Dut Pwøc 30_1 - Wëël Jwøk

Duut Mo Pwøca Jwøk Kiper Køny

¹ Wui Wuuö Jwøk, nyeŋŋï tïŋa maal, kiper aana kønyï, ni kärï yïth nyïïmänna wëëk mïnnö bääta.

² Wui Wuuö Jwøk, ï na Jwøa, aana jwöŋö dëërï kiper køny, ni døøyï dëëra mo jööt.

³ Wui Wuuö Jwøk, jwïëya amänï ki mana dee ci kar bëët jwïëc jøøa no othøw. Doo na aano ci yi bwörö cøøn, 'ba aana kwøwï.

⁴ U na cwïnynyu en køør Wuuö Jwøk, wärru ki duut pwøc jï Wuuö Jwøk, ni pwøyu eni na en kur keere.

⁵ Kiper wëër mare beeye kany mo thiinh keere, 'ba met yie bëëdö këël yïth nïr kwøw bëët. Ni näk mo da kïmmö, beeye wäär aciel keere, 'ba noo tïme na amöölla, kanynyø wø put ka joot.

⁶ Kanya bëëda ni bëëtö mara beer, aana cädö, «Ni bäŋ gïn tägi dëëra na bäre bäre.»

⁷ Wui Wuuö Jwøk, ki køør met iï, aana tïïyï naa teek kaamar kïdi. 'Ba kanya kanï täärnyïmï ki aani, cwïnya apädhö.

⁸ Wui Wuuö Jwøk, aana jwöŋö dëërï, ni kwaa ïïni, ï na Wuuö Jwøk, ni kööa,

⁹ «?Ni näk mo aano thøw ni cøøa yi bwörö, agïnaŋø noo duue jïrï? ?Aŋø, løny ki man ö ŋøømmi ni pwøcge ïïni? ?A løny ki man caange adïëri marï?

¹⁰ Wui Wuuö Jwøk, wïny kwac mara, ni kønyï aani ki køør met ec marï. Wui Wuuö Jwøk, bëëdï ni ïïna dïkunyi mara.»

¹¹ Kïmmö mara adøøyï meeŋ mar met ec; kïmmö akälï wøk bääta, ni døøyï yia mo met.

¹² Kiper manøgønø, ï pwøa pwøø ni ba lïŋa. Wui Wuuö Jwøk, ï na Jwøa, ï pwøa pwøø cooth.