Edhera 4 - Wëël Jwøk

Kanya Piem Geer Øt Jwøk

¹ 'Ba kanya ö jøøa män ki jø Juuda ki jø Benjamen na wïnyge gø ni jø Juuda ki jø Benjamen, moa no omaa ki tøŋ na duuö, ge gëëdö ki øtø jï Wuuö Jwøk, Jwø Icriel,

² gena ö baŋ Dherubabel ki dïbwöthe mo wïth tuŋi ni köge, ni «Beerra man gëëdø ki uuni na aciel, kiper waani, wa manynya Jwøk maru ni wa caala uuni; ni wa bëëdö ni wa cïpö ko olämme jïre ki mana täge ki ri nïne moa beet Ëcaradön nyeny jø Aciria na käl waani kany.»

³ 'Ba Dherubabel, ki Jøcua, ki dïbwöthe mo wïth tuŋi mo jø Icriel gena köö jïge, ni «Bäŋ gïn mo ø rööpa ree ki uuni ki gø ri geer øtø jï Jwøk marwa; 'ba wa ki dëëtwa keerwa wa gëëdö ki øtø jï Wuuö Jwøk, Jwø Icriel, kaawat mana ö Kiröci nyeny Parca na nø kööm waani.»

⁴ Køøre juurre moa bëëdö yi ŋöömmögø cwïny jø Juuda araanyge, ni tïïcge geni nee lwäcge ki man geerge øtø,

⁵ ni cïpge ki gwel ki piny jï jø wø cïpi ka acaara jï kwäärö kiper nee acaac thöör tïï Øt Jwøk mar jø Juuda ba thur kare, ni gïnögø wø bëëdö ni tïïcge tïïö cooth ki mana täge ki ri nïne bëët moa beet Kiröci ni ena nyeny jø Parca, këël mana pïïe ri rööny mar Dariöc nyeny Parca.

Kanya Piem Jerucalem Ki Man Ba Cäŋi Geerrø

⁶ 'Ba kanya ö Ayacewëëröc na røønyi na nyeya, kanya täge ki tïïc ennø, da jiy maa göön baŋe ki wëël løøk kiper jø Juuth moa bëëdö Jerucalem ki dï Juuda bäre.

⁷ 'Ba kanya tïme na ri nïr Arthëkcic nyeny Parca, Biclam, ki Mithiredat, ki Thabël, ki jø wø tïïge ki geni na aciel, gena göön baŋ Arthëkcic ki wëëlö, ni wëëlö manøgø göör ka dha Aram ni kwaan ni cäŋ ka løgø.

⁸ 'Ba nyen mo cwøl ni Reum mo jïre da köör, ki Cimcay, ŋat wø göör luup akwöma piny, gena göödö thuwø ki wëëlö bäät jø Jerucalem jï nyeya ma Arthëkcic ma ennønø:

⁹ «Wëëlö man gööra aani, a na kwäärö ma Reum, ki Cimcay ŋat wø göör luup akwöma piny, ki jø wø tïïwa ki geni na aciel, ni beege dïŋut luup, ki kwääri moa kwörge therø, ki jø kööre, ki jø wø gööt piny, ni beege jøøa kwøŋ bëëdö Ërëk, ki Babiløn, ki Cuca na en yi ŋööm Ilam,

¹⁰ ki wïth juurre møga bëët moa käl Acnaperri, nyenynya teek na no owøørø, wïth juuya käle ki mïëcge ni kïth ge yïth päänye mo Cameria, ki yi paac bäre mana cwøl ni Løø Naam Upareeti Løøga.»

¹¹ 'Ba luubö mana göörge yi wëëlö mana jääŋge baŋe beeye en, gena köö, ni «Ï na nyeya ma Arthëkcic, wëëlö man käla baŋwa, wa na jiyï na en paac mana cwøl ni Løø Naam Upareeti Løøga.

¹² «Ennø, beerra man ŋäyï gø, ï na nyeya, ni jø Juuth moa öö ki baŋï kunögø gena ö baŋwa Jerucalem; ni ennø, ge cäŋa Jerucalem geerrø, päänya raac ni wø gëëmö. Ge cäŋa kiir mar gø geerrø ennø, ni ge laya gø nee thume.

¹³ 'Ba ennø, beerra man ŋäyï gø, ï na nyeya, ni ni näk mo pääny man ocäŋ geerrø, ni ö kiirri mare ni thume ki geer, geni ge ba cudö ka ajwäk këët, ni ö ajwäki ni ränynye, ni tïm jap akwöma ni nøk.

¹⁴ 'Ba ennø, kiper mana näk mo wa tïnynya bura marï, ni ba løny jïwa ki man jootwa nyeya no opäädö, waana jääŋ baŋï ni wa caana gø jïrï, ï na nyeya en,

¹⁵ nee yïth weeli moa no ogöör kwäyï manynyi. Køøre jootï joodø yïth weeli moa no ogöörö, ni ŋäyï gø ni päänyögø beeye pääny ma pääny ageem mo räänyö ki nyeye ki mïëri, ni beeye kanya wara ö ageeme wø tuudi yie yïth nïne moa pöödhö; ni beeye tiere gø na raany pääny manøgø.

¹⁶ Ennø, wa caana gø jïrï, ï na nyeya en, nee ŋäyï ni ni näk mo pääny man ocäŋ geerrø, ni ö kiirri mare ni thume ki geer, gïno tägi, ï puta tïmö ni bäŋ kurï yi paac mana cwøl ni Løø Naam Upareeti Løøga.»

¹⁷ Køøre aløk nyeya ki yi wëëlö ni kööe, na «A määtha ïïni, ï na kwäärö ma Reum, u ki Cimcay ŋat wø göör luup akwöma piny, ki jø wø tïïu ki geni na aciel mo wø bëëdö Cameria ki moa en yïth mïëri møga moa en paac mana cwøl ni Løø Naam Upareeti Løøga.

¹⁸ «Ennø, wëëlö mana jääŋŋu baŋa anø løk ni kwaani jïra.

¹⁹ Ni nø cïba dwøl nee tier luummögø manynyi, ni nø joodi ni pääny manøgø obëëdö ni gëëmö ki nyeye moa kwøŋ bëëdö yïth nïne moa pöödhö, na ageeme ki ööny maal bäät nyeye tïïca yie.

²⁰ Ni da nyeye mo teek kar kaace mo Jerucalem obëëdö ceŋge, këël paac bäre mana cwøl ni Løø Naam Upareeti Løøga, ni bëët ajwäki ni jwäka jïge.

²¹ 'Ba ennø, kännu wøk ki ciik nee jøøgø tïïc wecge, nee pääny ba cäŋ geerø këët, këël kanyo dee dwøl mo caana.

²² Putu luummi kïth bäät tïïc, nee bäŋe gïn mo raany akwöma.»

²³ 'Ba kanya ö wëëlö mar nyeya ma Arthëkcic na kwaani jï Reum, ki Cimcay ŋat wø göör luup akwöma piny, ki jø wø tïïge ki geni na aciel, gena put ci Jerucalem baŋ jø Juuth, ni mänge geni ki teek mar jø leny nee pääny ba geerge.

²⁴ 'Ba tïïc mar geer Øt Jwøk na en Jerucalem acuŋŋö, ni bëëde no ocuŋŋö këël mana pïïe ri riet cwiiri moa beet Dariöci ni ena nyeya Parca.