Dut Pwøc 94_1 - Wëël Jwøk

Duut Mo Kwaca Jwøk Nee Kwör Jiye Coole

¹ Wui Wuuö Jwøk, ï na Jwø wø cool kwöri, ï na Jwø wø cool kwöri, rienyï.

² Ö maal, ï ni wø ŋøl luup mo bäät piny; ni cunnï jø atöör ki moo rømø ki gïïa bacge.

³ ?Wui Wuuö Jwøk, a këël kany mo nyïëdi nø noo bëët jøøa reyø ni yïthge met jaak?

⁴ Geni luumge päl, ni ge cara luup atöör, ni bëëtge ni ge jeemma dëëtge keerge, ge na jø raay bëët.

⁵ Wui Wuuö Jwøk, jiyï athielge piny, ni caange geni, ge na näk thöögï.

⁶ Määr thuunhnhi ki jøøa path wø 'näkge nääö; këël kïïe thuwø 'näkge nääö.

⁷ Ni ge wø köö, ni «Gïn ba nëëni jï Wuuö Jwøk, ni bäŋ gïn mo caare kipere, eni na Jwø Jeekap.»

⁸ U ni bäŋ wïdhi en, beerra man wïnynyu gø. ?Aŋø, tiet luup okwanynyu gø wäne, u na bøøre en?

⁹ ?Aŋø, eni na cïp ïdhi, eni ba wïnyö? ?A eni na cwääc nyeŋ, eni ba nëënö?

¹⁰ ?A eni ni wø kööm wïth juurre, u ba jwøe? Bee eni ni wø pwöny jiy nee jïtge ki leec wïc.

¹¹ Wuuö Jwøk acaac dhaanhø ŋääe, ni ŋääe na acaac dhaanhø caala jam dhøk jaak.

¹² Wui Wuuö Jwøk, gwïëth en jï ŋat wø köömmï, ni wø pwönynyï ki ciik moï,

¹³ niï cïba cwïnye piny yïth gïïa leth, këël kanyo koony buur ni ceka jøøa reyø.

¹⁴ Kiper Wuuö Jwøk jiye ba wiie; ni ba wete, ge na näk thööge.

¹⁵ Kiper luum ŋøl ocäŋ tïmö ni thïïŋ, ni ö jøøa cwïnyge thïïŋ bëët ni jïëcge gø.

¹⁶ ?Aŋa noo ö maal noo cwak aani ki jøøa reyø? ?Na aŋa noo cuŋŋi løøa noo gëëŋ aani ki jø wø tïïc gïï mo reyø?

¹⁷ Doo na Wuuö Jwøk kär bëëdö na dïkunyi mara, jwïëya doo laar tïmö ni ena kany mo bäŋ dwøl yie.

¹⁸ Wui Wuuö Jwøk, kanya cäda naa manynya pädhö, mëër marï ni wø ba jøøl aana jøle.

¹⁹ Kany wø tïm acaare 'moa ni thöönhnhö cwïnya, cwïnya wø døøyï mo met ki køør man wø cømï cwïnya.

²⁰ ?Aŋø, løny jï dïŋut luup moa reyø ki man dwätge ki ïïni, jø wø tïïc gïï mo reyø ki køør ciik mo wø kälge wøk?

²¹ Geni dhøkge wø dwalge dwalø bäät ŋat mo mare beer, ni ŋølge thøø bäät ŋat mo bäŋ gïn mo ee baaø.

²² 'Ba Wuuö Jwøk bëëdö na kar gwøk røk mara, ni bee eni na Jwøk mara na teek ni wø kana raa buute.

²³ Eni gïïa bacge odwøk wïthge, ni raany geni kiper gïïa reyø na tïïcge; Wuuö Jwøk, Jwøk marø, ge di raanynyø.