Dut Pwøc 60_1 - Wëël Jwøk

Duut Mo Kwaca Jwøk Nee Jiye Pieme

¹ Wui Jwøk, waana kwierï, ni raanynyï waani; ïïna bëëdö ni ïïno gootø ki waani; 'ba ennø, dwøk bëëtö marwa kare.

² Dïjäŋ piny atïïyï møn, ni ö pinynyi ni kaaŋŋe; 'ba cäŋ kwöra kaaŋŋø mwönnö, kiper piny atïmö ni muuŋŋö.

³ Wa na jiyï, waana mooyï ki bëëtö mo teek, ni mooyï wa ki køøŋ nyïïomøki mo na maathwa gø waana put bøømmø.

⁴ 'Ba ïïna cïpö ki bëëra na nyuudhi jï jø wø lwäär ki ïïni, kiper nee dëëtge cooŋge na aciel lage kiper adïëri marï.

⁵ Wïny marwa ni piemï waani ki køør teek badï, kiper nee waani na mëërï ki geni nee wa piem.

⁶ Jwøk acäänö ni ena kar bëëtö mare na en kur keere, ni kööe, «Ŋøøp Cekam pääŋŋa pääŋŋö ni mïn yia, ni pääŋŋa ŋøøp Goor Cuköt thuwø.

⁷ Ŋøøp Gelät beege 'moa, ni ö ŋøøp Maneeca ni näkge 'moa thuwø; jø tuuŋ Ipariem perge leth ni caala cöör nywïënyö mara, ni jø tuuŋ Juuda beege jø wø kïth ciik 'moa bäät tïïc.

⁸ 'Ba jø Möap caala gïn wø lööga yie, ni ö warø mara ni leeŋa gø yi po jø Ëdöm, ni kwöŋŋa bäät jø Pilitin ni dwøra ena maal kanyo bööta geni.»

⁹ ?Wui Jwøk, aŋa noo mooc aani ki teek naa dønynya yi pääny mana teek, noo bwøth aani naa këëda ki jø Ëdöm?

¹⁰ ?Wui Jwøk, aŋø, waana kwierï møn ennø, niï ba ci baŋ leny këët ki jø leny mowa?

¹¹ Køny waani ceŋ nyïïmän, kiper køny mar dhaanhø bäŋ gïn mo duue

¹² Teek dïïm ojootwa baŋ Jwøk, ni bee eni noo bööt nyïïmän mowa.