Edhera 6 - Wëël Jwøk

Dwøl Mana Käl Nyeya Ma Dariöci Wøk

¹ 'Ba nyeya ma Dariöc acïpö ki dwøl, ni many yïth weeli kar kän mana en Babiløn.

² 'Ba wëël luubö manøgø aput joot kar gwøk røk yi pääny mana cwøl ni Ekbatana na en Mëdön; ni luubö mana no ogöör piny yie beeye en:

³ «Kanya tïme na cwiir mana dïkwøŋ mana beet Kiröci nyeny Parca Babiløn, eni na Kiröc ena cïpö ki dwøl ni kööe, ni ‹Øt Jwøk man ni en Jerucalem en, beerra man cäŋi geerrø na kany wø cïp olämme yie; ni caam tiere ni teek, ni tïïc bär mare mar maal na gööye ma pïërabïciel, ni tïïc dööŋ yie na gööye ma pïërabïciel.

⁴ Ni geer ka kïte mo døøŋŋø, ni kany wø cäämmö ki kïte ma tëëŋŋe adäk, bäät gø di pëënhnhö ko opämi. 'Ba gwel moo geer øtø ki ge tïme ni käl wøk ka ri gwet nyeya.

⁵ Ni ö jap paac moa no otïïö ki warkey ki gwel-bïrö, na näk mo Øt Jwøk, ni dwøgi ni kïthi kwöra bëëtge yïthge Øt Jwøk Jerucalem, nee tïme ni ge bëëdö Øt Jwøk, ni beege jap paac moa no okäl Nabukedenecörri wøk ki Øt Jwøk Jerucalem, ni kïth ge Babiløn.›

⁶ «'Ba ennø, ï na Tatenay en, ï na ŋat köör mana dwøŋ mar paac mana cwøl ni Løø Naam Løøga, ki ï na Cetar-Bödhnay, ki jø kööre mo wø tïïu ki geni na aciel, na en paac mana cwøl ni Løø Naam Løøga, tïïyu karu ni bäär ki Øt Jwøk manøgø.

⁷ Wiiu tïï Øt Jwøk kare, nee kwääc tïïc ki jø døøŋŋø mo jø Juuth nee Øt Jwøk cäŋge geer wï gø.

⁸ «'Ba aani, dwøl man cïba kiper gïno tïïyu jï jø døøŋŋø mo jø Juuth moøgø moo cäŋ Øt Jwøk manøgø geerrø beeye en: Gwel bëët moo tïïc Øt Jwøk ki ge wär tïme ni coolla jï jø døøŋŋø moøgø, nee tïïc ba cuŋŋe, ni käl wøk ka ri gwet akwöma moa jwäk baŋ jø wø bëëdö paac mana cwøl ni Løø Naam Løøga.

⁹ 'Ba jammi bëët moo manynyi, ni beege nyïï rwädhe, ki nyöök rööm, ki nyïï rööm moo cïp no olämme mo wø waaŋ bäre jï Jwø maal, ki beel, ka acäbö, ki køøŋø, ki maar rööny, moo many dïlämme moa en Jerucalem, wär cïp jïge ki yïth nïne bëët ni ba kääŋi,

¹⁰ nee tïme ni ge cïpa olämme mo yi Jwø maal met ki ge, nee ge lämge kiper kwøw mara, a na nyeya, ki wääta.

¹¹ «Aani, a cäŋa dwøl man cïpö, ni ŋato kaal dwøl man, jaath cugö käla wøk ki ri øde ni cwøbi ki gø, ni tïŋi maal ni lïëri, ni nyaa øde piny ni tïïi na wïthur kiper gïna tïïe.

¹² Beerra man ö Jwøki, eni na tïïc nyeŋŋe nee bëëde ni ŋäc kaace, ni raany ŋat ma nyeya wala wï jur mo päära gø ki man wiil dwøl man, nee Øt Jwøk manø en Jerucalem enø raanynye. «Beeye aani ni Dariöc en na cïp dwøl man. Beerra man kïthi bäät tïïc ki kare bäre.»

Kanya Thöör Øt Jwøk Ki Geer Ni Cïbi Kur Keere

¹³ 'Ba Tatenay ŋat köör mana dwøŋ mar paac mana cwøl ni Løø Naam Løøga, ki Cetar-Bödhnay, ki jø wø tïïge ki geni na aciel, dwøl mana cem nyeya ma Dariöc akïthge bäät tïïc ki kare bäre.

¹⁴ Kanyøgø jø døøŋŋø mo jø Juuth geer marge aput thur kare ki køør dwør Jwøk mana køp nyikuŋ Jwøki ma Agëë ki nyikuŋ Jwøk ma Dhekaraya nyikwaar Idö. 'Ba øtø athöörge ki geer ki køør dwør Jwø Icriel, ki dööt nyec Parca, ni beeye Kiröc ki Dariöc ki Arthëkcic.

¹⁵ 'Ba Øt Jwøk manøgø athum ki geer ni nïr dwääy adäk, ni beeye dwääna cwøl na Adar, ri bïcier cwiiri moa beet nyeya ma Dariöc bäät nyec.

¹⁶ Kanyøgø jø Icriel, ni beege dïlämme, ki jø tuuŋ Libay, ki jiy møga moa mak ki tøŋ moa duuö, Øt Jwøk manøgø acïpge kur keere na mar Jwøk ni yïthge met.

¹⁷ 'Ba olämme moa cïpge kiper nee Øt Jwøk manøgø cïp kur keere na mar Jwøk, beege rwädhe ma dïpa, ki nyöök rööm ma dïpe ariiø, ki nyïï rööm ma dïpe aŋween. Ni cïpge ki nyöök atëëe apaar kurriiø no olämme mo wø cïp kiper raay mo jø Icriel bëët, ni kwäänge opäärö ki kwään wïth tuŋi mo jø Icriel.

¹⁸ Køøre geni dïlämme apääŋge na dhøgi, ni pääŋge jø tuuŋ Libay na dhøgi kiper tïï Øt Jwøk na en Jerucalem, ki køør mana no ogöörö yi wëël Modhe.

Kanya Wøør Cäŋ Cäŋa Pööth Thøøe Yie

¹⁹ 'Ba kanya tïm nïr dwääy mana dïkwøŋ na apaar kurŋween, jøøa mak ki tøŋ moa duuö, cäŋ Cäŋa Pööth Thøøe Yie awøørge.

²⁰ Kiper dïlämme ki jø tuuŋ Libay dëëtge ege nø døøc mo waany na aciel, ni ge bëët, ge bëëdö ni ge waany. Køøre jø tuuŋ Libay nyïï dïëk mo cäŋ Cäŋa Pööth Thøøe Yie aŋaalge kiper jøøa mak ki tøŋ bëët moa duuö, kiper tuuŋge ma dïlämme, këël kiper dëëtge.

²¹ 'Ba jø Icriel moa mak ki tøŋ moa duuö, cam manøgø acamge na aciel ki jiy bëët moa løø rege baŋ Wuuö Jwøk, Jwø Icriel, na näk dëëtge ege käl wøk ki røk wïth juurre, jøøa dëëtge ba waany na en yi paac.

²² Ni wøørge Ajwöma Mar Møga Näk Ree Bäŋ Thømmø ki nïne abïriiø ni yïthge met, kiper yïthge anø døøc Wuuö Jwøki mo met, ni nø løø cwïny nyeny Aciria baŋge, nee dëëtge tïïe nee nigereem ki man tïïcge tïïe mo Øt Jwøk, Jwø Icriel.