Dut Pwøc 73_1 - Wëël Jwøk

Duut Mo Nyootha Aŋuun Bëët Jøøa Reyø Ki Bëët Dhaanh Jwøk

¹ Ka adïëri møn, Jwøk mëër ki jø Icriel, ni beege jøøa cwïnyge thïïŋ.

² 'Ba aani, kara acäännö ki man pädha, ni tïma naa caala dhaanhø mo cäädha yo othwørø.

³ Kiper aana tïmö naa këëö kiper bëët jø atöör, kanya jooda geni, ge na jøøa reyø, ni geno kwär.

⁴ Kiper geni bäŋ gïn mo jwørge; ge bëëdö ni dëëtge jööt jaak ni ge teek.

⁵ Ge kär ööl kaamar jiy møga, ni bäŋ gïn mo leth mo pïï dëëtge.

⁶ Kiper manøgønø, atöör atïïcge na gïr ajiem kaamar tii mo otwöö cwaak, ni tïm dïwïti kaamar abïï mo ege røø dëëtge.

⁷ Nyeŋge okwöt ki lørø, ni gïï wø reyø wø caarge ki cwïnyge thööth.

⁸ Ge bëënna abuua ni ge cara luup mo reyø, ni ge töödö ni ge manynya gø nee jiy møga thielge piny.

⁹ Dhøkge cara luup mo reyø dëër Wuuö Jwøk ni en maal, ni ö lëëpge ni carge luup atöör dï piny bäre.

¹⁰ Ni ö jø Jwøki ni døøge cään baŋge ni putge jïëy ki marge.

¹¹ Ni kö jø atöörri, na «?Aŋø, Jwøk da gïn mo ŋääe kiper bëëtö marwa? ?Aŋø, da leec wïc jï Jwøa Dwøŋ ni en Maal?»

¹² Neennu nø mø, jø raay beege yøø nø; cooth bëëtö marge jööt jaak, ni kwärö marge cäätha nyïme.

¹³ 'Ba aani, ka adïëri møn, cwïnya adøøya mo waany ki gïn mo oballe jaak, ni bëëda ki bëëtö mo beer kiper gïn mo bäŋ tiere jaak.

¹⁴ Kiper gïï mo leth atïmö ni pïï dëëra cooth, ni bëëda naa jøøya gïï mo leth ki yïth nïne bëët.

¹⁵ 'Ba aani, gïnögø kära caanø. Wui Jwøk, doo na yaa caanø, mara doo tïmö naa dwøga ŋäädhe mar jiyï cään.

¹⁶ 'Ba kanya pooda naa poot kär ci Øt Jwøk, naa cädö kiper nee tier luummögø jooda, atïmö ni teek jïra ki man jooda gø;

¹⁷ 'ba na cøøa Øt Jwøk, aŋuun bëëtö marge ajooda.

¹⁸ Ka adïëri møn, ge cïbï kwör mo cëëö, ni leeŋï ge yi ränynyö.

¹⁹ Ge laara ränynyö ki kany mo thiinh, ni thumge na bäre bäre ki køør gïï mo leth mo opïï dëëtge.

²⁰ Wui Wuuö Jwøk, kaawat man wø ö dhaanhe wø taak lääk kanyo pääe, ïïni thuwø ge taagï taaø kanyo ööï maal bäätge.

²¹ Kanya bëët cwïnya ni keec, ni yia raac,

²² aana bëëdö ni bäŋ gïn mo ŋääa ni wïïa bäŋgø, ni tïma naa caala lääy nyïmï.

²³ 'Ba ennø, ajooda naa poot bëëdö ka ïïni, ni cer cwïïa iï maaø,

²⁴ naa bwøthï ka ri pwöc moï; køøre nø, aano pänhnhï ni jïta buutï ka ajiem.

²⁵ ?Wui Wuuö Jwøk, aŋa ni ŋäädha maal këët? ?Patha ïïni? Bäŋ gïn mør mo manynya bäät piny, 'ba beeye ïïni keerï.

²⁶ Løny ki man ö rïŋ dëëra ni ränynye, ni päth cwïnya, 'ba ï na Jwøk, ï poot bëëdö ni ïïna teek mara, ni bëëdï ni ïïna kura na bäre bäre.

²⁷ 'Ba ka adïëri møn, jø wø jäth karge ki ïïni, ränynyö, ni dïïrï wïth jø wø dhal luummï.

²⁸ 'Ba aani, bëëtö mo beer wø jooda buut Jwøk, ni dëëra wø kana buute, eni na Wuuö Jwøk, nee luum tïïe moe bëët caana.