Dut Pwøc 86_1 - Wëël Jwøk

Duut Mo Kwaca Jwøk Kiper Køny

¹ Wui Wuuö Jwøk, cek ïthï ki kwac mara ni løgï gø, kiper aano caannø naa bëëdö naa can.

² Gwøk jwïëya, kiper cwïnya ena køørï. Wui, ï na Jwøk mara, køny dhaanhnhï ni wø ŋääth ïïni.

³ Wui Wuuö Jwøk, bëëdï ni cwïnyï bäth ki aani, a ni wø kwac ïïni cooth ki yïth nïne bëët.

⁴ Wui Wuuö Jwøk, døøc cwïny dhaanhnhï mo met, kiper a bëëdö na acaara mara bäre ena baŋï.

⁵ Wui Wuuö Jwøk, ïïna Jwøk mo beer, ni jiy wëënnï wëënnö; Mëër marï ni wø ba jøøl päl jï jø wø cøør nyeŋŋï.

⁶ Wui Wuuö Jwøk, cek ïthï ki lam mara, ni wïnynyï kwac man wø kwääa ki gø.

⁷ Kany wø ena yïth gïï mo leth, bee ï wø cwøla, kiper bee ï wø løk mara.

⁸ Wui Wuuö Jwøk, bäŋ Jwøk mo caala ïïni røk juu, ni bäŋ tïïe mo caala tïïe moa tïïyï.

⁹ Wui Wuuö Jwøk, wïth juurre moa cwääyï bëët oööi, ni wøørge ïïni, ni jiemge nyeŋŋï.

¹⁰ Kiper ï dwøŋ niï tïïö ki gïï mo rëëma ec, ni beeye ï na Jwøk keerï.

¹¹ Wui Wuuö Jwøk, pwöny aani ki jöör bëëtö marï, naa cäädha ki køør adïëri marï. Mooc aani ki cwïny aciel naa bëëda naa lwäära ïïni.

¹² Wui Wuuö Jwøk, ï na Jwøk mara, ï pwøa pwøø ki cwïnya bäre, ni bëëda naa jiema nyeŋŋï na bäre bäre.

¹³ Kiper mëër marï ni wø ba jøøl na nyoothï jïra dwøŋ; jwïëya amänï ki mana dee ci kar bëët jwïëc jøøa no othøw.

¹⁴ Wui Jwøk, jø okiera aö maal bääta, ni ö jø kwöri ni cacge jwïëya nee raanyge, jøøa näk bäŋ gïn caarge kiperï.

¹⁵ 'Ba ï na Wuuö Jwøk, ïïna Jwø wø yie bäth wø nyooth met ec mare jï jiy; ï ba laar wëër, ni mëër marï ni wø ba jøøl ka adïëri marï päl.

¹⁶ Luu riï baŋa ni nyoothï met ec marï jïra; cïp teek marï jï dhaanhnhï ni piemï aani, a na o dhaaŋ wø tïny ïïni.

¹⁷ Mooc a ki nyuudhi mo nyootha beenynyï, nee jøøa män ki aani nee wïthge lääge kanyo jootge gø naa iï kønyø, ni jïta ki cøm cwïny baŋï, ï na Wuuö Jwøk.