Edhikiel 14 - Wëël Jwøk

Luum Ajäla Man Wø Jääl Jø Wø Wøør Juu Møøk

¹ Køøre jø døøk Icriel møøk gena ö baŋa ni pïge piny nyïma.

² Kanyøgø dwør Wuuö Jwøk aput ö bääta ni kööe,

³ ni «Wär dhaanhø, jiy moi cwïnyge acïpge køør kït gïï wø lam ni cïpge nyïmge ki gïï mo reyø mo cwanynya tiel mo wëëga ge pädhö. ?Aŋø, pïëc moge mo wø pëënyge aani ki ge løny ki man dwøga gø jïge këët?

⁴ Kiper manøgønø, cään geni, ni kööï jïge ni man beeye luumma caan Kwäärö Wuuö Jwøki, ena köö, ni ‹Kany wø näk da ŋat Icriel mo cwïnye ee cïp køør kït gïï wø lam, ni cïp nyïme ki gïn mo raac mo cwanynya tiel mo wëëga gø pädhö, ni ö baŋ nyikuŋ Jwøk kiper gïn mo di pëënynyö, aani ki dëëra, a na Wuuö Jwøk, luumme dwøga dwøgø ki yi jöö mo puta rømø ki kït gïïa thööth ni wø lame.

⁵ Gïnögø tïïa tïïö naa duua cwïny jø Icriel baŋa, ni beege jø Icriel na wec aani kiper kït gïï wø lamge.›

⁶ «Kiper manøgønø, caanï jï jø Icriel ni man beeye luumma caan Kwäärö Wuuö Jwøki, ena köö, ni ‹Løgu cwïnynyu ni weyu kït gïï wø lammu, ni kälu wïthu wøk ki bäät gïïa näk yia raac ki ge bëët ni wø tïïyu.

⁷ « ‹Kany wø näk da ŋat Icriel wala ŋat ma wëëllö mo ena Icriel mo dëëre ee jädhö ki aani ni këël cwïnye køør kït gïï wø lam, ni cïp nyïme ki gïï mo reyø mo cwanynya tiel mo wëëga gø pädhö, ni ci baŋ nyikuŋ Jwøk kuna pëëny aani, aani ki dëëra, a na Wuuö Jwøk, luumme løøa løø jïre.

⁸ Aani wïïa këëlla ri teeŋ ŋatøgø ni tïïa gø na ŋïï mo jøw ŋääta ree, ni ŋula gø wøk dï jiy 'moa. Køøre nø ŋäyu ŋääö ni bee aani na Wuuö Jwøk.

⁹ « ‹'Ba ni näk mo nyikuŋ Jwøk ocøøgø ni tïme ni cara luup tööt, bee a na Wuuö Jwøk na wëëk gø cøøgø. Aani cera tïŋa maal bääte ni jääla gø ni raanynya gø yïthakic jiya ma jø Icriel.

¹⁰ Geni, ge jïtö ka ajäla ki køør raay moge, ni beeye ŋata cäänö ki nyeŋŋa ni ena nyikuŋ Jwøk ge ki ŋata pëëny gø bëët,

¹¹ kiper nee jø Icriel tïmge ni wïthge ba løøge wøk ki aani këët, ni dëëtge ba raanyge keerge këët ki raay moge bëët. 'Ba geno bëëdö na jiy 'moa ni bëëda ni aana Jwøk marge.› » Luummögø caana Kwäärö Wuuö Jwøki.

¹² Køøre dwør Wuuö Jwøk aö bääta ni kööe,

¹³ ni «Wär dhaanhø, ni näk mo da paac mo tïïö ki raay dëëra ki køør mano bëët jiye ki bëëtö mo patha kare, ni tïŋa cera maal bäätge ni jääla ge, ni ŋøla jöör cam marge, ni jääŋŋa käc bäätge ni nääa geni ki lääc paac moge,

¹⁴ këël jøøi na adäk ii doo nut rege, ni beege Nöa, ki Daniel, ki Jööp, bee jøøgø keerge noo piem ki køør bëëtö marge na beer.» Manøgø beeye dwøl mana caan Kwäärö Wuuö Jwøki.

¹⁵ «'Ba ni näk mo lääc paap yaa jääŋŋö yi ŋöömö marge, ni ö obwöre moge ni thööri ya lääyi moøgø, ni dööŋ ŋöömö keere ni bäŋ gïrpiny yie, ni put tïmö ni bäŋ ŋat ŋuti ki yie kiper lääy,

¹⁶ a na Kwäärö Wuuö Jwøk, a caana gø, ni kaawat man bëëda naa kwøw en, këël jøø na adäk yøø doo nut dïge, ba løny jïge ki man piemge wäätge wala nyïïge; 'ba beege keerge noo piem. 'Ba ŋöömö marge dööŋ ni bäŋ gïrpiny yie.

¹⁷ «'Ba ni näk mo opëëllö yaa jääŋŋö yi ŋöömö marge ni kööa, ni ‹Beerra man ö opëëllö ni wïr dï ŋöömö marge bäre,› ni ööa ni nääa geni ki lääy moge,

¹⁸ a na Kwäärö Wuuö Jwøk, a caana gø, ni kaawat man bëëda naa kwøw en, këël jøø na adäk yøø doo nut dïge, ba løny jïge ki man piemge wäätge wala nyïïge. 'Ba beege keerge noo piem.

¹⁹ «'Ba ni näk mo täw yaa jääŋŋö yi ŋöömö marge, ni kønynya remø marge piny ki køør wëër mara mano jääŋŋa bäätge, ni nääa geni ki lääy moge,

²⁰ a na Kwäärö Wuuö Jwøk, a caana gø, ni kaawat man bëëda naa kwøw en, këël Nöa, ki Daniel, ki Jööp doo nut dïge, ba løny jï ŋati man nø dëëtge ki man piem wääde wala nyaare. 'Ba beege ki dëëtge keerge noo piem ki køør bëëtö marge na beer.»

²¹ 'Ba luumma caan Kwäärö Wuuö Jwøki bee en, ena köö, na «A teeŋ ränynyö mo nyïëdi noo tägi kanyo jääŋŋa ajäle aŋween 'moa mo reyø bäät jø Jerucalem, ni beege opëëllö, ki käc, ki lääc paap, ki täw, nee ge nääa ki lääc paac moge!

²² 'Ba poot da obwöc cwøw ko obwöc mään mo dööŋ ni kwøw mo käla wøk ki yie. Geni, geno ö baŋu; 'ba kanyo jootu bëëtö marge, ki tïïe moge, uuno jïti ki cïp cwïny piny kiper gïïa leth bëët na kïtha bäätge, ge na jø Jerucalem.

²³ Uuni, cwïnynyu cïbu piny ka ajäla mana pïï bäätge kanyo jootu bëëtö marge ki tïïe moge, kiper ŋäyu ŋääö ni gïna tïïa dëëtge paa gïrpiny jaak mo bäŋ tiere. Luummögø caana aani, a na Kwäärö Wuuö Jwøk.»