Edhikiel 2 - Wëël Jwøk

Kanya Ö Jwøki Na Cwøl Edhikiel Nee Dwør Jwøk Købe

¹ Kanyøgø ena köö jïra, ni «Wär dhaanhø, cuŋŋï ki tietï niï cäänna!»

² 'Ba kanya cääne ki aani, Jwïëc Jwøk adøny dëëra ni wëëk a cuŋŋö ki tieta; ni wïnynya dwøl ni cäänna aani.

³ Ni kööe jïra, ni «Wär dhaanhø, a jääŋŋa ïïni baŋ jø Icriel, ge na jø ageem na gëëmö ki aani; geni ki kwäcge gena bëëdö ni ge bääö dëëra këël dïcäŋ man.

⁴ A jääŋŋa ï baŋge, ge na jøøa wïthge teek na näk cwïnyge teek. Wär caanï jïge ni kööï, ni ‹Man beeye dwør Kwäärö Wuuö Jwøk.›

⁵ 'Ba geni, këël mo ge kweer wala ïthge cekge ciiø, kiper mana näk mo gena jø ageem, oŋäcge ki man näk mo nyikuŋ Jwøk nut dïge.

⁶ 'Ba ï na wär dhaanhø, kärï lwäyö ki geni, ni ba lwäyï ki luup moo carge, këël ïïno kïth yïthakic odhäŋ ki koodhi, ni cïp ïïni yïth agarapi, kärï lwäyö ki luup moo carge, ni ba bwøk cwïnyï ki geni kanyo enï nyïmge; kiper gena jø ageem.

⁷ 'Ba luup 'moa wär caanï jïge, kiper gena jø ageem, këël mo ge kweer wala ïthge cekge ciiø.

⁸ 'Ba ennø, ï na wär dhaanhø, cek ïthï ki luup moo caana jïrï en; kärï gëëmö kaamar jø dhi ødøgø na jø ageem yøø. Jap dhiï ni camï gïn ni cïba jïrï en.»

⁹ 'Ba køøre na lwïtha, ka adïëri møn, cenø aputa joot no orwieø nyïma ni wëëlö mo odølø ena yie.

¹⁰ 'Ba na peer gø nyïma, aputa joot no ogöörö ki yie ki ŋääe; ni luup moa no ogöörö bääte beege luup kïmmö, ko oduuru, ki cooyø.