Dut Pwøc 96_1 - Wëël Jwøk

Duut Mo Pwøca Wuuö Jwøk Ni Wø Ŋøl Luup Na Adïëri

¹ Wärru jï Wuuö Jwøk ki duut mo nyään; wärru jï Wuuö Jwøk, u na jø bäät piny bëët.

² Wärru jï Wuuö Jwøk, ni pwøyu eni, ni caannu luumma met mar køny mare ki yïth nïne bëët.

³ Køpu ajieme jï wïth juurre bëët, ni køpu tïïe moe moa näk rëëma ec jï jiy bëët.

⁴ Kiper Wuuö Jwøk dwøŋ, no orømø ki pwøc døc, eni di lwäärö ni kaala juu bëët.

⁵ Kiper juu bëët mo wïth juurre beege juu mo oballe jaak, 'ba Wuuö Jwøk bee eni na cwääc maal.

⁶ Wödö ka ajiem joota baŋe; ni ö teeki mare ki beenynye ni joodi øt lam mare.

⁷ Jiemmu Wuuö Jwøk, u na wïth tuŋi bëët mo bäät piny bäre; jiemmu Wuuö Jwøk ki køør ajiem mare ki teek mare.

⁸ Jiemmu Wuuö Jwøk ka ajiem mo orømø ki nyeŋŋe; kännu ki muuce, ni ööu dï kal mar øt lam mare.

⁹ U jø bäät piny bëët, wøørru Wuuö Jwøk kiper eni ena kur keere, ni ööu nyïme ni dëëtu kwanynyi.

¹⁰ Caannu jï wïth juurre bëët, ni kööu, ni «Wuuö Jwøk bëëdö na wïth jammi bëët. Piny acïp kare ni teek, ni ba løny ki daak. Wuuö Jwøk luup mo jiy bëët di ŋølø ni tiir.»

¹¹ Beerra man mïn yïth gïïa en maalli, ni ö gïïa en bäät pinynyi ni kanyge; beerra man lwör naama dwøŋŋi ni kanynye, ki gïïa en yie bëët.

¹² Beerra man ö pwöthi ni kanyge, ki gïïa en yïthge bëët. 'Ba kar kaace thuwø, jer paap bëët yïthge omïnni ni wärge ki dudi nyïm Wuuö Jwøk,

¹³ kiper eni cäädha jöö, ni ööa kuna ŋøl luup mo piny. Eni luup jø piny di ŋølø na kare, ni ŋøl mo jiy bëët ki køør adïëri mare.