Dut Pwøc 2_1 - Wëël Jwøk

Duut Mo Cäänö Kaper Ŋata Røøny Wuuö Jwøki Na Nyeya

¹ ?Aŋø na ö wïth juurre ni cooŋge dëëtge kiper ageem en, ni cätge ki gïï mo oballe jaak?

² Nyeye mo bäät piny aö maal, ni ö kwääri ni dwätge ki geni na aciel, nee Wuuö Jwøk, ki dhaanhnhe na näk ee røønyø na nyeya nee nywaakge;

³ ni köge, ni «Beerra man kälø luumge wøk bäätø na näk øøno twöö ki gø, ni wetø ciik moge na caal thøøth twöc.»

⁴ 'Ba Wuuö Jwøk ni wø bëëdö maal ŋeethø bäätge, ni put bëëtö ni gïrge ee taaø.

⁵ Køøre eni cäänö ki geni ni mare wëër, ni tïïc ge nee bëëtge ni lwäär ki wëëye,

⁶ ni kööe, ni «Aani, ŋata nø røønya na nyeya arøønya nee bëëde bäät Kïn Dhayan, ni beeye kïnna na en kur keere.»

⁷ 'Ba nyeya mana røøny aköö, ni «Luumma caan Wuuö Jwøki caana caanø. Ena köö jïra, ni ‹Dïcäŋi ennø, ïïna wääda, ni tïma ni aana wäru.

⁸ Pëëny aani, nee wïth juurre bëët mëëga ïïni na moï, ni ö pinynyi bäre ni ci jïrï.

⁹ Ge dïïmï dïïmö ka athøny nywïënyö, ni raanynyï geni kaamar dak mo ogøø piny.› »

¹⁰ Kiper manøgø nø, u na nyeye, caarru wïthu, ni wïnynyu ŋwøc man ŋwöny uuni ki gø, u na kwääri mo piny.

¹¹ Tïnynyu Wuuö Jwøk nou lwäär, ni mïn yïthu ni dëëtu kwanynyi.

¹² Wøørru wäädö, nee ba wëëre, nee bëëtö maru ba cääth baŋ ränynyö, kiper wëëye wø laara tägö. 'Ba gwïëth en jï jø wø kan dëëtge buute.