Dut Pwøc 95_1 - Wëël Jwøk

Duut Mo Köömma Jiy Nee Jwøk Pwøcge

¹ Ööu nøø wärø ki dudi jï Wuuö Jwøk ni yïthø met, ni kwöŋŋø ni yïthø met jïre, eni na teek ni wø piem øøni.

² Beerra man cøø nyïme ni ø pwøya eni, ni wärø dut pwøc jïre ni döötø ena maal.

³ Kiper Wuuö Jwøk beeye Jwøk mana dwøŋ, ni ena nyeya mana dwøŋ mo kaala juu bëët.

⁴ Ki mana täge ki tiet ŋøøm kuya, këël mana këët wïth kïte, ena cere.

⁵ Naama dwøŋ beeye mare, kiper bee eni na cwääc gø, ni kwöra no otal tïïya eni ki cere.

⁶ Ööu ni kuullø wïthø piny ni wøørø eni, ni këëlø cøŋŋø piny nyïme, eni na Wuuö Jwøk na cwääc øøni.

⁷ Kiper bee eni na Jwøk marø, ni øøna jiye ni wø kwaaye kaamar pïïth dïëk moe; øøna dïëk moe møn, ni ø ena cere. Dïcäŋi, beerra man wïnynyu dwøre mana caane na kööe,

⁸ ni «Kär cwïnynyu døøyu mo teek kaawat mana tïïc kwäyu Meriba, ni beeye gïna tïïcge dïcäŋöca Macadï paap,

⁹ kanya ö kwäyu na päänyge aani. Aana päänyge, këël na bëëtge ni tïïe 'moa ege joodø.

¹⁰ Aana bëëdö ni cwïnya oränynyö ki beenhnhøce ki cwiiri ma pïëraŋween, ni kööa, ni ‹Gena jiy mo cwïnyge bëënna bääö jaak, ni jöör bëëtö mara poot ba kwanyge.›

¹¹ Kiper manøgønø, aana kööŋ kanya wëëra, ni kööa, ni ‹Jwöm mana daa cïbö jïge ba jootge na bäre bäre.› »