Edhikiel 15 - Wëël Jwøk

Kanya Pääny Jerucalem Ki Jaath Mar Omøk Mo Ba Kunynyi

¹ Køøre dwør Wuuö Jwøk aö bääta ni kööe,

² ni «?Wär dhaanhø, jaath mar omøk beere nidïï ni kaala bäädi mo jenni bëët mo wø en dï jenni mo paap?

³ ?Jaath mare løny ki man kunynye ki man tïïc gïrpiny ki gø? ?Wala jaath mare løny ki man tïï na jaath man rääö nyeŋ øtø nee jammi lïër dëëre?

⁴ 'Ba kunynyö mare keere beeye ki man äp maac ki gø; 'ba kanyo waaŋ dhi jaathi, ni dëëre bäre ogut maaci, ?køøre nø, eni cäŋa kunynyö këët kiper gïn mør?

⁵ Ni näk mo kanya poode na paya ba løny ki man tïï na gïrpiny, ?a kanyo nø waaŋe nø, no onø tïmö na belø, olønye nidïï këët ki man tïï na gïrpiny mo kunynyö?»

⁶ Kiper manøgønø, man beeye luumma cäŋ Kwäärö Wuuö Jwøki caannø, ena köö, ni «Kaawat mana cïba jaath mar omøk dï jenni mo paap na gïn äp maac ki gø, aani thuwø jø Jerucalem tïïa tïïö na ennø nø.

⁷ Wïïa këëlla rege ni jääla geni. Këël mo geno ö wøk ki yi maac, ge poot thöör maaci thöörö. 'Ba kanyo këëlla wïïa rege noo jääla geni, ŋäyu ŋääö ni bee aani na Wuuö Jwøk.

⁸ Aani ŋöömö marge tïïa tïïö ni bäŋ gïrpiny yie. Kiper gena jiy mo bëëtö marge patha kare.» Luummögø caana Kwäärö Wuuö Jwøki.