Edhikiel 3 - Wëël Jwøk

¹ Kanyøgø ena köö jïra, ni «Wär dhaanhø, cam gïnö ni nëëni jïrï enø, ni beeye wëëlö manøgø, ni aayï ni caanï luumma jï jø Icriel.»

² Kanyøgø dhaa aŋaama, ni ö eni ni caam aani ki wëëlö manøgø.

³ Køøre ena köö jïra, ni «Wär dhaanhø, cam wëëlö man ni cïba jïrï en ni jäŋï ki gø.» Ni puta gø cam ni ŋweeth dhaa ni caala maar kïc.

⁴ Køøre ena köö jïra, ni «Wär dhaanhø, ci baŋ jø Icriel nø ni caanï luup 'moa jïge.

⁵ 'Ba ï ba jääŋŋi kaper niï ciï baŋ jiy mo dhøk marge kuc wala dhøk marge teek, 'ba beeye baŋ jø Icriel;

⁶ niï ba jääŋŋi kaper niï ciï baŋ wïth juurre moa thööth ni wø cäänö ni dhøgi moge kuc wala teek, ni dhøgi moge ba ci wïïï; 'ba doo na ï yaa jääŋŋö baŋge, dwørï dege leŋø.

⁷ 'Ba jø Icriel ge poot kweer ki man wïnyge luummï, kiper geno nø kweer ki man wïnyge luumma. Ka adïëri møn, jø Icriel bëët gena jiy mo wïthge teek ni cwïnyge teek.

⁸ 'Ba ka adïëri møn, aani, wïïï tïïa tïïö ni teek kaamar wïthge, ni tïïa cwïnyï ni teek ni caala cwïnyge.

⁹ Aani, cwïnyï tïïa tïïö ni teek ni caala kïdi mo teek døc. Kärï lwäyö ki geni, ni ba bwøk cwïnyï kanyo enï nyïmge, këël na bëëtge ni gena jø ageem.»

¹⁰ Kanyøgø ena cäŋ köö, ni «Wär dhaanhø, luup bëët moo caana jïrï en, wïnynyï na karge, ni kïthï ge cwïnyï.

¹¹ Ennø, ci baŋ jø pou moa no omaa ki tøŋ, ni cäännï geni; këël mo ge kweer wala ïthge cekge ciiø, wär kööï jïge, ni ‹Man beeye dwør Kwäärö Wuuö Jwøk.› »

¹² Køøre Jwïëc Jwøk aana wëëk päny maal, ni puta dwøl mo dwøŋ wïnynyö mo märö kaamar køth deŋŋa mo köö, ni «Pwøc en jï ajiem Wuuö Jwøk na en kar bëëtö mare!»

¹³ Ni wïnynya dööt bwöm mo gïïa kwøw ni pööta rege, ki dööti mo tiet jïëthe moa en deŋge, ni dööti moøgø märö døc.

¹⁴ Kanyøgø Jwïëc Jwøk aana put tïŋ maal ni 'käl aani, ni puta aay ni cwïnya okëënynyö ni aano gootø, ni cer Wuuö Jwøk ena bääta naa ee maa ni teek.

¹⁵ Køøre aana pïï yïthakic jø Juuth moa no omaa ki tøŋ na en kanya cwøl ni Tel-Abiib bäät naam Kebar, ni puta bëëtö buutge ki nïne abïriiø ni cwïnya obwøk døc.

Kanya Jier Edhikiel Na Ŋat Koor Kiper Jø Icriel

¹⁶ 'Ba kanya tïme na aŋuun nïne moa na abïriiø, dwør Wuuö Jwøk aö bääta ni kööe,

¹⁷ ni «Wär dhaanhø, ïïna jiera niï tïmï ni ïïna ŋat koor kiper jø Icriel; luubö mano wïnynyï dhaa jaak, ge wär köömmï ki gø ki nyeŋŋa.

¹⁸ 'Ba kany wø kööa jï ŋat raay, ni ‹Ï thøw møn kiper raay moï,› niï ba ci kuna köömmï gø ki man wec raay moe nee jwïëye piem, ŋat raay manøgø thøøa yïth raay moe, 'ba remø mare pëënynya pëënynyö ki ïïni.

¹⁹ 'Ba ni näk ŋat raay köömmï köömmö, ni kweere ki man løk cwïnye yïth raay moe ki uutjïëthe moe na reyø, eni thøøa yïth raay moe, 'ba ïïni, ï dööŋ wøk ra ajäla manøgø.

²⁰ «'Ba maya thuwø, ni näk ŋat mo bëëte tiir, bëëtö mare na tiir wiie wiiø ni tïïe ki raay, ni cïpa nyïme ki gïn mo cwaanya tiere, eni thøw. Eni thøw yïth raay moe, ki køør mana kärï gø köömmö, ni ö japa beyø na tïïe ni ba par wïc ki geni; 'ba aani, remø mare pëënynya pëënynyö ki ïïni.

²¹ Kany wø näk ŋat mo bëëte tiir köömmï köömmö ki man ba tïïe ki raay, ni put bëëtö møn ni ba tïïö ki raay, eni bëëdö ni kwøw kiper mana jïëc köömmö; 'ba ïïni thuwø, ï bëëdö ni bäŋ ajäla bäätï.»

²² 'Ba cer Wuuö Jwøk abëëdö ni ena bääta kaace, ni kööe jïra, ni «Ö maal ni ciï yi ŋöömma näk ree ee päärö, naa cääna ki ïïni yie.»

²³ Kanyøgø aana put ö maal ni cøøa yi ŋöömma näk ree ee päärö. 'Ba ka adïëri møn, kanya pïïa, ajiem mar Wuuö Jwøk oløny ni cuŋŋö yie kaace, ni beeye teeŋ ajiem mana jooda bäät naam Kebar. Kanyøgø aana put pädhö ki bäp yia.

²⁴ 'Ba Jwïëc Jwøk aput døny dëëra ni tïïc aani naa cuŋŋa ki tieta, ni cääne ki aani ni kööe jïra, ni «Ciï ni dëëdï ødï bäätï.

²⁵ 'Ba ï na wär dhaanhø, ïïno twöc ki thøøli ni tïmï niï ba løny ki man ööï wøk niï ci yïthakic jiy.

²⁶ Leebï owëëga ninäŋ ya aŋarkwannï, ni tïmï niï ba cäänö, kiper nee jø Icriel nee ge ba köömmï, kiper gena jø ageem.

²⁷ 'Ba kanyo wäro cääna ki ïïni, dhiï ojaba, ni kööï jïge, ni ‹Man beeye dwør Kwäärö Wuuö Jwøk.› 'Ba ŋato jïëy, wär jïëe, ni ö ŋato kweer, ni kweere. Kiper gena jiy mo gena jø ageem.