Dut Pwøc 98_1 - Wëël Jwøk

Duut Mo Köömma Gïïa En Bäät Piny Bëët Nee Jwøk Pwøcge

¹ Wärru jï Wuuö Jwøk ki duut mo nyään, kiper ena tïïö ki gïï mo rëëma ec; ki køør teek bade na en kur keere, ena käädhö.

² Wuuö Jwøk pïëm mare man wø piem jiy ki gø anyoodhe nee ŋäc, ni nyooth bëënynyö mare jï wïth juurre.

³ Wïïe kär wïl ki man nyooth mëër mare ni wø ba jøøl ka adïëri mare jï jø dhi øt Icriel; ni ö pinynyi bäre ni joot pïëm mar Jwøk marø.

⁴ U na jø bäät piny bëët, kwöŋŋu jï Wuuö Jwøk ki met ec; putu dut pwøc jøl døc ni wärru ni yïthu met.

⁵ Wärru ki dut pwøc jï Wuuö Jwøk nou pöödö ki thøme, ni wärru ni pwötu ni you jiiŋŋø ni met.

⁶ Kwöŋŋu ki met ec nyïm Wuuö Jwøk, eni na nyeya, ni koothu dipiire ki tuk lääy.

⁷ Beerra man lwör naama dwøŋŋi ni kanynye, ki gïïa en yie bëët, këël piny ki jø wø bëëdö yie bëët.

⁸ Beerra man ö nämmi ni mïn yïthge, ni ö kïte ni wärge na aciel ki dut met ec nyïm Wuuö Jwøk,

⁹ kiper eni cäädhö jöö ni ööa kuna ŋøl luup mo piny. Eni luup jø piny di ŋølø na kare, ni ŋøl luup jiy ni tiir.