Edhikiel 16 - Wëël Jwøk

Luum Bëët Rääö Mar Jerucalem

¹ Køøre dwør Wuuö Jwøk aö bääta ni kööe,

² ni «Wär dhaanhø, japa näk yia raac ki ge na tïïc Jerucalemmi caanï jïre nee ŋääe.

³ Caanï jïre ni man beeye luumma caan Kwäärö Wuuö Jwøki jï Jerucalem, ena köö, ni ‹Kanya kälï yie ki kanya nywøl ïïni yie beeye ŋööm jø Keenan; ni wäru beeye ŋat Amör, ni meru beeye nyijø Këth.

⁴ Kanya lwaarø ki ïïni, peellï kär ŋølø, niï kär lwøø ki pïï niï tïmï niï waany, ni dëërï kär buuö ka acäbö, ni dëërï kär bääö ka abïï.

⁵ Bäŋ dhaanhø mo oraŋ ïïni ni mëër ee nyoodhø jïrï wala mo cwïnye opädhö kiperï ki man tïïc gïrpiny aciel kiperï dëët japøge. 'Ba mana tïïc, ïïna leeŋ wøk yi pwödhö mo laac, kiper jøw män ki ïïni.

⁶ « ‹Køøre aana cur buutï ni jooda ïïni niï ŋïëlö yi rem nyööt marï. 'Ba kanya bëëdï niï ena yi rem nyööt marï, aana köö jïrï, ni «Kwøwï!» Aana köö jïrï, ni «Kwøwï!», kanya bëëdï niï ena yi rem nyööt marï.

⁷ Ni puta ïïni piith kaamar jaath mar pwödhö, ni piidhï ni døøŋŋï, ni tïmï niï mïërö døc, ni ö thunhnhï moï ni døøŋge, ni ö jïërri mo nyooth dööŋö marï ni tucge dëërï; 'ba ï poot bëëdö ka dëërï ni bäŋ abïï.

⁸ « ‹Køøre na cäŋa cur buutï na raŋa ïïni, ïïno nø pïï ri cwiic nywöm. Kanyøgø abïï mara aputa peer bäätï ni buŋa dëërï ki gø kiper wääth dëël marï; ni kööŋa ki man nywøma ïïni ni tuda ki luubö ki ïïni, ni putï tïmö ni ïïna thööŋŋa. Luummögø caana aani, a na Kwäärö Wuuö Jwøk.

⁹ Aani ïïna lwøa ki pïï ni pïnya remø wøk dëërï ni wïïra dëërï ki maaw.

¹⁰ Aani, dëërï arunynya ka abïï mo okwøø ni mïërö døc ni kïtha tietï ki war mo tïïc ka pïën. Dëërï arunynya ka abïï ma lïïna ka abïï mo gäte teek.

¹¹ Aani, ïïna tïïa niï mïërö ki jap mïërö, ni kïtha ceŋŋï ko oguudi, ni kïtha cwaagï ki tii,

¹² ni kïtha umï ki gwelø, ni kïtha ïdhi moï ki gwet ïdhi, ni kïtha wïïï ka aduda mo mïërö.

¹³ Kanyøgønø dëërï abëëdö ni mïërö ki warkey ki gwel-bïrö, niï käära abïïk lïïna mo pøøth ki teeŋ abïïe møøk mo beyø. Ni cam marï beeye møø mo pøøth, ki maar kïc, ki maar nyïïjenni; ni tïmï niï mïërö døc ni putï tïmö ni ïïna gwanynyø.

¹⁴ Ni put nyeŋŋï wïnyö dï wïth juurre ki køør mïërö marï; kiper ajiem mana cïba jïrï, mïërö marï awëëk thur kare. Luummögø caana aani, a na Kwäärö Wuuö Jwøk.

¹⁵ « ‹'Ba ïïna tïmö niï ŋäätha mïërö marï, ni tïïyï wïny nyeŋ marï ni beeye jöö man gathï dëërï ki gø ki käp. Ïïna tïmö ni marï buut ki ŋat wø ö baŋï jaak, ni tïm mïërö marï ni beeye kiper käp.

¹⁶ Ïïna lwötö røk abïïe moï moa näk rege da kït ma teeŋi ni tïïyï kwör lam moa en bäät thuuri ni mïërö ki ge, ni tïïyï ge ni beege mo käbï bäätge; ni gïnögø paa gïn mo løny ki man täge wala ki man tïï.

¹⁷ Ïïni thuwø, jap mïërö moa beyø na cïba jïrï, na näk tïïc ka warkey mara ki gwel-bïrö mara, akälï ni tïïyï ge na kït gïï wø lam ma cwøw, ni tïïyï ge na cwøwï mo buudï ki geni.

¹⁸ Ni ö abïïga beyø moï ni kälï ge ni rïëbï ge dëëtge, ni ö maawi mara ki gïï wø jïcge ŋwääi ni met 'moa ni cïbï ge nyïmge na muuy.

¹⁹ Caammi thuwø moa cïba jïrï nee camï, ni beege møø mana pøøth, ki maar nyïïjenni, ki maar kïc, acïpï jïge na muuce mo ŋwääi ni met. Moøgø beege japa tägö na tïïyï. 'Ba luummögø caana aani, a na Kwäärö Wuuö Jwøk.

²⁰ « ‹Obwöc cwøw moï ko obwöc mään moï moa nywøla ki ïïni acïpï no olämme jï kït gïï wø lam ni tïmge na cam kiperge. ?Aŋø, bëët käp marï man wø gathï dëërï poot ba rømi nø?

²¹ Obwöre 'moa aŋarï ni cïpï ge no olämme jï kït gïï wø lam.

²² Ki yïth japa reyø na tïïyï bëët ki mana bëëdï niï gatha dëërï ki käp marï, wïïï kärï parø ki nïr thïnhö marï, kanya bëëdï niï bëëdö ka dëërï ni bäŋ abïï, niï ŋïëla yi rem nyööt marï.

²³ « ‹'Ba a na Kwäärö Wuuö Jwøk, a cäänna ïïni, «Otïmö ni leth kiperï! Otïmö ni leth jïrï!» Japa reyø bëët na tïïyï, bäätge acäŋï mëënnö ki møøk.

²⁴ Kwöra laac bëët na en dï kiir agëënnï ki kwör lam mo juuga reyø kiper dëërï, ni iï geerø ni ena maal.

²⁵ Yïth agääk jïëthe bëët agëënnï ki kwör lam mo juuga reyø kiper dëërï; ni døøyï mïërö marï rääö; niï bëëdö ni tietï iï peerø jï cwøw bëët mo wø cur buutï niï kaatha käp marï.

²⁶ Ïïna käbö thuwø ki jø paac mana kïïï ki gø, ni beege jø Ijep mo wø mëër ki niine, ni putï käp marï kaath niï tïïya aani naa goota.

²⁷ 'Ba aani, cera atïŋa maal bäätï ni jääla ïïni ni tïïa ŋøøm moï ni nøk; ni cïba ïïni ceŋ nyïïmän moï na many ïïni, ni beege jø Pilitin na wïthge lää ki bëët käp mana tïïyï.

²⁸ Ïïna käbö thuwø ki jø Aciria kiper iï kär thum; køør manøgø ïïna put bëëtö niï käbö jaak ki geni ni iï poot ba thum.

²⁹ Ïïna käbö døc thuwø ki jø Babiløn, jø wø bëëdö na jø gath, 'ba këël na tïïyï manøgø thuwø ïïna cäŋ bëëtö ni iï poot ba thum.› »

³⁰ Kwäärö Wuuö Jwøk acäänö ki Jerucalem, ni kööe, na «?A teeŋ rääya ŋø ni raayï ki gø en? Jammi moøgø bëët atïïyï ni ïïna kääbi mo waŋï teek jaak.

³¹ Kanya geerï øt lam marï yïth agääk jïëthe, ni tïïyï kwör lam møga ni iï geerø ni ena maal kwöra laac dï kiir, ïïna tïmö kede ï patha kääbi, kiper ï ba many gwel mo di coolø jïrï.

³² Nya, ï na dhaagø ma kääbi mo buut ka jiy mo path mo patha cwøre en!

³³ Jiy bëët mo wø gath dëëtge ki käp, ge wø di cunnö ki gwel, 'ba ïïni, ï cïpö ki muuce jï omëërri moï jaak niï ŋeewa geni ki man öge baŋï ki kwöra enge yïthge bëët, ni käbï ki ge.

³⁴ Kiper manøgønø, käp marï opääö ki mo jiy møga; ïïni bäŋ dïcwøø mo rïïŋe køørï. Käp marï opääö møn, kiper ïïni ï cïpö ki jammi, ni bäŋ jammi mo cïp jïrï.

³⁵ «Kiper manøgønø, ï na kääbi, wïny dwør Wuuö Jwøk!

³⁶ Man beeye luumma caan Kwäärö Wuuö Jwøki, ena köö, ni ‹Kiper mana bëëdï ni riï päädö ni dëërï iï wii wøk jï omëërri moï mo wø käbï ki geni, ge ki kït gïï wø lamï bëët na näk yia raac ki ge, niï bëëdö ni rem mo wäätï kønynyï piny jï kït gïï wø lamï,

³⁷ kiper manøgønø, aani a öö ni cooŋa omëërri moï ni wø jïtï ki met ec ki ri niine ki ge, ni beege jø wø mëërï ki ge bëët, këël jø wø mänï ki geni. Aani, ge cooŋa cooŋø ki kwöra enge yïthge bëët, ni pwödha abïïnï wøk dëërï nyïmge ni putge dëërï bäre neetø niï bëëdö ka dëërï.

³⁸ Kanyøgønø ï jääla jäälö kaamar dhaagø mo okännö ki luk wala mo okuny piny ki rem dhaanhø, naa coola kwör japa tïïyï; ni manøgø tïïa ka køør wëër mara ki këëny cwïny mara.

³⁹ Køøre ï cïba ceŋ omëërri moï, ni ö geni ni toorge uut lam moï piny, ni raanyge kwör lam moï moa en bäät thuuri, ni pwöthge abïïnï wøk dëërï, ni kälge jap mïërö moï wøk dëërï, ni wecge ïïni jaak niï bëëdö ka dëërï ni bäŋ gïrpiny riï.

⁴⁰ 'Ba geno kän bäätï ki lwaak ni këërge ïïni ki kïte, ni ŋøørge ïïni ni thenh thenh ko opëëlle moge.

⁴¹ Uudi moï owaaŋge ki maac, ni jäälge ïïni ni nëënö nyïm mään mo thööth. Aani käp marï tïïa tïïö nee ŋuude, ni tïmï niï ba cïpï ki jammi këët jï omëërri moï.

⁴² Køøre nø wëër mara käla wøk bäätï, ni ö këëny cwïny mara ni paany ree bäätï, ni bëëda ni cwïnya yaa bäädhö ni bäŋ wëër cwïnya ki ïïni këët.

⁴³ « ‹'Ba kiper mana bëëdï ni wïïï kärï parø ki nïr thïnhö moï, ni tïmï niï wëëga aani gootø ki jammi moøgø bëët, ka adïëri møn, gïïa tïïyï bëët dwøga wïïï. Luummögø caana aani, a na Kwäärö Wuuö Jwøk. ?Aŋø, bëët käp marï kärï cäŋ meet bäät japa reyø møga bëët na näk yia raac ki ge na tïïyï?

⁴⁴ « ‹'Ba ennø, jiy bëët mo wø ŋäädö ki luup, aŋaada man ocaange kiperï, ni «Nyilaar dhaagø wø ŋwaala bëët menni.»

⁴⁵ Ïïni, ïïna nyi meru møn na männö ki cwøre ko obwöre moe; ïïni, ïïna cöögö møn dï nyïïmeru moa männö ki cwøwge ki nyïïge. Meru beeye nyijø Këth, ni wäru beeye ŋat Amör.

⁴⁶ Coku mana dwøŋ na näk dhaagø beeye Cameria, ni beeye ni wø bëëdö ki nyïïe jï løø wï-piny ki ïïni; ni coku mana thiinh beeye Cødam, ni beeye ni wø bëëdö ki nyïïe jï løø tier-piny ki ïïni.

⁴⁷ 'Ba ï kär bëëdö keere niï caatha køør tïïe moge niï temma tïïe moge na näk yia raac ki ge. 'Ba ki yïth tïïe moï bëët ïïna köö ni moøgø nøk, ni cäŋï tïïö ki mo kaala moa tïïcge bëët.

⁴⁸ A na Kwäärö Wuuö Jwøk, kaaman bëëda naa kwøw en, a caana gø jïrï, coku ma Cødam ge ki nyïïe, bäŋ gïn mo ege tïïö mo caala mana tïïyï ki nyïïï.

⁴⁹ « ‹'Ba raay mo coku ma Cødam bee en: Eni ki nyïïe ge töödö kiper jïge da cam mo päl ni ge ena yi bëët jwöm; 'ba jiy moa can na näk bäŋ gïrpiny ceŋge ba kønyge.

⁵⁰ Gena tïmö ni marge atöör ni ge temma jammi nyïma mo yia raac ki ge. Kiper manøgønø, wïthge adïïra kanya jooda geni ni ge temma japøgø.

⁵¹ Raay moa tïïyï, këël thääŋŋe bäŋgø mo otïïc jø Cameria. Jammi moa raac yia ki ge na tïïyï okadhø ni kaala moa tïïcge, ni tïïyï nyïïmeru ni kede ge beyø ki køør japa näk yia raac ki ge bëët na tïïyï.

⁵² 'Ba ennø, wïïï lääe, kiper nyïïmeru atïïyï ni kede ge beyø. 'Ba kiper mana näk mo raay moï okadhø ni kaala moge, gena nëënö ni ge beyø ni kaala ïïni. Kiper manøgønø, wïïï lääe ni røm lään wïci marï dëërï, kiper nyïïmeru atïïyï ni kede ge beyø.

⁵³ « ‹'Ba aani, bëëtö mar Cødam ki nyïïe ki bëëtö mar Cameria ki nyïïe dwøga kare, ni dwøga bëëtö marï kare thuwø ki geni ciel,

⁵⁴ kiper nee lään wïc marï røm dëërï, ni lää wïïï ki køør japa tïïyï bëët niï wëëga nyïïmeru cøm cwïny.

⁵⁵ Køøre nø, nyïïmeru, ni beege Cødam ge ki nyïïe, ki Cameria ge ki nyïïe, geno døø ri bëëtö mana kwøŋge bëëtö ki gø dïkwøŋ, ni ö ïïni thuwø ki nyïï ni døøï ri bëëtö mana kwøŋï bëëtö ki gø dïkwøŋ.

⁵⁶ ?Aŋø, ï kär bëëdö niï ŋääta dëër coku ma Cødam yïth nïra beetï niï tïïya atöör,

⁵⁷ ni beeye kanya poode ni japa tïïyï na reyø poot kär nëënö? 'Ba ennø, ïïna tïmö na gïr kwääk jï nyïïakuk Ëdöm ki jø wø bëëdö deŋŋe bëët, ki jï nyïïakuk Pilitin; jiy bëët moa en deŋŋï ïïna taakge.

⁵⁸ 'Ba a na Wuuö Jwøk, a caana gø jïrï, moøgø beege nyïëdi moa duu bëët käpi marï ki japa näk yia raac ki ge na tïïyï.

⁵⁹ « ‹'Ba a na Kwäärö Wuuö Jwøk, luum caana jïrï bee en: Gïnögø tïïa tïïö dëërï kaawat mana tïïyï gø, kiper gïna kööŋï kipere aweyï ki køør mana raanynyï luumma tuut ki ïïni.

⁶⁰ 'Ba aani wïïa poot para parø ki luumma tuuda ki ïïni yïth nïr thïnhö moï. 'Ba ennø, a tudö ki luubö ki ïïni mo bëëdö na bäre bäre.

⁶¹ Køøre nø, wïïï oparï ki uutjïëthe moï ni lää wïïï kanyo jootï nyïïmeru, ni beege mana riek ki mana thiinh. Ge cïba cïbö jïrï kaamar nyïïï, 'ba paa ki køør luumma tuuda ki ïïni.

⁶² Aani luumma tuuda ki ïïni wëëga thur kare. Kanyøgønø ŋäyï ŋääö ni bee aani na Wuuö Jwøk.

⁶³ Køøre nø, noo wëënna ïïni ki japa reyø bëët na tïïyï, wïïï oparï ni lää wïïï, ni ba japï dhiï këët kiper lään wïc marï.› » Luummögø caana Kwäärö Wuuö Jwøki.