Edhikiel 27 - Wëël Jwøk

Duut Kïmmö Kiper Pääny Tayar

¹ 'Ba dwør Wuuö Jwøk aö bääta ni kööe,

² «Wär dhaanhø, wärï ki duut kïmmö mo cäänö kaper pääny Tayar.

³ Caanï jï pääny Tayar, paana en deŋ naama dwøŋ ni wø gädhö ki wïth juurre mo thööth mo wø en bäät naama dwøŋ, ni kööï jïre ni man beeye luumma caan Kwäärö Wuuö Jwøk, ena köö, « ‹Wui, pääny Tayar, ïïna köö niï mïërö døc.

⁴ Nyeŋ kee moï ena dï naama dwøŋ; ni jø geer moa geer ïïni, ï ege tïïö kaamar baabuur mo mïërö døc.

⁵ Geni, jenni moa no oŋørø na geer ïïni ki ge bëët kälge ka bäät Kïn Canër. Gena kännö ki jaath mo pere leth ki yi lur Libaanø, nee tïïc na jaath man wø cwöth yi baabuur ni wø lïër abïï jamø bääte.

⁶ Geni, opääli moï atïïcge ki jera teek na käl kanya cwøl ni Baacan; ni ö jera teek na käl yïth mïëc Caypara moa en bäät naama dwøŋ ni tïïcge ge no opämi mo wø peeth piny iï, no ojiiŋŋø ki lak lïëy.

⁷ Abïïk jamø moï cwääc ka waac lïïna moa tar mo Ijep mo okwøø ni mïërö, ni ge bëëdö kaamar bëëre bäätu, na abïïk gëëŋi moï, mo wø lïër kiper cäŋ, kïtge caala kït abïcøle ki dïmuur, ni beege abïïe moa käl yïth mïëc Elica moa en bäät naama dwøŋ.

⁸ Ni jø Caydan ki jø Arbat bëëdö na dïkïïwe moï. Wui, pääny Tayar, jiy moï moa nyeŋge reegø ena buutï, ni beege jø wø raŋ bëët naam.

⁹ Paana cwøl ni Gëbal, jø døøŋŋø moe ki jiye moa wïthge leer ena buutï, ni ge dwøga jammi moï karge moa no otøyø. Jïëthe bëët mo naama dwøŋ ki jø wø tïïö yïthge, ena buutï niï gädhö ki geni.

¹⁰ « ‹Jø Parca, ki jø Lidiya, ki jø Put, ge bëëdö ni gena jø leny dï jø leny moï, ni kööde mo leny mo wø gëëŋ dëël ki ge ki mo wø røø wïc ege lïër dëërï, ni ö nyeŋŋï ni putge gø tïŋ maal.

¹¹ Jø Arbat ki jø leny moï ge ena bäät kiir marï ni deŋ gø ege wïrö bäre, ni ö jø Gëmada ni enge bäät uut koor moï moa no ogeerø ni bäyö, ni ge bëëdö ni kööde moge ege lïërö dëër kiir marï, ni deŋ kiir ege wïrö bäre, ni putge ïïni tïïc niï mïërö.

¹² « ‹Jø Tarcëc gena gänhnhö baŋï kiper jap kwärö moï na thööth. Gwet-bïrö moge, ki nywïëny moge moa teek, ki kørkørre moge, ki nywïëny moge moa näk eracaac agathge ki ïïni ki jap kwärö moï.

¹³ « ‹Jø Gïrïïk, ki jø Tubal, ki jø Möcak, gena gänhnhö baŋï. Geni, laaŋe moge ki jammi moa no otïïö ki nywïënyö mana näk jwïël, agathge ki ïïni ki jap kwärö moï.

¹⁴ « ‹'Ba jø Bëëth-Tögarma okwëënyi moge mo tïïc, ko okwëënyi moge mo leny, ki gääŋŋe moge agathge ki ïïni ki jap kwärö moï.

¹⁵ « ‹'Ba jø Didan thuwø gena gänhnhö baŋï. Mïëri mo thööth moa en bäät naama dwøŋ ge gänhnha baŋï. Lak lïëy moge, ki jera teek na cøl agathge ki ïïni.

¹⁶ « ‹Jø Ëdöm gena gänhnhö baŋï kiper jammi moï na thööth; geni, nyeŋ kïte moge moa perge leth, ka abïïe mo kwayø, ka abïïe mo okwøø na wøpe, ka abïïk lïïne moa pøøth, ki jap mïërö ma teeŋi, ki tiik jëëthi, agathge ki ïïni.

¹⁷ « ‹Jø Juuda ki jø ŋööm Icriel gena bëëdö ni ge gänhnha baŋï. Geni, beega käl kanya cwøl ni Minit, ki muunni mo odeelø, ki maar kïc, ki teeŋ mädhi møøk, ki riie, agathge ki ïïni.

¹⁸ « ‹Jø Damacka gena bëëdö thuwø ni ge gänhnha baŋï, kiper mana bëëdï ni jïrï da jammi mo thööth ni ïïno kwär døc. Kwøŋ moa käl Këlbön ki jïëc røømmø moa käl kanya cwøl ni Dhakar agathge ki ïïni.

¹⁹ « ‹'Ba jø tuuŋ Daan ki jø Gïrïïk gena öö ki yi Udhal kuna gänhge baŋï ki jammi. Geni, nywïëny mo othäädhö, ki jer wø jïcge ŋwääi ni met agathge ki ïïni.

²⁰ « ‹Jø Didan abïïk wø peeth bäät okwëëc lääy agathge ki ïïni.

²¹ « ‹Jø Araba ki kwääri bëët mo Këdar ge bëëdö ni ge gänhnhö baŋï. Geni, nyïïdïëk, ki nyöök rööm, ka atëëe, agathge ki ïïni.

²² « ‹Dïgäthe mo Cïïba ki dïgäthe mo Raama gena gänhnhö baŋï, ni ö teeŋ jenni bëët mo wø jïcge ŋwääi ni met, ki nyeŋ kïte moa perge leth, ki warkey, ni gathge gø ki ïïni.

²³ « ‹Jø Aaren, ki jø Kane, ki jø Ëden, ki dïgäthe mo Caaba, ki jø Acör, ki jø Kilmat, gena gädhö ki ïïni.

²⁴ Abïïe mo beyø, ka abïïe mo kïtge caala kït abïcøle, ka abïïe mo okwøø ni beyø, ka abïïe mo rege da kït ma teeŋi mo wø peeth dï øtø, ki thøøli mo teek, agathge ki ïïni kar gath marï.

²⁵ « ‹Baabuure mo Tarcëc ge bëëdö ni ge jwïëga jammi moï, niï bëëdö ni jammi päŋ jïrï, niï cäädhö dï naama dwøŋ niï peek ki jap gath.

²⁶ Dïkïïwe moï ïïna kïthge dï naam kuya. 'Ba jam wø kwönni ki kur tuul-cäŋ ïïno tøye na thäŋi dï naama dwøŋ;

²⁷ ni ö jap kwärö moï, ki japa beyø moï, ki jap gath moï, ki jiy moï moa näk abïïk jamø ena ceŋge, ki jiy moï mo wø raŋ bëët naam, ki jiy moï mo wø dwøk japa näk otøyø karge, ki jø gath moï, ki jø leny moï bëët, ki jiy moï bëët, ni mutge yi naama dwøŋ dïcäŋo raanynya ïïni yie.

²⁸ Ŋööm ageel naama dwøŋ dëëre jäŋe jäŋö ki dööt jiy moï mo wø raŋ bëët naam kanyo jwöŋge.

²⁹ Jiy bëët moa näk ceŋge da opääli, ki jiy moa näk abïïk jamø ena ceŋge, ki jø wø raŋ bëët naam, ge ööa wøk ki yïth baabuure moge, ni cuŋge wøk bäät ageela.

³⁰ Køøre ge jwöŋö bäätï ni döötge ege tïŋ maal døc ni cwïnyge ege keeyø. Wïthge jööpge jööpö ki tør ni ŋïëlge yi bur.

³¹ Ni gwäärge wïthge wøk kiperï, ni dwølge keece dëëtge. Ge jwöŋö bäätï ni cwïnyge oränynyö, ni ge kïmmö ki kïmmö mo dwøŋ døc.

³² 'Ba kanyo bëëtge ni ge guyö ni ge kïmmö bäätï, duut kïmmö man wärge wärö kiperï ni ge köö na ennønø: ?Wui, Tayar, aŋa ni caal ïïni, aŋa ni caal ïïni no onikïïl dï naama dwøŋ en?

³³ Kany wø näk jap gath moï iï jääŋŋö wøk ki bäät naama dwøŋ, wïth juurre mo thööth putï ka wëëk jäŋö; ni ö nyeye mo bäät piny ni wëëgï ge kwärö ki jap kwärö moï bëët ki jap gath moï.

³⁴ 'Ba ennø, pï naama dwøŋ ïïna tøye tiet pïï kanya päŋ. Jap gath moï ki japa en jïrï bëët anilïŋ ki ïïni na aciel.

³⁵ Mïëri bëët moa en bäät naama dwøŋ, yïthge athäŋŋö bäätï, ni ö nyeye moge ni tïm dëëtge ni kwanynyi ki lwär, ni nyeŋge okwätö.

³⁶ 'Ba dïgäthe moa en dï wïth juurre ïïna buuge; ni put gïï mo lethi pïï bäätï, ni ö ïïni ni ba bëëdï këët.› »