u mooa mooø ki beel ni wëëga ge ciek ni thööth, nee bäŋe käc mo ö bäätu këët.

³⁰ Aani, nyïïjenni ki beel wëëga ciek ni thööth yïth pwöth mou, nee bäŋe law-waŋ mo ö bäätu dï wïth juurre kiper käc.

³¹ Køøre nø, wïthu caarru caarø ki uutjïëthe mou na reyø ki tïïe mou na näk ba beyø, ni männu ki dëëtu keeru kiper raay mou ki japa näk yia raac ki ge na tïïyu.

³² 'Ba aani, a manynya gø nee ŋäyu ni gïn tïïa en patha kiper nyeŋŋu. Wui, u na jø Icriel, beerra man lää wïthu ni päth cwïnynyu ki bëëtö maru!› Luummögø caana Kwäärö Wuuö Jwøki.

³³ «'Ba man beeye luumma cäŋ Kwäärö Wuuö Jwøki caannø, ena köö, ni ‹Dïcäŋo penya uuni yïth raay mou bëët, u cäŋa ka wëëk bëëtö yïth päänye mou, ni ö kwöra no oränynyö ni cäŋi geerrø.

³⁴ Pwöth moa no odööŋ keerge di puurö, ni ba wec no obutö jaak ni nëënö nyïm jiy bëët mo wø pöödhi ki yie.

³⁵ Køøre nø, jiy ge köö, «Ni pwöth moi na bëëdö no odööŋ keerge anø tïmö kaamar ajïniina mar Ëden; ni ö päänye moa no oniruuth piny no oränynyö ni cäŋi geerrø ni teek ni døø jiyi yïthge.»

³⁶ Køøre nø, wïth juurre moa en deŋŋu na dööŋ, ŋäcge ŋääö ni bee aani na Wuuö Jwøk na cäŋ japa no oränynyö geerrø, na cäŋ pwöth moa no odööŋ keerge tïïyö nee puur. Bee aani na Wuuö Jwøk ni cäänö en; japøgø tïïa tïïö.›

³⁷ «'Ba man beeye luumma cäŋ Kwäärö Wuuö Jwøki caannø, ena köö, ‹Aani thuwø, jø Icriel ge tïïa tïïö naa pëënyge kiper nee gïn tïïa jïge: Jiy moge meeda meedø nee tïmge kaamar pïïth dïëk,

³⁸ ni ge thööth døc kaamar pïïth dïëk mo wø cïp no olämme yi Jerucalem ki yïth cääŋŋe moa no ocïp piny na mo wödö. Kanyøgønø, päänye moa no oränynyö opäŋ ki lwaa dhaanhø. Køøre nø, ŋäcge ŋääö ni bee aani na Wuuö Jwøk.› »