Dut Pwøc 57_1 - Wëël Jwøk

Duut Mo Ŋäätha Jwøk Kiper Køny

¹ Wui Jwøk, køny aani, køny canna, kiper raa yaa kan buutï. Dëëra kana tiet bwöpï këël mano ö gïna lethi noo pöödhe.

² A jwöŋö dëër Jwøa Dwøŋ ni en Maal, Jwø wø tïïc jammi bëët nee thurge karge jïra.

³ Eni køny di jääŋŋö ki maal ni køny aani, ni jook jø wø thiel aani piny. Jwøk mëër mare ni wø ba jøøl ka adïëri mare di jääŋŋö.

⁴ Aani, a caala dhaanhø mo ena dï ŋuuwe, naa bëëdö dï jiy mo owär kaamar cwëënyi, ni beege nyïïmänna ni wø lakge beth ni caala tøøŋi ka athëëre, ni lëëpge beth ni caala opëëllö.

⁵ Wui Jwøk, ï bëëdö ni karï dwøŋ døc, na ajiem marï ena bäät piny bäre.

⁶ 'Ba nyïïmänna, abïëp anø cekge kipera, ni ö cwïnya ni pädhe. Gena kunyö ki buur mo dwøŋ øtjööra, ni ö geni ki dëëtge ni päthge yie.

⁷ Wui Jwøk, a bëëdö ni cwïnya ena køørï; cwïnya bëëdö ni ena køørï møn, naa wär ki dudi naa pwøya ïïni.

⁸ Päyï, ïïni na jwïëya, ni päyu, u na thøme 'moa; aani, øw nyïïa nyïïö nee laar ruuö ki duuda.

⁹ Wui Wuuö Jwøk, met ec duua duuö jïrï dï jiy bëët, ni wära ki dut pwøc jïrï dï wïth juurre.

¹⁰ Kiper mëër marï ni wø ba jøøl dwøŋ døc no okëët maal, na adïëri marï okëët nyeŋ pøøl.

¹¹ Wui Jwøk, ï bëëdö ni karï dwøŋ døc, na ajiem marï ena bäät piny bäre.