Dut Pwøc 41_1 - Wëël Jwøk

Duut Lam Mar Ŋat Mo Tuu Mo Manynya Køny

¹ Gwïëth en bäät ŋat wø cädö kiper ŋata can. Eno køny Jwøki kany wø näk da gïï mo leth mo tägö.

² Eno gwøk Wuuö Jwøki, nee bëëde ni kwøw, ni tïme no ogwïëdhö dï poge, ni eni ba cïp ceŋ nyïïmän moe.

³ Wuuö Jwøk bëëdö buute kany wø näk mo eni tuu, ni ö Wuuö Jwøki ni riem täw, ni døøc dëër gø mo jööt.

⁴ 'Ba aani, aana köö, ni «Wui Wuuö Jwøk, aana bääyö dëërï; 'ba bääth yiï ki aani ni kønyï täw mara.»

⁵ Nyïïmänna wø cäänö ki gïï mo reyø kipera, ni köge, ni «?Thøøe wäne nø, nee nyeŋŋe rwäänye?»

⁶ Kany wø dee ŋat mo lïïmmö baŋa, eni wø caana luup cwøk, ni cwïnye cooŋa raay kipera; 'ba kany wø ci wøk, nyeŋŋa wø waae waaø.

⁷ Jø wø män ki aani bëët, ge wø møŋŋa gïra, ni ge caara gïn mo raac kipera, ni köge,

⁸ «Ena mak täwi mo raac døc ki køør rääö mare, ni eni ba ö maal këët.»

⁹ Këël nyawatwa kiree na näk yaa ŋäädhö, ŋat wø cam kwöna, aana cääbe ki tiere.

¹⁰ 'Ba ï na Wuuö Jwøk, bääth yiï ki aani, ni dwøgï teek dëëra kare kiper nee kwöra coola.

¹¹ 'Ba na ö nyïïmänna na kärge aani böötö ennø, aŋääa ni yiï omïnnö ki aani.

¹² 'Ba aani, a wø kønyï kønyø kiper adïëri mara, ni cïbï aani buutï na bäre bäre.

¹³ Pwøc en jï Wuuö Jwøk, Jwø Icriel, na bëëdö kanya poode ni piny poot kär cwääö, këël na bäre bäre. Kare møn, enøgønø.