Dut Pwøc 64_1 - Wëël Jwøk

Duut Mo Kwaca Jwøk Nee Dhaanhnhe Kønye Ceŋ Nyïïmän

¹ Wui Jwøk, wïny dwøra ki gïï cäda kiperge ii; køny aani naa ba lwäya ki nyïïmänna.

² Gwøk aani ki gïï wø tuut jøøa reyø kipera, ni gwøgï aani ceŋ jø wø tïïö ko okiera,

³ jø wø lëëpge ege paa ni beth ni caala opëëllö, ni wø lëëpge coony baŋ dhaanhø kaamar athëëre.

⁴ Ge caala jiy mo omøør piny mo ge thööya ŋat mo mare adïëri, jø wø laar dhaanhø thööyö ni ge ba lwäär.

⁵ Dhøkge wø tuutge tuudö nee gïï mo reyø tïïcge na aciel, ni cäänge ki man cïïge ka abïëp, ni ge cädö ki cwïnyge ni bäŋ ŋat joot geni.

⁶ Ge cädö ki man tïïge ki gïn mo raac, ni tïïcge ka køør riek waŋ marge, kiper acaara mar dhaanhø ki gïïa en cwïnye ba joot.

⁷ 'Ba geno këër Jwøki ka atheerø mare, ni put dëëtge jïtö ki ŋwiili.

⁸ Luup moge odwøk Jwøki wïthge, ni kïth ge yi ränynyö, ni ö jø wø joot geni bëët ni buuge geni.

⁹ Køøre jiy bëët otïmö ni lwäär; ni ö gïna tïïc Jwøki ni køpge gø, ni cätge kiper tïïe moe.

¹⁰ Ŋata mare beer yie omïnni ki Wuuö Jwøk, ni kan dëëre buute, ni ö jøøa cwïnyge thïïŋ bëët ni kanyge.