Edhikiel 18 - Wëël Jwøk

Jwøk Luup Ŋati Man Nø Ŋøle Ŋølø Ki Køør Tïïe Moe

¹ Køøre dwør Wuuö Jwøk aö bääta ni kööe,

² ni «?Tiere aŋø ni wø caru aŋaada man kiper ŋööm Icriel na ennø en, «ni ‹Wëëe gena cämö ki nyïïomøki mo wac, ni tïm lak obwöre moge ni liir.›?»

³ Wuuö Jwøk aköö, ni «Kaawat man bëëda naa kwøw en, ka adïëri møn, ba løny jïïu këët ki man caru aŋaada man yi ŋööm Icriel.

⁴ Ka adïëri møn, jwïëy mo jiy bëët beege 'moa; jwïëy mo wëëe ki jwïëy mo obwöre beege 'moa ge bëët. Ŋat wø tïïö ki raay bee eni noo thøw.

⁵ «'Ba ni näk da ŋat mo bëëtö mare tiir mo tïïya gïn ma adïëri ki gïn mo thïïŋ,

⁶ mo eni ba cämö ko olämme mo wø cïp jï juuga reyø yïth uut lam moa en bäät kïte, wala ki man wøør kït gïï wø lam mo jø Icriel, mo cï wati ba pääde, ni ba buti ki dhaagø mo kar pïïn piny mare opäŋ,

⁷ mo bäŋ ŋat mo caare, ni gïn mo ee kälö na dïgïti dwøge dwøgø jï ŋata mäyö baŋe, mo eni ba twëëdö, 'ba eni cïpö ki cam jï jøøa no onäk käci, ni jiy moa näk cäädhi ka dëëtge, dëëtge runynye runynyö ka abïïe,

⁸ ni jammi mo wø mac jiyi baŋe ba tïïe nee dwøgi jïre ni da wïthge, mo ceŋŋe ee mänö ki man tïïe ki gïn mo raac, ni luup ŋøle ŋølø na adïëri yïthakic jiy ariiø,

⁹ mo eni cäädhi ka køør luup 'moa ni ciik 'moa ee gwøø na kare, teeŋ ŋatøgø nø beeye dhaanhø mo bëëtö mare tiir; ka adïëri møn, eni bëëdö ni kwøw. Luummögø caana aani, a na Kwäärö Wuuö Jwøk.

¹⁰ «'Ba ni näk teeŋ ŋatøgø jïre da wääde ma ŋat ageem mo kunynya piny ki rem jiy, wala tïïya teeŋ jammi møøk mo reyø dëër wati,

¹¹ ni eni na näk wuuö ki dëëre teeŋ japøgø ba tïïe, 'ba wääde manøgø cämö ko olämme mo wø cïp jï juuga reyø yïth uut lam moa en bäät kïte, ni eni cï wati pääde päädö,

¹² ni jøøa can na näk oööl caare caarø, ni twëëdö, ni gïn mo ee kälö na dïgïti ba dwøge jï ŋata mäyö baŋe, ni eni bëëdö ni wøøra kït gïï wø lam, ni eni tïïö ki gïï mo yia raac ki ge,

¹³ ni jammi mo wø mac baŋe tïïe tïïö nee duui jïre ni da wïthge, ?aŋø, teeŋ ŋatøgø løny ki man bëëde ni kwøw? Ba løny ki man bëëde, kiper eni japøgø ni raac yia ki ge bëët yøø atïïe. 'Ba ka adïëri møn, eni di nääö ni thøøe ni thuunhnha tïïe moe.

¹⁴ «'Ba nyilaal manøgø ni näk da wääde thuwø mo raay mo wø tïïc wänni ee neetø bëët, ni kweere ki man tïïc teeŋ japøge,

¹⁵ ni eni ba cämö ko olämme mo wø cïp jï juuga reyø yïth uut lam moa en bäät kïte, wala ki man wøør kït gïï wø lam mo jø Icriel, mo eni cï wati ba pääde,

¹⁶ ni eni bäŋ ŋat mo caare, wala ki man kan gïn mo ee kälö na dïgïti ni ba dwøge, ni ba twëëdö, 'ba jiy moa no onäk käci mooe mooø ki cam, ni jiy moa näk cäädhi ka dëëtge, dëëtge runynye runynyö ka abïïe,

¹⁷ ni ceŋŋe ee mänö ki man tïïe ki raay, ni jammi mo wø mac baŋe ba tïïe nee dwøgi jïre ni da wïthge, ni ciik 'moa ee gwøø, ni eni cäädhi ka køør luup 'moa, teeŋ nyilaal manøgø eni ba thøw kiper raay moa tïïc wänni; 'ba ka adïëri møn, eni bëëdö ni kwøw.

¹⁸ 'Ba wänni thøw kiper raaye keere; kiper eni wati amøde ni twier gø ki teek, ni tïïe ki gïï mo reyø yïthakic jø poge.

¹⁹ «'Ba ni näk mo u poot pëëö, na ‹?Aperŋø ni tïm nyilaalli na ajäl raay mo wänni kär pïï dëëre en?› beeye kiper mana ö nyilaalli na tïme ni tïïya gïn ma adïëri ki gïn mo thïïŋ, ni bëëdö ni wïïe ee gwøø ki man gwøk luup 'moa bëët. Kiper manøgønø, ka adïëri møn, eni bëëdö ni kwøw.

²⁰ Kiper ŋat wø tïïö ki raay bee eni noo thøw. Nyilaal ba doo jäälö kiper raay moa tïïc wänni, ni wuuö ba doo jäälö kiper raay moa tïïc wääde. Ŋata beer wø maga japa beyø na tïïe, ni ŋata raac japa reyø na tïïe dwøga wïïe.

²¹ «'Ba ni näk da ŋat raay mo cwïnye ee løø yïth raay bëët moa näk ee bayø, ni gwøk luup 'moa, ni bëëde ni tïïya gïn ma adïëri ki gïn mo thïïŋ, ka adïëri møn, eni bëëdö ni kwøw; eni ba thøw.

²² Raay bëët moa tïïe, bäŋgø mo wïc di parø ki gø mo dwøga wïïe. Eni bëëdö ni kwøw kiper japa beyø na tïïe.»

²³ Wuuö Jwøk aköö, na «?Aŋø, løny ki man mïn yia ki thøø mar ŋat raay? Ba doo løny; 'ba man manynya beeye ki man løk ree nee bëëde ni kwøw.

²⁴ «'Ba ni näk ŋat mo bëëte tiir bëëtö mare na tiir wiie wiiø, ni tïïe ki gïï mo yia raac ki ge mo caala moa tïïc ŋata bëëte raac, ?eni bëëdö ni kwøw? Ba løny; eni japa beyø bëët na tïïe, bäŋgø mo wïc di parø ki gø. 'Ba eni thøw, kiper mana bëëde ni bëëte patha kare, ki køør bääyö mare, ki raay moa temme.

²⁵ «'Ba kanymør u poot köö, ni ‹Jöö man tïï Kwäärö Wuuö Jwøki ki gø en ba tiir.› 'Ba ennø, wïnynyu, u na jø Icriel! ?Aŋø, jöö mara ba tiir? ?Aŋø, paa uuni na näk jïëthe mou ba tiir?

²⁶ 'Ba ni näk ŋat mo bëëte tiir bëëtö mare na tiir wiie wiiø ni tïïe ki raay, eni thøw ki køør raay moa tïïe; eni thøw møn kiper raay moa tïïe.

²⁷ 'Ba ni näk ŋat mo bëëte raac, cwïnye løøe løø yïth japa reyø na temme, ni tïme ni tïïya gïn ma adïëri ki gïn mo thïïŋ, eni jwïëye pieme piemø.

²⁸ Kiper eni wïïe acaare yïth japa reyø bëët na tïïe, ni käl ree wøk yïthge; kiper manøgønø, ka adïëri møn, eni bëëdö ni kwøw; eni ba thøw.

²⁹ 'Ba jø Icriel acäŋ köö, ni ‹Jöö man tïï Kwäärö Wuuö Jwøki ki gø en ba tiir.› ?Aŋø, u na jø Icriel, uutjïëthe mo tïïa ki ge ii ba tiir? ?Aŋø, paa uuni na näk uutjïëthe mou ba tiir?»

³⁰ Kiper manøgønø, Wuuö Jwøk aköö, ni «U na jø Icriel, aani u jääla jäälö. Ŋati man nø dëëtu jääla jäälö ki køør bëëtö mare. Løgu cwïnynyu, ni ööu wøk ki yïth japa reyø bëët na tïïyu; køøre nø raay otïmö ni paa gïn wëëk uuni pädhö këët.

³¹ Kälu dëëtu wøk ki yïth japa reyø bëët na tïïyu; tïïyu cwïnynyu ni nyärö, ni tïïyu jwïëyu ni nyärö! ?Aŋø, u na jø Icriel, aperŋø ni manynyu thøø en?

³² Kiper aani yia ba met ki man dee dhaanhø mo thøw dëëtu. Kiper manøgønø, løgu cwïnynyu nou kwøwu.» Luummögø caana Kwäärö Wuuö Jwøki.