Dut Pwøc 26_1 - Wëël Jwøk

Duut Ŋat Mo Bëëtö Mare Kare Mo Kwaya Jwøk Kiper Nee Ŋunni

¹ Wui Wuuö Jwøk, ŋun aani, kiper a bëëdö ka bëëtö mo tiir, naa bëëda naa ŋäätha ïïni, ï na Wuuö Jwøk, ni cwïnya ba wiila.

² Wui Wuuö Jwøk, many yia ni raŋï aani døc; ni raŋï cwïnya ka acaara mara bäre.

³ Kiper a bëëdö naa lääŋŋa mëër marï ni wø ba jøøl, naa cäädhi ka køør adïëri marï.

⁴ A bäŋ wø pï piny kanya ciel ki jiy mo cara oballe, naa ba cäädhi ki jø cwøk;

⁵ a män ka acooŋ jø wø tïïö ki gïï mo reyø, naa bäŋ wø pï piny kanya ciel ki jø raay.

⁶ Aani, ceŋŋa lwøa lwøø naa nyootha gø ni bäŋ raay cwïnya, ni wïra deŋ gïn wø cïp olämme bääte marï, ï na Wuuö Jwøk,

⁷ nee gïrï køba naa dwøga met ec, naa cara tïïe moï bëët ni wø rëëm ec.

⁸ Wui Wuuö Jwøk, yia met ki øtø marï na näk kar bëëtö marï, ni beeye kany wø joot ajiem marï yie.

⁹ Kär a 'nägï ki jø raay na aciel, ni ba raanynyï aani na aciel ki jø wø nääö ki jiy,

¹⁰ ni beege jø wø tudö ki gïï mo reyø, ni wø kädi ki jammi mo wø cïp ki piny.

¹¹ 'Ba aani, a poot cäädhi ka jöö mana na adïëri; put aani køny ki køør met ec marï.

¹² Ennø, aana nø pïï kany mo leer; ni bëëda naa pwøya Wuuö Jwøk ki jø acooŋa na aciel.