Dut Pwøc 48_1 - Wëël Jwøk

Duut Mo Pwøca Wuuö Jwøk Jwø Dhayan

¹ Wuuö Jwøk dwøŋ, no orømø ki pwøc døc, yi pääny mare na en bäät kïnne ma Dhayan na en kur keere.

² Kïn Dhayan bäär ni mïërö, ni piny bäre yie met ki gø, ni beeye na geer pääny mar nyenynya dwøŋ bääte.

³ Jwøk bëëdö dï kiir na no ogeerø ni teek mar päänyögø, ni ree ee nyoodhø ni bee eni na kar gwøk røk.

⁴ Ka adïëri møn, nyeye rege adwalge kanya ciel, ni cäänhge na aciel nee Kïn Dhayan tukge.

⁵ 'Ba kanya neenge gø, yïthge athäŋŋö, ni lwäcge, ni bwøkge,

⁶ ni miel dëëtge kaace, ni pïïc gïn mo leth dëëtge, ni tïmge kaamar dhaagø mo ogøøc mäc lwaarri.

⁷ Gena raanynyï kaamar baabuure mo Tarcëc, na raany atuunna mana dwøŋ.

⁸ Ka teeŋ mana wïnynyø gïna tïïc Jwøki, aputø joot ennø no otägö yi pääny mare, eni na Jwøk marø, eni na wïth jammi bëët. 'Ba päänyögø gwøk Jwøki gwøø na bäre bäre.

⁹ Wui ï na Jwøk, waana cädö kiper mëër marï ni wø ba jøøl ni wa ena øt lam marï.

¹⁰ Wui Jwøk, ka teeŋ mana ŋäc nyeŋŋï bäät piny bäre, jø bäät piny bëët pwøya ïïni thuwø, kiper bëëtö marï na beer.

¹¹ Jøøa bëëdö bäät Kïn Dhayan beerra man mïn yïthge, ni mïn yïth mïëc Juuda thuwø ki ŋøl marï.

¹² U na jic Jwøk, caathu deŋ Dhayan ni wïrru lage, ni kwaannu uut koor moe;

¹³ raŋŋu kiire døøc, ni neennu kwör lenye moa teek, kiper nee caannu jï beenhnhø mano ööi.

¹⁴ Man beeye Jwøk, ni beeye Jwøk marø na bäre bäre, ni bëëdö ni bwøtha øøni na bäre bäre.