Edhikiel 34 - Wëël Jwøk

Luum Dïkwääye Mo Icriel Mo Patha Adïëri

¹ 'Ba dwør Wuuö Jwøk aö bääta ni kööe,

² «Wär dhaanhø, caan luum ajäla man jï dïkwääc dïëk mo Icriel, caanï jïge ni kööï ni man beeye luumma caan Kwäärö Wuuö Jwøki, ena köö, no ‹Otïmö ni leth jï dïkwääc dïëk mo Icriel mo wø bëëdö ni ge gwøga rege keerge. ?Aŋø, tïïc mar dïkwääc dïëk, paa kwaac pïïth dïëk na bëëde?

³ Uuni, u cämö ki rïŋ mo olør, ni runynyu dëëtu ka abïïe moa no otïïö ki jïëc rööm, ni 'nägu moa no olør. 'Ba pïïth dïëk ba gwøgu.

⁴ Uuni, moa näk oööl käru wëëk tëënnö, ni käru moa tuu kønyø, ni käru ŋwiili moa en dëëtge bääö, ni käru moa no okeethø cooŋø, ni käru moa no orwäänyö manynyø, 'ba ge kääru ka teek ni ge you caannø.

⁵ Køøre nø, gena put keethø kiper mana bäŋe dïkwääy jïge; 'ba kanya keethge gena put tïmö na cam jï lääc paap bëët.

⁶ Pïïth dïëk 'moa gena thääyö bäät kïte bëët, ki bäät thuuri moa bäyö bëët. Gena keethø bäät piny bäre ni bäŋ ŋat moo many geni›.

⁷ «Kiper manøgønø, u na dïkwääc dïëk, wïnynyu dwør Wuuö Jwøk.

⁸ Kwäärö Wuuö Jwøk aköö, ni ‹Kaawat man bëëda naa kwøw en, ka adïëri møn, kiper mana tïm pïïth dïëki 'moa ni bäŋ dïkwääy jïge, gena put tïmö ni ge di tweeyø, ni putge tïmö na cam jï lääc paap bëët, kiper mana bëët dïkwääye ni pïïth dïëk 'moa kärge manynyø, ni tïmge ni ge gwøga dëëtge keerge ni pïïth dïëk 'moa kärge gwøø.›

⁹ Kiper manøgønø, u na dïkwääc dïëk, wïnynyu dwør Wuuö Jwøk,

¹⁰ man beeye luumma caan Kwäärö Wuuö Jwøki, ena köö, ni ‹Dïkwääc dïëk ge jääla jäälö, ni puta dïëk 'moa lwør ceŋge, ni tïïa geni nee dïëk ba kwaacge këët, ni put tïmö ni bäŋ dïkwääy mo caama dëëre rege këët. Pïïth dïëk 'moa ge gwøa gwøø dhøkge, nee ba tïme na cam jïge këët.›

Luum Dïkwääy Mana Na Adïëri

¹¹ «Kiper man bee luumma caan Kwäärö Wuuö Jwøki, ena köö, ni ‹Ka adïëri møn, aani ki dëëra kiree dïëk 'moa omanynya ni gwøa geni.

¹² Kaawat man wø ö dïkwääyi wø gwøk pïïth dïëk moe ki dïcäŋ ni ena yïthakic dïëk mo okeethø, aani thuwø dïëk 'moa gwøa gwøø, ni piema geni kwöra enge yïthge na näk geno keethø yïthge dïcäŋo näk cäŋ jwør gïï mo leth mano caal pöölö ki muudhö.

¹³ Geno käla wøk ki yïthakic wïth juurre ni cuuŋa geni ki yïth mïëri, ni käla ge yi ŋöömö marge, ni caama geni bäät kïte mo Icriel, ni ge ena deŋ nyeŋ näm, ni ge ena kwör wø beet bëët yi ŋöömö manøgø.

¹⁴ Aani, ge caama caamø yi luum mo pulli, ni kar cam marge ena bäät kïte kwöra en maal mo Icriel. Geno bëëdö kaace ni geno but piny yi luum mo pulli ni ge cämö ki cam mo beer bäät kïte mo Icriel.

¹⁵ Aani, pïïth dïëk 'moa caama caamø ni bwødha geni kar jwöm. Manøgø beeye dwøra, a na Kwäärö Wuuö Jwøk.

¹⁶ Aani, dïëk moa no orwäänyö manynya manynyø, ni duua moa no okeethø, ni bääa ŋwiili moa en dëëtge, ni tïïa dëët moa jägö ni teek; 'ba moa no olør ki moa dëëtge teek raanynya raanynyø. 'Ba aani, dïëk 'moa käära käärö ki jöö ma kare.

¹⁷ « ‹'Ba a na Kwäärö Wuuö Jwøk, luum caana kiperu, u na pïïth dïëk 'moa, beeye en: Aani, aano tïmö ni aana dïŋut luup yïthakic diel ki diel, ki yïthakic nywø røømmø ki nywø ateea.

¹⁸ ?Aŋø, ba rømi kiperu ki man cämu jaak ki luum mo beer? ?U manynya gø thuwø nee moa dööŋ cäŋu nyørø ki tietu? ?Aŋø, u ba rømi ki man mädhu jaak ki pïï moa tøŋ? ?U manynya gø thuwø nee pïï moa dööŋ cäŋu duupö ki tietu?

¹⁹ Pïïth dïëk 'moa gena tïmö ni cama luum mana näk you nyøøn piny, ni tïmge ni ge maatha pïï moa näk you duubö ki tietu.›

²⁰ «Kiper manøgønø, man beeye luumma caan Kwäärö Wuuö Jwøki jïge, ena köö, ni ‹Neennu, aani ki dëëra aano tïmö ni aana dïŋut luup yïthakic diel mana no olør ki diel mana no odwat.

²¹ Kiper mana bëëdu nou caala dïëk mo dëëtge cööcge cööyö ki göökge, ni dëëtge gïïnge gïïnnö, ni cööpge moa no oööl ki tuŋi, këël man wø putge keethø,

²² kiper manøgønø, aani, pïïth dïëk 'moa piema piemø nee ge ba twier këët. Aani a bëëdö ni luup ŋøla ŋølø yïthakic diel man nø ki wati maya.

²³ Ni cïpa bäätge ki dïkwääy aciel, ni beeye dhaanhnha ma Deebit. Eni, geno caame; eni ki dëëre geno caame ni put tïmö ni ena dïkwääy marge.

²⁴ 'Ba a na Wuuö Jwøk, aano bëëdö na Jwøk marge, ni ö dhaanhnha ma Deebit ni tïme na ŋat bwøth geni. Luummögø caana aani, a na Wuuö Jwøk.

Luum Bëët-Mëër Mano Tuut Wuuö Jwøki Ki Jø Icriel

²⁵ « ‹Aani, a tudö ki luum bëët mëër ki jø Icriel, ni ö lääc paapi moa no owär ni riema ge wøk yi ŋöömö, ni öge, ge na dïëk 'moa, ni wëëga geni bëëtö dï paap ni buutge yi lul jaak ni bäŋ gïn lääŋge.

²⁶ Aani, ge gwïëdha gwïëdhö, ni bee geni ki kwör bëëte moa en deŋ thuur mara. Aani køth jääŋŋa jääŋŋö yi ŋöömö marge ki kanya näk kare, ni tïm køthi manøgø ni beeye mar gwïëth.

²⁷ Jenni mo pwöth geno ŋweel ki nyïëdi, ni ö ŋöömö ni wëëk caammi ciek ni thööth, ni ö geni, ge na jiya, ni putge bëëtö ni geno gwøø yi ŋöömö marge. Kanyøgø nø, ŋäcge ŋääö ni beeye aani na Wuuö Jwøk, kanyo käla tëëra peek wøk bäätge na caal jaath puur man wø rïï ŋut dhieŋ, noo piema geni ceŋ jøøa tïïc geni na laaŋe.

²⁸ Geni, ge ba twier wïth juurre këët, ni ge ba cam lääc paapi këët. 'Ba geno bëëdö ni geno gwøø ni bäŋ gïn wëëk geni lwär.

²⁹ Ni kïtha geni yi ŋöömö mana ŋäc ni cam ciek yie døc, ni putge bëëtö yi gø ni bäŋ käc këët mo ööl geni, ni bäŋ ajøøŋ mo jwørge këët baŋ wïth juurre.

³⁰ Køøre nø, ŋäcge ŋääö ni beeye aani na Wuuö Jwøk, Jwøk marge, na bëëdö ki geni; ni ge na jø Icriel, gena jiy 'moa. Luummögø caana aani, a na Kwäärö Wuuö Jwøk.

³¹ 'Ba u na dïëk 'moa, ni bee u dïëk 'moa mo wø caama, uuna jiy 'moa, ni aana Jwøk maru.› Luummögø caana Kwäärö Wuuö Jwøki.»