Edhera 5 - Wëël Jwøk

Kanya Cäŋ Tïïc Mar Øt Jwøk Tägö

¹ 'Ba kar kaaca, nyikuŋ Jwøk ma Agëë ki nyikuŋ Jwøk ma Dhekaraya nyikwaar Idö dwør Jwøk akøpge jï jø Juuth moa en Jerucalem ki dï Juuda bäre, ki nyeŋ Jwø Icriel na bëënge.

² Køøre Dherubabel o Celatiyal ki Jøcua wär Jöcëdëk gena ö maal ni täkge ki man cäŋge Øt Jwøk geerrø Jerucalem; ni ö nyïïkuk Jwøki moøgø ni bëëtge ni køønynya geni ka acaare.

Kanya ö Tatenay Na Piem Luum Geer Øt Jwøk

³ 'Ba kar kaaca, Tatenay na bëëdö na kwäärö mana dwøŋ mar paac mana cwøl ni Løø Naam Løøga, ki Cetar-Bödhnay, ki jø wø tïïge ki geni na aciel, gena ö baŋge ni pëënyge geni, na «?Aŋa na cïpö ki dwøl jïïu ni cäŋu Øt Jwøk man geerrø ni thööru dëëre ki tïïc en?»

⁴ Ni pëëge thuwø, ni «?Nyeŋ jiy mo geer øtø man en aŋaani?»

⁵ 'Ba Jwøk mar jø Juuth waŋe atïmö ni ena bäät jø døøŋŋø mo jø Juuth, ni ö jøøgø ni kärge øtø mänö ki geer këël mana jääkge baŋ Dariöc ki dwøl, nee dee wëëlö mo duuö mo cäänö kaper ødøgø.

⁶ 'Ba man beeye wëëlö mana jääŋŋi baŋ nyeya ma Dariöc, ni jääŋŋa Tatenay na bëëdö na kwäärö mana dwøŋ mar paac mana cwøl ni Løø Naam Løøga, ki Cetar-Bödhnay, ki jø kööre mo wø tïïge ki geni na aciel, na en paac mana cwøl ni Løø Naam Løøga.

⁷ 'Ba wëëlö mana jääŋge baŋe ogöörö na ennønø, ni «Ï na nyeya ma Dariöc, bëëdï ki bëët-mëër ki paarï bäre.

⁸ «Ennø, beerra man ŋäyï gø, ï na nyeya, ni waana ci Juuda kuna ciwa øt Jwøa dwøŋ, man geer en ki kïte moa døøŋŋø, ni dëër øtø tïïc ni bäät kïte di pëënhnhö ko opämi; ni tïïcge ni ege gwøø døc, ni thura kare jïge.

⁹ «Køøre jø døøŋŋø moøke apëënywa ni köwa jïge, na ‹?Aŋa na cïpö ki dwøl jïïu ni cäŋu Øt Jwøk man geerrø ni thööru dëëre ki tïïc en?›

¹⁰ Waani thuwø nyeŋ jøøa näk wïthge apëënywa nee göörwa piny, kiper nee caanwa jïrï.

¹¹ «'Ba aløkge jïwa ni köge, «ni ‹Waani, waana jic Jwø maal ki piny, ni ennø, wa cäŋa Øt Jwøk geerrø mana kwøŋ geer cøøn køør cwiiri mo thööth mo opöödhö, ni beeye Øt Jwøk mana geer nyeny Icriel marwa na dwøŋ, na thööre ki geer.

¹² 'Ba kiper mana ö kwäcwa na tïïcge Jwø maal nee goote, eni gena cïp cer Nabukedenecör nyeny Babiløn nyï Kaldia. Køøre Nabukedenecör Øt Jwøk man araanynye ni kïth jiy Babiløn.

¹³ « ‹'Ba kanya tïme na cwiir mana dïkwøŋ mana ö Kiröci na tïme na nyeny Babiløn yie, eni na nyeya ma Kiröc ena cïpö ki dwøl nee Øt Jwøk man cäŋ geerrø.

¹⁴ Eni thuwø jap paac moa no otïïö ki warkey ki gwel-bïrö na näk mo Øt Jwøk na no 'okäl Nabukedenecörri wøk ki yi Øt Jwøk Jerucalem, ni kïth ge øt jwøe Babiløn, japøgø alwør nyeya ma Kiröc øt jwø Nabukedenecör na en Babiløn, ni cïp ge jï dhaanhø mo cwøl ni Cëëcabacar mo ee røønyø na kwääc tïïc.

¹⁵ Ni caan gø jïgø, ni «Lwør japi, ni ciï ni kanï ge yi Øt Jwøk Jerucalem, ni ö Øt Jwøki ni cäŋi geer wïïe.»

¹⁶ Køøre Cëëcabacar aöö ni täk tier Øt Jwøk ki caam ki kïte yi Jerucalem; 'ba ki mana täge kar kaaca nø këël ennø, øtø bëëdö ni di geerø, ni poot kär thum ki geer en.›

¹⁷ «'Ba ennø, ni näk beeye mana manynyï, ï na nyeya, beerra man many yïth weeli kar kän marï man ni en Babiløn kaagø enø, ki man näk mo da dwøl mo ocïp nyeya ma Kiröci ni Øt Jwøk man cäŋ geerrø Jerucalem. Køøre luubö mano ŋølï kiper luubö man wär jääŋŋï baŋwa.»