Dut Pwøc 52_1 - Wëël Jwøk

Duut Mo Jääla Ŋata Raac Ni Wø Ŋwöö

¹ Nyie, ï ni wø köö niï teek! ?Aŋø ni ŋwöï kiper gïna raac na tïïyï dëët jic Jwøk en?

² Cooth ï caara luup aranya. Leebï beth ni caala muuc, ïïni ni wø tïïc cwøk.

³ Ï mëër ki gïn mo raac ni kaala mana beer, niï mëër ki tööt ni kaala adïëri.

⁴ Yiï met ki luup aranya bëët, ni ïïna ŋat cwøk.

⁵ 'Ba Jwøk ïïno raanynye na bäre bäre, ï di maaø ni tuut ïïni wøk ki yi ødï, ni puth ï wøk kar bëët jøøa kwøw.

⁶ Gïïögø ojoot jøøa bëëtö marge beer, ni putge lwäyö, ni ŋeethge bäätï ni köge,

⁷ ni «Raŋ ŋat mo Jwøk käre tïïö na kany kan dëëre yi gø, ni eni bëëdö ni ŋäätha jap kwär moa thööth na en jïre, ni ö teek mare ni cääth maal ki køør gïna raac na tïïe.»

⁸ 'Ba aani a caala jaath mo oløth mo ena Øt Jwøk, naa bëëdö cooth naa ŋäätha mëër mar Jwøk ni wø ba jøøl.

⁹ Wui Jwøk, ï pwøa pwøø na bäre bäre, kiper gïna tïïyï. Aani, man näk maa ŋäätha ïïni caana caanø nyïm jiy mo cwïnyge ena køørï, kiper ïïna Jwøk mo beer.