Edhikiel 31 - Wëël Jwøk

Luum Leer Mana Caan Ki Ri Jaath Kiper Ŋööm Aciria

¹ 'Ba kanya tïm cwiic mäk marwa ki tøŋ na apaar kurciel, ni nïr dwää adäk aciel, dwør Wuuö Jwøk aö bääta ni kööe,

² «Wär dhaanhø, caanï jï Peerø nyeny Ijep ki lwaak mare, ni kööï, «ni ‹?Ï röömï ki ŋa ki dööŋ kar marï?

³ Ka adïëri møn, ŋööm Aciria abëëdö ni rööma jaath lur Libaanø na pere leth, jaadha näk bäädi moe mïërö, na näk tïpö mare dwøŋ, ni raŋa maal ni wïïe okëët yïth pøøl.

⁴ Ni eno wëëk pïïyi døøŋŋø, ni wëëge ya pïïyi moa en tiere bänynyö. Ni bëët tiere ni kwödö ki pïï ki deŋŋe bäre; ni pïï jääŋŋe wøk ki yïth løle baŋ jenni bëët moa en yïth pwöth.

⁵ Kiper manøgønø, ena put tïmö na jaath mo bäär døc, ni jenni bëët moa en yïth pwöth ee kaalø; ni bäädi moe olaak ni bäyö ni thööth, kiper thööth pïï.

⁶ Ni ö wenynyi bëët mo maal ni gëëtge bäät gø ki uudi, ni tïm tiere na kar nyööt jï lääy bëët mo paap. Ni wïth juurre bëët moa teek ge bëëdö tier tïpö mare.

⁷ Ena jaath mo mïërö døc ki køør dööŋö mare ki bäädi moe na näk olaak ni bäyö, kiper lweedi moe okëët piny døc baŋ pïï moa thööth.

⁸ 'Ba këël jenni moa perge leth na en ya ajïniina mar Jwøk ba pääri ki eni, ni bäŋ jaath mo mïërö mo bäädi moe rööma bäädi mo gø; ni mïërö mare bäŋ jaath mo röömge ki gø ya ajïniina mar Jwøk.

⁹ Ena tïïa ni mïërö ni bääte okar ni thööth, ni ö jenni bëët moa en Ëden, ni beeye ajïniina mar Jwøk, ni këëcge kipere.›

¹⁰ «Kiper manøgønø, man beeye luumma caan Kwäärö Wuuö Jwøki kiper jaadhøgø, ena köö, ni ‹Kiper mana bäny jaathi manøgø ni lwinhnhe okëët yïth pøøl, ni jït cwïnye ka atöör kiper bär mare,

¹¹ aani, ena cïba cer nyenynya teek na en bäät wïth juurre, ni jääl gø ki køør japa reyø na tïïe. 'Ba ena puta kwier,

¹² ni ö jøøgø no ogäy døc yøø dï wïth juurre ni putge gø ŋøt piny ni leeŋge gø wøk, ni ö bäädi moe ni päthge bäät kïte ki yïth gøli bëët; ni put bäädi moe bëëtö no otøyø yïth aleye moa bäyö na en yi ŋööm paac. Ni ö wïth juurre bëët mo bäät piny ni öge wøk ki yi tïpö mare ni wecge gø.

¹³ Ni ö wenynyi bëët mo maal ni putge bëëte wïth tuge moa no otøyø, ni ö lääyi bëët mo paap ni bëëtge yïthakic bäädi moe.

¹⁴ Kiper manøgønø, bäŋ jaath mo bänynyö deŋ naam këët mo töödö kiper bär mare, mo bäädi moe okëët yïth pøøl. Bäŋ jaath këët mo tiere da pïï mo døøŋŋø ni bäär. Ge thøw bëët ni cige tiet ŋøøm yïthakic jiy moa no othøw na en yïth bwör.›

¹⁵ «'Ba man beeye luumma caan Kwäärö Wuuö Jwøki, ena köö, ni ‹Dïcäŋa ö jaathi manøgø na ci kar bëët jwïëc jøøa no othøw, jammi bëët awëëga kïmmö kipere, ni ö pïïyi moa en tiere ni ŋøla gø, ni wëëga näm døø mo wø kwöt tier gø. Pïïa thööth ni wø kwöt tiere aŋøl, ni tïïa lur Libaanø nee kïmme bäät gø; ni ö jenni bëët moa en yi pwöla ni talge ki køøre.

¹⁶ 'Ba wïth juurre, dëëtge awëëga tïmö ni kwanynyi ki lwär ki dwør pädhö mare, kanya wëëga gø ciin kar bëët jwïëc jøøa no othøw baŋ jiy moa no onø ci yïth bwör. Køøre jenni bëët mo Ëden moa näk tietge da pïï, ki jer lur Libaanø moa perge leth na beyø, gena jïtö ki cøm cwïny tiet ŋøøm.

¹⁷ 'Ba jiy moa wara bëëdö tier tïpö mare, ki jiy moa no ogöök dëëre dï wïth juurre, gena ci kar bëët jwïëc jøøa no othøw ki eni ciel, ni dwalge rege na aciel ki jiy moa 'näk ko opëëllö.

¹⁸ « ‹?Aŋø, da jaath mar Ëden ma ajiem mare ki dööŋö mare röömi ki marï? 'Ba ïïni, ï na Peerø en, ï kïtha yi bwörö tiet ŋøøm ki jer Ëden na aciel; ni peeth ïïni piny na aciel ki jøøa näk kär daŋø na 'näk ko opëëllö. 'Ba manøgø beeye Peerø ki jiy moe bëët.› Luummögø caana Kwäärö Wuuö Jwøk.»