Dut Pwøc 38_1 - Wëël Jwøk

Duut Kwac Mar Ŋat Mo Cwïnye Opädhö Ki Raay Moe

¹ Wui Wuuö Jwøk, kär a joogï ni marï wëër ki aani, ni ba wëërï kanyo pwönynyï aani.

² Kiper athëëre moï anø pï dëëra, ni thielï aani piny ki cerï.

³ Dëëra ajïtö ki täw ki køør wëër marï, ni tïm dëëra ni ba jööt ki køør raay 'moa.

⁴ Kiper raay 'moa wïïa akaalge; ni tïmge ni peek døc ni caala tëër mo ba løny ki tïëtö.

⁵ Ŋwiili 'moa, na jooda ki køør gïïa tïïa ki bøøl mara, ajïtö ki tuut ni ŋwääge.

⁶ A cäädhi ni aano gääŋ, naa bëëdö naa kïmmö cooth.

⁷ Kiper dëëra waŋŋi bäre, ni dëëra man bäre da täw.

⁸ Dëëra atïmö ni bäth bäre ni ränynye, ni bëëda naa cooyø ni cwïnya opädhö.

⁹ Wuuö Jwøk, gïn manynya en ŋäyï, ni cooyø mara wïnyö jïrï.

¹⁰ Wenynya atïmö ni pärö, ni ö teeki mara ni aae dëëra, ni ö nyeŋŋa ni tïmge ni ba nëënö këët.

¹¹ Nyïïawääta ki jø wø mëër ki aani karge atïïcge ni bäär ki aani kiper ŋwiili moa en dëëra, këël tuuŋwa kiree karge atïïcge ni bäär ki aani thuwø.

¹² Jø wø cac man 'näkge aani abëëbe moge wø cekge ciiø kipera, ni ö jø wø many man tïïcge gïï mo leth dëëra ni cäänge kiper naa raanyge, ni ge tudö ki luup ki piny cooth.

¹³ 'Ba aani, raa atïïa naa caala dhaanhø ma miiŋ, naa ba wïnyö, ni tïma naa caala dhaanhø mo bäŋ dhee mo ba cäänö.

¹⁴ Ka adïëri møn, aana tïmö naa caala dhaanhø mo ba wïnyö, mo bëëdö ni ba pïëmö kiper dëëre.

¹⁵ 'Ba bee ï na Wuuö Jwøk, ni wø jïre raŋŋa, ni bee ï na Wuuö Jwøk, Jwøk mara, noo løk mara.

¹⁶ Kiper aana lämö ni kööa, ni «Jø wø tïïc dëëtge ni døøŋŋø bääta, kär yïthge mïnnö kany wø cwaanya tiera.»

¹⁷ Ennø, kara atïmö ni cään ki man pädha, naa bëëdö naa rämö cooth.

¹⁸ Aani, raay 'moa køba købø; aana tïmö naa kïmmö kiper gïïa baaa.

¹⁹ Nyïïmän 'moa dëëtge jööt ni ge teek, ni jø wø män ki aani ki gïn mo bäŋ tiere thööth.

²⁰ Jø wø duu gïn mo raac na kar gïna beer, ge män ki aani kiper mana caadha køør bëëtö mo beer.

²¹ Wui Wuuö Jwøk, kär a weyï; wui ï na Jwøk mara, kär karï tïïyï ni bäär ki aani.

²² Wui Wuuö Jwøk, ï na dïkunyi mara, laar rwänh baŋa kuna kønyï aani.