Dut Pwøc 27_1 - Wëël Jwøk

Duut Mar Ŋat Mo Lääŋŋa Wuuö Jwøk

¹ Wuuö Jwøk beeye tar mara ni beeye dïkunyi mara; ?aŋø, da ŋat mo daa lwäärö këët nø? Wuuö Jwøk bee eni ni wø gwøk jwïëya; ?aŋø, da ŋat maa böö ki gø?

² Kany wø ö jøøa reyø ni wø öge baŋa, ni beege nyïïmänna ki jø wø caan aani, kiper nee remma kønyge piny, tietge wø cwanyge cwanynyø ni päänhge.

³ Këël jø leny mo thööth a dege ciel dïër, a ba lwäyi; këël leny doo tägö ni ööa baŋa, a poot bëëdö ni jïra da ŋäädhe.

⁴ Da gïrpiny aciel mo yaa kwaaø baŋ Wuuö Jwøk, ni beeye gïnögø keere ni manynya; ni gïn manynya en beeye ki man bëëda Øt Wuuö Jwøk ki yïth nïr kwøw 'moa bëët, kiper nee beeny Wuuö Jwøk jooda, naa bëëda naa lääŋŋa eni yi øt lam mare.

⁵ Kiper kany wø näk da gïï mo leth mo tägö, a wø kane kanø kar kän mare; a wø di kanø kar kän mare møn yi øt lam mare. A wø kïthe maal kar gwøk røk kany mo ena bäät kïdi.

⁶ 'Ba ennø, wïïa tïŋa maal bäät nyïïmänna moa ciel aani dïër; køøre aano cïpi ko olämme jï Wuuö Jwøk yi øt lam mare, naa kwöŋŋö ki met ec, ni wära ki dudi naa pwøya Wuuö Jwøk.

⁷ Wui Wuuö Jwøk, wïny dwøra kany wø kwaa ïïni; køny aani ni wïnynyï dwøra.

⁸ Kanya kööï, «Ni cayu aani,» aana köö ki yi cwïnya, «Wui Wuuö Jwøk, ï wø manynya manynyø.»

⁹ Kär täärnyïmï kanï ki aani. Kärï wëër ni riemmï aani, a na laŋŋï, kiper beeye ï na dïkunyi mara. Wui Jwøk, ï ni wø piem aani, kär a wetï, ni ba weyï aani.

¹⁰ Këël wära ki mera a dege wiiø, ï na Wuuö Jwøk, a lwørï lwørø.

¹¹ Wui Wuuö Jwøk, pwöny aani ki man caadha jöörï, ni bwøthï aani ki jöö mo tiir, kiper da jiy mo män ki aani.

¹² Kär a cïp ceŋ jø wø caan aani, kiper da tööte mo oö maal bääta, ni ge manynya man tïïge ki gïn mo raac dëëra.

¹³ Ennø, cwïnya da ŋäädhe ni beeny Wuuö Jwøk daa neenø kanyo pooda naa poot kwøw.

¹⁴ 'Ba ï na dhaanh Jwøk, beerra man bëëdï niï koora Wuuö Jwøk, ni bëëdï niï teek ni cwïnyï iï maaø. Adïëri møn, bëëdï niï koora Wuuö Jwøk.