Dut Pwøc 42_1 - Wëël Jwøk

Duut Lam Mar Ŋat Mo Cwïnye Opädhö Ni Manynya Wuuö Jwøk

¹ Kaawat man wø ö röönna mo onäk riewi wø many pïï, aani thuwø a wø bëëdö naa manynya ïïni, ï na Jwøk.

² Aani, dëëra da riew kiper Jwøk, Jwøa kwøw. ?A yi wäne nø noo ööa naa cuŋŋa nyïm Jwøk?

³ A bëëdö naa jwöŋö cooth waŋcäŋ ki wäär, ni tïm pï nyeŋŋa na cam mara, kany wø bëët jiyi ni jøøŋŋa aani cooth, ni ge köö, ni «?Jwøk marï age?»

⁴ Cwïnya wø pädhö kany wø para wïïa ki gïïa wara tïïa, ni beeye kanya wara cøøa ki lwaak mo päl ni bwødha geni Øt Jwøk, ni wa kwöŋŋö ki met ec ni wa wär ki dut pwøc, ni wa cämö ka ajwöma ni waana lwaak mo päl.

⁵ ?'Ba aperŋø ni bëëda ni cwïnya opädhö? ?Na aperŋø ni bëëda ni wïïa ree ee kierø en? Beerra man raŋŋa jï Jwøk, ni bëëda naa pwøya eni, eni na dïkunyi mara.

^6-7 Wui ï na Jwøk mara, cwïnya apädhö kany, tier Naam Jördan, kany bëëda ni aana wëëllö yie en, ni para wïïa ki ïïni. Aana mooyï ki pänh cwïny møn, ni ö gïï mo lethi ni päthge bääta kaamar naam mo pänhnhö, ni lwör kaamar pïï mo wø löönynyi ki bäät Kïn Armön ki Kïn Midhaar, ni löönyge yi Naam Jördan.

⁸ 'Ba Wuuö Jwøk mëër mare ni wø ba jøøl wø nyoodhe nyoodhø jïra ki waŋcäŋ, ni wära ki duut jïre ki wäär, naa lama Jwøk ni wø kwøw aani.

⁹ A lämö jï Jwøk eni na teek mara, ni kööa, na «?Aperŋø na wïl wïïï ki aani? ?Na aperŋø ni bëëda naa kïmmö en kiper gïïa leth na tïïc nyimän?»

¹⁰ Ajøøŋ mana tïïc nyïïmänni 'moa dëëra atïmö ni caala ŋwellø mo onieŋ døc dëëra, kany wø bëëtge ni ge jøøŋŋa aani cooth, ni ge köö, ni «?Jwøk marï age?»

¹¹ ?'Ba aperŋø ni bëëda ni cwïnya opädhö? ?Na aperŋø ni bëëda ni wïïa ree ee kierø en? Beerra man raŋŋa jï Jwøk, ni bëëda naa pwøya eni, eni na dïkunyi mara ni beeye Jwøk mara.