Dut Pwøc 37_1 - Wëël Jwøk

Duut Mo Pöö Kiper Bëëtö Mo Beer

¹ Kär wïïï kierï ka acaara kiper bëët jøøa reyø; ni ba keeyï per bëët jø raay.

² Kiper ge laara ränynyö kaamar luum mo otal, ni närge kaamar omarø mo obäp.

³ Bëëdï niï ŋäätha Wuuö Jwøk, ni tïïyï gïï mo beyø, ni bëëdï yïth ŋøøpu ni ïïna ŋat mo oŋäädhö.

⁴ Bëëdï ni yiï met ki Wuuö Jwøk, køøre ïïno mooe ki gïïo manynyï ki cwïnyï.

⁵ Cïp dëërï jï Wuuö Jwøk; ni ŋääthï eni, køøre mare otïïe.

⁶ Eni bëëtö marï na beer otïïe ni nëënö kaamar tar, ni tïm bëëtö marï na näk kare ni nëënö kaa man wø neen gïrpiny ki dhöör.

⁷ Bëëdï ni ïïno göök ri Wuuö Jwøk, ni raŋŋï jïre ni cwïnyï iï cïp piny; kär wïïï kierï ka acaara kiper ŋat wø jape thöönhnhi ki køør tïïe moe, ŋat wø tïïc gïï wø caare na reyø.

⁸ Män riï ki gootø ni kwierï wëër, kär wïïï kierï ka acaara, kiper acaara duua gïï mo reyø.

⁹ Kiper jø wø tïïc gïï mo reyø ŋøla wøk, 'ba jø wø raŋ jï Wuuö Jwøk, ŋøøm cøøa jïge.

¹⁰ Ki kany mo thiinh ŋat raay tïmö ni ba joot këët; ni këël kare diï manynyø døc, eni ba jootï.

¹¹ 'Ba jøøa mwöl ŋøøm cøøa jïge, ni mïn yïthge ki køør bëëtö marge na beer.

¹² Ŋat raay cädö ki jöö man tïïe ki gïn mo raac dëër ŋata beer, ni kaac lage bäät gø.

¹³ 'Ba Wuuö Jwøk ŋeethø bäät ŋat raay, kiper ŋääe ni cäŋ ränynyö mar ŋat raay kare cään.

¹⁴ Jø raay opëëlle moge wø wöthge wøk, ni niitge athëëre moge, kiper nee jøøa no ocaannø ki jøøa can nee 'näkge, ki jøøa näk bëëtö marge thïïŋ.

¹⁵ 'Ba opëëlle moge døøa dëëtge keerge, ni ö atummi moge ni tøcge.

¹⁶ Beerra bëët ŋata mare beer ni jape nøk, ni kaala bëët kwärö mar jøøa thööth ni wø tem raay.

¹⁷ Kiper Wuuö Jwøk teek mar jø raay raanynye raanynyø, 'ba jøøa beyø gwøe gwøø.

¹⁸ Wuuö Jwøk bëët jøøa marge thïïŋ ŋääe, ni ö ŋøømmi ni bëëtge na moge na bäre bäre.

¹⁹ Kany wø näk mo piny raac, öölö ba pïï bäätge, ni kany wø näk mo da käc, cam dagø jïge mo rømø.

²⁰ 'Ba jø raay ränynyö, ni tïm nyïïmänni mo Wuuö Jwøk kaamar luum pwöla ni wø laar talø, ni rwäänyge kaamar jïrö ni wø maayi.

²¹ Ŋat raay wø mäyö, 'ba eni ba cudö, 'ba ŋata beer wø cïpö ki køør bäth ec mare.

²² Jøøa no ogwïëth Wuuö Jwøki, ŋøøm cøøa jïge, 'ba moa näk ee cienø, ŋøle wøk.

²³ Bëët dhaanhø wø wëëga Wuuö Jwøki thur kare, ni tïm yi Wuuö Jwøki ni met ki bëët gø.

²⁴ Këël eni doo pädhö, ba pädhi ki pänh ränynyö, kiper cere mak Wuuö Jwøki maaø.

²⁵ Ki mana täga thïnhö, këël mana jala ennø, a kär jïtö ki ŋat mo beer mo owiiø; këël obwöre moe mo kwääö ki caammi, bäŋgø thuwø.

²⁶ Eni bëëdö ni cwïnye bäth, ni jape wø wëëge mac cooth, ni ö jiyi ni gwïëdhi ki køør nyïïkwaaye.

²⁷ Tïïc karï ni bäär ki raay, ni tïïyï gïna beer, køøre nø, ïïno bëëdö na bäre bäre.

²⁸ Kiper Wuuö Jwøk yie met ki ŋøl ma kare. Jøøa näk cwïnyge ena køøre ba wiie; ge gwøe gwøø na bäre bäre, 'ba wäät jøøa reyø ŋøle wøk.

²⁹ Jøøa beyø ŋøøm cøøa jïge, ni bëëtge yie na bäre bäre.

³⁰ Ŋata beer cara luup leec wïc, ni luup mo wø ŋøle ni wø cur dhee beege karge.

³¹ Eni ciik Jwøk bëëdö cwïnye, ni bëëde ni tiere ba cwanynye.

³² Ŋata raac bëëdö ni lepa ŋata beer, ni caya man 'näk gø.

³³ 'Ba Wuuö Jwøk ŋata beer ba wii cer ŋatøgø, ni eni ba wëëk jääl kanyo ŋøl luumme.

³⁴ Bëëdï niï raŋŋa jï Wuuö Jwøk, ni caathï jööre. Karï otïïe ni dwøŋ, ni ö ŋøømmi ni cige jïrï, ni jootï jø raay ni geno ŋøl wøk.

³⁵ Ŋat raay dagø mo yaa joodø mo ogäy mo jiy ee dïïmö, ni caala jaath mo dwøŋ mo piny ee maaø.

³⁶ 'Ba na tïme na køøre cään, ena rwäänyö, ni tïme ni tøør kaace këët; 'ba kanya manynya gø, eni kära joodø.

³⁷ Raŋ ŋat mo bäŋ ajäla bääte, ni neenï ŋata näk bëëtö mare thïïŋ, kiper ŋat wø bëëdö ki bëët-mëër jïtö ki nyïïkwaaye.

³⁸ 'Ba jø wø tïïc raay, wïthge di dïïrö na bäre bäre, ni ö nyïïkwaacge ni ŋøli wøk.

³⁹ Wuuö Jwøk beeye ni wø piem jøøa beyø, ni teek marge wø jootge baŋe kany wø dee gïï mo leth mo pïï bäätge.

⁴⁰ Ni beeye Wuuö Jwøk ni wø køny geni ni wø piem geni, ni käl geni wøk ceŋ jø raay, ni kwøw geni, kiper mana kange dëëtge buute.