Dut Pwøc 22_1 - Wëël Jwøk

Duut Mo Kwaca Wuuö Jwøk Kiper Køny Mare

¹ ?Wui Jwøk, Jwøa, aŋø ni weyï aani en? ?Aŋø ni tïïyï karï ni bäär ni ba kønyï aani en? ?Na aŋø ni ba kønyï aani kany wø jwöŋa dëërï?

² Wui, ï na Jwøa, a jwöŋö dëërï ki dïcäŋ cooth, 'ba bäŋ gïn mo løgï jïra, ni jwöŋa dëërï ki wäär thuwø, ni dëëra ba jwöma ki jwøk.

³ 'Ba ïïni, ïïna Jwøk miï ena kur keerï, niï bëëdö ni jø Icriel pwøya ïïni.

⁴ Wëëkwa abëëdö ni ge ŋäätha ïïni; ïïna ŋääthge møn, ni piemï geni.

⁵ Gena jwöŋö dëërï ni piemï geni; ïïna ŋääthge, 'ba ŋäädhe marge kär aay jaak.

⁶ 'Ba aani, a paa dhaanhø; a röömi ka twöŋö. Aano taak jiyi, naa bëëdö naa ege päädö.

⁷ Jø wø joot aani bëët a wø buuge buuö, ni lëëpge wø rwääge wøk ni wïthge tuuŋge tuuŋŋö, ni köge,

⁸ «Eni kee Wuuö Jwøk ee ŋäädhö. ?Aŋø, Wuuö Jwøk ba køny eni ŋø? ?Aŋø, ni näk mo Wuuö Jwøk yie met ki eni, eni ba kønyi Wuuö Jwøki aperŋø?»

⁹ 'Ba ï na Wuuö Jwøk, beeye ïïni na tïïc aani nee lwaarø ki aani, ni gwøgï aani kanya ena köör mera.

¹⁰ Ki mana ö mera ni lwaare ki aani, a ena cerï, ni beeye ïïni na Jwøa ki mana täge naa ena yi mera.

¹¹ Wui Wuuö Jwøk, kär karï tïmö ni bäär ki aani, kiper gïï mo leth karge cään, ni bäŋ ŋat mo køny aani.

¹² Nyïïmänna moa thööth aana cielge dïër, ni caala man wø tïïc rwäth dhäki moa teek mo jø Baacan.

¹³ Nyïïmänna atïmö ni caala ŋuu mo dhee ee ŋaamø, ni märö ni manynya man cam dhaanhø.

¹⁴ Aana tïmö naa jääk døc, ni ö nyeŋ cuuwa bëët ni panyge rege, ni puta lwäyö døc.

¹⁵ Cwaaga atal na bäre, ni ö leeba ni neebøønhnha wøk, ni tïïyï a kaamar dhaanhø mo othøw.

¹⁶ Jiy mo tïïö ki gïï mo reyø aana cielge dïër kaawat man wø tïïc guuwi; ceŋŋa ki tieta agurge.

¹⁷ Cuuwa bëët atïmö ni løny ki kwaan jïra. 'Ba nyïïmänna bëëdö ni neeta aani ni ge buua aani.

¹⁸ Abïïe moa en dëëra apääŋge yïthakicge ki køør nyuuthe mo wø tïïc ni pätha baŋ ŋati man nø.

¹⁹ 'Ba ï na Wuuö Jwøk, kär karï tïmö ni bäär ki aani; ï na pïëmi mara, laar rwänh kuna kønyï aani.

²⁰ Gwøk jwïëya naa ba näk ko opëëllö, ni gwøgï jwïëya ceŋ nyïïmänna.

²¹ Piem aani ceŋ nyïïmänna moøgø ni caal ŋuuwe yøø; piem aani møn ceŋ nyïïmänna moøgø ni caal jööpe yøø mo tukge beth.

²² Aani, nyeŋŋï caana caanø jï nyïïmera ma jø Icriel, ni pwøa ïïni kany wø dee acooŋ lam.

²³ Uuni ni wø lwäär ki Wuuö Jwøk, pwøyu Wuuö Jwøk; uuni na nyïïkwaac Jeekap bëët, jiemmu Wuuö Jwøk, ni wøørru eni, u na nyïïkwaac Icriel bëët.

²⁴ Kiper eni ŋat mo ocaannø ba taae wala ba kwiere, ni täärnyïme ba kane ki gø, 'ba kany wø ö ŋatøgø wø kwac eni, dwør gø di wïnynyö.

²⁵ Wui Wuuö Jwøk, a wø mooyï mooø ki teek man pwøa ïïni ki gø dï acooŋ lam mo dwøŋ, ni cïba gïïa kööŋa ki ge jïrï ni nëënö jï jø wø lwäär ki ïïni.

²⁶ Jøøa no ocaannø cämö ni jäŋge; jø wø many Wuuö Jwøk, Wuuö Jwøk opwøcge. 'Ba ennø, u bëëdö nou kwøw.

²⁷ Jø bäät piny bëët wïthge ocaarge, ni duuge baŋ Wuuö Jwøk. Ni ö wïth tuŋi mo juurre bëët ni wøørge eni.

²⁸ Kiper Wuuö Jwøk beeye nyeya, ni wïth juurre bëët ena cere.

²⁹ Jøøa no okwär bäät piny bëët geno cämö ni wøørge eni; këël jøøa can bëët thuwø ni wø karge cään ki thøø cøŋge këëlge piny ni kuulge wïthge piny nyïme, ni beege jø wø rege ba løny køny keerge ki teek marge.

³⁰ Jiy moo nywøl yi nyïme obëëdö ni tïnynya Wuuö Jwøk, ni ö jiyi ni caange gïre jï beenhnhe moo ööi;

³¹ ni öge ni caange adïëri mare jï jiy moa näk poot kär nywølø, ni ge caana gïna tïïe kiree.