Edhikiel 30 - Wëël Jwøk

Duut Kïmmö Kiper Ŋööm Ijep

¹ 'Ba dwør Wuuö Jwøk acäŋ ö bääta ni kööe,

² «Wär dhaanhø, caan luubö man ni kööï ni luumma caan Kwäärö Wuuö Jwøki bee en, ena köö, «ni ‹Gööu ko oduuru, ni kööu, «Wui, otïmö ni leth dïcäŋöca!»

³ Kiper dïcäŋöca kare aløny ni cään; cäŋ Wuuö Jwøk kare aløny ni cään, ni beeye cäŋ mo maal gääbö ki pøøl, na cäŋ ränynyö mar wïth juurre.

⁴ Jø Ijep ge di nääö ko opëëllö, ni ö jwør gïï mo leth ni en bäät jø Kuuc. 'Ba kanyo 'näk jiy Ijep, jap kwärö mo Ijep put ka twier, ni ö kiir mare bäre ni puti toor piny.

⁵ « ‹Ni ö jø Kuuc ki jø Put, ki jø Lidiya, ka Arabe bëët, ki jø Libya, ki jø ŋöömma luumme tuut, ni putge 'näk na aciel ki jø Ijep.›

⁶ «'Ba man beeye luumma caan Wuuö Jwøki, ena köö, « ‹Ka adïëri møn, jiy mo wø cwak Ijep ge pädhö, ni ö teeki mar Ijep man wø tööde kipere ni døø piny; ki mano täge ki jø Migdöl këël mano këët baŋ jø Acwan, ge di nääö ko opëëllö yi Ijep. Luummögø caana aani, a na Kwäärö Wuuö Jwøk.

⁷ Geni, ge ränynyö yïthakic mïëri moa no oränynyö, ni ö päänye moge ni päthge yïthakic päänye moa no oniruuth piny.

⁸ Kanyøgønø, ŋäcge ŋääö ni bee aani na Wuuö Jwøk, kanyo leeŋa maac bäät Ijep, noo raanynya jiy bëët mo wø cwak eni.

⁹ « ‹Dïcäŋöca a jääga wøk ki jiy ki jïëth naam kuna wëëkge jø Kuuc lwär, ni beege jø wø köö ni geno gwøø. Geni, gïï mo leth tägö bäätge kaawat mana tägö bäät jø Ijep; ni manøgø beeye gïn ma adïëri mo ba kääŋi ki man täge.›

¹⁰ «Luubö man beeye mana caan Kwäärö Wuuö Jwøki, ena köö, «ni ‹Jap kwärö mo Ijep wëëga ränynyö ki ri Nabukedenecör nyeny Babiløn.

¹¹ Eni ki jø leny moe, ni beege jøøa no ogäy døc dï wïth juurre, wëëga ööny Ijep kuna raanyge gø. Geni, opëëlle moge wöthge wøk ni 'näkge jø Ijep, ni ö ŋööm Ijep bäre ni pääŋe ki rïŋ dëët jiy mo othøw.

¹² Løle mo naam Nail wëëga talø, ni gadha ŋööm Ijep ki jøøa reyø. Aani, jøøa path jääŋŋa kuna raanyge gø, ni ö ŋöömö mare ni ränynye ki gïïa en yie bëët. Luummögø caana aani, a na Wuuö Jwøk.›

¹³ «'Ba man thuwø beeye luumma caan Kwäärö Wuuö Jwøki, ena köö, «ni ‹Aani, juuga reyø raanynya raanynyø, ni ŋuuda lam mo kït gïï wø lam moa en Mempic. Bäŋ dïbwödhi këët mo bëëdö Ijep; aani, lwär jääŋŋa jääŋŋö bäät ŋööm Ijep bäre.

¹⁴ Aani, thääŋ ŋööm Ijep mana cwøl ni Patröc wëëga ränynyö, ni wëëga pääny Dhöän waaŋ ki maac, ni puta pääny Tëbic jääl.

¹⁵ Wëër mara kønynya bäät Pëlucëm, ni beeye kar gwøk røk mana teek mar Ijep, ni raanynya jø leny moa en Tëbic.

¹⁶ Ijep waaŋa waaŋø ki maac, ni ö gïn mo leth ni päth bäät Pëlucëm. Kiir Tëbic otoor piny, ni ö Mëmpici ni ba ö wøk yïth japa leth.

¹⁷ Obwöc cwøw mo Awen ki mo Pi-Biceth di nääö ko opëëllö, ni ö jø päänye ki dëëtge ni mak geni ki tøŋ.

¹⁸ 'Ba kanyo raanynya teek mar Ijep, muudhö onijïïm bäät Thapinac, ni ö teeki mare man wø tööde kipere ni ŋøle kaace. Eni rïëp pøølli rïëbö, ni ö atude moe ni mak geni ki tøŋ.

¹⁹ Aani jø Ijep jääla jäälö. Køøre nø, ŋäcge ŋääö ni bee aani na Wuuö Jwøk.› »

²⁰ 'Ba kanya päŋ cwiic mäk marwa ki tøŋ na apaar kurciel, ni nïr dwää aciel abïriiø, dwør Wuuö Jwøk aö bääta ni kööe,

²¹ «Wär dhaanhø, aani teek bat mar Peerø nyeny Ijep araanynya. Ena ränynyö ki ränynyö mo ba løny ki køny këët ki man døø teeki mare kare no opëëllö maae.

²² Kiper manøgønø, man beeye luumma caana, a na Kwäärö Wuuö Jwøk, aana köö, ni ‹Aani, Peerø nyeny Ijep, a ööa maal bääte. Aani, teek bäädi moe bëët raanynya raanynyø, ni beeye mana kwøŋa raanynyø ki mana no odööŋ ni poot teek. Ni ö opëëllö ni wëëga gø päth piny cere.

²³ Jø Ijep wëëga nibay dï wïth juurre ni keetha geni yïth mïëri.

²⁴ Teek bäädi mo nyeny Babiløn wëëga tëënnö ni cïba opëëllö mara cere. 'Ba teek bäädi mo Peerø wëëga ränynyö, ni ö Peerø nyeny Ijep ni cooye nyïm nyeny Babiløn kaamar dhaanhø mo ree da ŋwellø.

²⁵ Teek bäädi mo nyeny Babiløn wëëga tëënnö. 'Ba Peerø bääte pädhö. Køøre nø, ŋäcge ŋääö ni bee aani na Wuuö Jwøk, kanyo cïba opëëllö mara cer nyeny Babiløn noo køny ree ki gø ki man raany Ijep.

²⁶ Aani jø Ijep wëëga nibay dï wïth juurre, ni keetha geni dï mïëri. Køøre nø, ŋäcge ŋääö ni bee aani na Wuuö Jwøk.› »