Dut Pwøc 78_1 - Wëël Jwøk

Duut Mo Lamma Jöö Mana Ö Jwøki Na Käär Jiye Ki Gø

¹ Wui jø powa, cegu ïthu, ni wïnynyu pwöc mara, ni këëllu ïthu piny ki luumma.

² Aani, gïïa tägö lama lamø jïïu, ni beege gïïa näk tietge okanø cøøn,

³ gïïa näk yøø wïnynyö na ŋääø, na no ocaan kwäyø jïïø.

⁴ Gïïögø ba døø mooŋø ki nyïïkwaayø; 'ba pwøc man wø pwøc Wuuö Jwøk ki gø døø caanø jï beenhnhe moo ööi, këël gïr teek mare ki tïïe moe na näk rëëma ec.

⁵ Wuuö Jwøk luumme acaane, ni cïp ciik moe jï jø Icriel, ni beege nyïïkwaac Jeekap, ni kööm kwäyø ki ge nee obwöre moge pwönyge ki ge,

⁶ nee ŋäc beenhnhe moo ööi, ni beege obwöre moo nywøl cään, nee läwge caan jï obwöre moge thuwø;

⁷ kiper nee ge bëëtge ni ge ŋäätha Jwøk, ni ge gwøga ciik moe, ni ba wïl wïthge ki tïïe moe;

⁸ nee ge ba tïmge kaamar kwäcge na wïnni na näk gena jø ageem, na näk cwïnyge ba en køør adïëri, na näk cwïnyge kär nieŋ køør Jwøk.

⁹ Jø Ipariem, na wara bëëde, gena jiy mo ŋäc leny ka athëëre, 'ba dïcäŋa këëtge gena riemmi.

¹⁰ Luumma tuut Jwøki ki geni kärge gwøø, ni kweerge ki man cääthge ki køør ciik moe,

¹¹ ni wïl wïthge ki tïïe moe, ki gïïa näk rëëma ec na nyoodhe jïge.

¹² Ena tïïö ki gïï mo rëëma ec nyïm kwäcge, yi pwöl Dhöän na en yi ŋööm Ijep.

¹³ Pï naama dwøŋ apääŋŋe, ni wëëk jiy pöödhö ki yie, ni tïïc pïï nee cuŋge ni tïmge kaamar ageela.

¹⁴ Gena bwødhe ki pöölö ki dïcäŋ, ni bwøth geni ki tac maac ki wäär.

¹⁵ Kïte moa en paap akaaŋŋe, nee jiye mooe ki pïï mo thööth mo caala pï naama dwøŋ.

¹⁶ Pïï atïïe nee kwönge wøk ki yi kïdi, ni wëëk ge kwödö kaamar pï naam.

¹⁷ 'Ba gena bëëdö ni ge poot tïïö ki raay dëëre, ni ge poot gëëmö dï paap ki eni na Jwøa Dwøŋ ni en Maal.

¹⁸ Jwøk apäänyge ki cwïnyge bäre, ni ge pëënynya cam mana lääŋge keere.

¹⁹ Gena cäänö dëër Jwøk, ni köge, na «?Aŋø, løny jï Jwøk ki man cïpe ki cam dï paap kany?

²⁰ Ka adïëri møn, kïdi agøøe, ni ö pïïyi wøk, ni tïm pïïyi ni kwödö; ?a møø nø, løny jïre thuwø ki man cïp gø, ni løny jïre thuwø ki man cïpe ki rïŋö jï jiye?»

²¹ 'Ba kanya ö Wuuö Jwøki na wïny gïnögø, ena wëër døc; ena wëër ki wëër mo dwøŋ ki jø Icriel, ni tïm wëërri mare ni liel kaamar maac dëëtge, ge na nyïïkwaac Jeekap,

²² kiper Jwøk kärge ŋäädhö, ni kärge pïëm man piem geni ki gø ŋäädhö.

²³ 'Ba eni maal aköömme, ni jap dhøk uudi mo gø,

²⁴ ni jääŋ møø mana cwøl ni meena bäätge kaamar køth nee camge, ni mooc ge ki cam mo käla maal.

²⁵ Ni ö jiyi ni camge muunni mo nyïïatwiet maal, ni beeye cam mana päl na jääŋ Jwøki jïge.

²⁶ Jam jï løø kur tuul-cäŋ atïïe nee kwönne ki maal, ni bwøth jam jï løø tier-piny ki teek mare,

²⁷ ni kööla lwaa wenyø bäätge na cam, ni päl kaamar tør, ni kwäänge caala nyeŋ akwöny deŋ näpa døøŋŋø,

²⁸ ni wëëk geni pänh dï twïër marge, kwör bëëte moge, këël deŋŋe bäre.

²⁹ Ni ö geni ni cämge ni jäŋge døc, kiper gïna lääŋge acïp Jwøki jïge.

³⁰ 'Ba kanya poode ni ge poot kär jøøm ki cam, ni ceŋge poot ena dhøkge,

³¹ wëëc Jwøk aput ö bäätge, ni 'näk jø møøk moa dëëtge teek rege, ni beege wøpe moa no ojierø dï Icriel.

³² 'Ba këël na bëëde ni gïïögø bëët otïïö, ge poot tïïö ki raay, ni kärge jïëy ki Jwøk, këël na bëëde ni gïïa näk rëëma ec moa tïïe ege joodø.

³³ Kiper manøgønø, nïr kwøw moge atïïe nee laarge pöödhö kaamar jam dhøk, ni tïm aŋuun cwiiri moge na ränynyö.

³⁴ 'Ba kanya ö Jwøki na 'näk geni, gena tïmö ni ge manynya eni, ni duuge baŋe ni ge caya eni døc,

³⁵ ni parge wïthge ni Jwøk beeye teek marge, ni bee eni na dwøŋ ni en maal na pïëmi marge.

³⁶ 'Ba ena cøøkge ki dhøkge jaak, ni ö lëëpge ni bëëtge ni cara tööt dëëre,

³⁷ ni bëëtge ni cwïnyge ba en køøre, ni kärge luubö mana tuude ki geni gwøø.

³⁸ 'Ba eni gïïa bacge awëënne ki køør bäth yie, ni käre geni raanynyø, ni kwier wëër ki kwöre mo thööth, ni käre wëër mare nyoodhø ki pälle bäre;

³⁹ kiper wïïe acaare ki man näk mo gena jiy jaak, ni ge caala jamø man wø pöödhi ni ba duui këët.

⁴⁰ A kwöre adïï na bëëtge ni ge gëëmö ki eni, ni moocge eni ki kïmmö dï paap.

⁴¹ Jwøk apäänyge kwöre mo thööth, ni cwaatge yi gø, eni na Jwø Icriel na en kur keere.

⁴² Wïthge awïl ki teek mare mana tïïe dïcäŋ mana käl geni wøk yie ceŋ jøøa thiel geni piny,

⁴³ kanya ööe na tïïc nyuuthe moe ki gïï mo rëëma ec yi pwöl Dhöän na en yi ŋööm Ijep;

⁴⁴ ni tïïc pï näm moge na remø, ni tïme ni bäŋ pïï mo maathge.

⁴⁵ Ena jääk bäätge ki lwaa lwaŋŋø mo cama geni, ko ogwäle mo raanynya poge.

⁴⁶ Ni wëëk beekge adïtwie nee camge, ni cïp gïïa puurge jï bäänyö.

⁴⁷ Ni raany omøki moge ki pey, ni raany olämmi moge ki köö.

⁴⁸ Pey awëëk päth bäät dhäk moge nee thøwge, ni ö pïïth lääc paac moge ni gøøyi ya køthi.

⁴⁹ Wëër mare na liel kaamar maac, ka ajäla mare, ki gïï mo leth ajääŋŋe bäätge ki ri nyïïatwiet maal mo wø räänyö.

⁵⁰ Øtjöör wëër mare ajabe, ni käre thøø mänö ki man pïïe bäätge, ni 'näk geni ki täw mo leth,

⁵¹ ni beege kaai bëët moa näk cwøw na en Ijep, na kwøŋ jø Ijepi nywøl yïth mïëc nyïïkwaac Kaam, na täkge nyöödö ki ge.

⁵² 'Ba eni jiye abwøth wøk kaamar rööm, ni gwøk geni dï paap kaamar pïïth rööm.

⁵³ Gena bwødhe ni ee gwøø ni tïmge ni ge ba lwäär, 'ba nyïïmän moge acam naama dwøŋŋi.

⁵⁴ Køøre jiye akäl yi ŋöömme na en kur keere, paana en bäät kïte na maae ki teek bade.

⁵⁵ Wïth juurre ariem wøk nyïm jiye, ni røm ŋøøpge ni pääŋ ge jïge ni tïme na moge, ni wëëk jiye ma wïth tuŋi mo jø Icriel bëëtö kwöra bëët jøøgø yïthge.

⁵⁶ 'Ba geni, gena gëëmö ki Jwøa Dwøŋ ni en Maal, ni ge päänynya gø, ni kärge ciik moe gwøø,

⁵⁷ ni ge bëëdö ni cwïnyge ba en køøre ni marge cwøk kaamar wëëkge, ni tïm bëëtö marge no okööm, ni caala atheerø mo ree ee täpö.

⁵⁸ Jwøk atïïcge nee goote ki køør kwör lam moa tïïcge bäät thuuri, ni wëëkge eni këëyö ki køør gïï lam moge moa tieŋge.

⁵⁹ Kanya ö Jwøki na joot gïïögø, ena put wëër, ni kwier jø Icriel,

⁶⁰ ni wec kar bëëtö mare na en Cëëlö, ni beeye oduŋkaara mana bëëde yie dï jiy.

⁶¹ Ni tïïc acanduk man wø nyooth luumma tuude ki jiy nee käl nyïïmänni, na näk beeye nyuudhi mar teek mare ka ajiem mare.

⁶² Ena wëër ki jiy moe, ni wëëk geni nyïïmän moge ni 'näk geni ko opëëllö.

⁶³ Wøpe moge athum ri leny, ni tïme ni bäŋ duut nywöm mo løøa bäät nyïïakuue moge.

⁶⁴ Ni ö dïlämme moge ni nääi ko opëëllö, ni dhäth määr thuunhnhi ki kïmmö.

⁶⁵ Køøre Wuuö Jwøk aö maal kaamar dhaanhø mo päya yïth niine, ni tïme kaamar dhaanhø mo teek mo twäädö ri køøŋø.

⁶⁶ Ni riem nyïïmän moe, ni lää wïthge na bäre bäre.

⁶⁷ Jø tuuŋ Ipariem, ni beege nyïïkwaac Jocep, akwiere, ni käre poge jierø na kar bëëtö mare.

⁶⁸ 'Ba beeye jø tuuŋ Juuda na jiere, ki Kïn Dhayan na mëëre ki gø na en poge;

⁶⁹ ni geer øt lam mare na en kur keere bäät gø na kany mo ojiemø, ni geer gø ni teek kaamar piny ni wø bëëdö na bäre bäre.

⁷⁰ Eni dhaanhnhe ma Deebit ajiere, ni käl wøk ka yi lwaaŋ dïëk.

⁷¹ Ena cwøl Jwøki kanya bëëde ni kwaaya rööm ki nyïïge moa näk dhøøth, nee tïme ni ena dïkwääy jï jiye ma jic Jeekap, ni beege jiye ma jø Icriel.

⁷² Ni ö Deebiti ni kwaac geni ki cwïny mo thïïŋ, ni bwøth geni ki køør leec wïïe.