Dut Pwøc 21_1 - Wëël Jwøk

Duut Mo Pwøca Wuuö Jwøk Kiper Man Wø Tïïe Kiper Nyeya

¹ Wui Wuuö Jwøk, nyeya yie atïmö ni met ki køør teegï, ni yie mïnni ka køør mana kønyï eni.

² Gïna manynye døc ki cwïnye atïïyï jïre; gïna kwaae kärï mänö ki eni.

³ Ïïna ö baŋe ni tïïï ki gïï mo beyø jïre, ni kïthï wïïe ka aduda mo tïïc ka warkey.

⁴ Ïïna kwaae kiper nee bëëde ni kwøw, ni cïpï gø jïre, ni mooyï eni ki nïr kwøw mo puta bëëtö na bäre bäre.

⁵ Ajiem mare atïmö ni dwøŋ døc ki køør køny marï; ena mooyï ka ajiem ki wödö møn.

⁶ Ena tïïyï nee bëëde no ogwïëdhö na bäre bäre, ni døøyï yie mo met kiper man wø nudï buute.

⁷ Nyeya bëëdö ni ŋäätha Wuuö Jwøk; 'ba kiper mana ö Wuuö Jwøki, Jwøa Dwøŋ ni en Maal, ni mëëre ki nyeya ki mëër mo ba jøøl, eni na nyeya puta bëëtö kare ni teek.

⁸ Ï na nyeya, nyïïmännï bëët magï maaø; jø wø män ki ïïni magï maaø møn ki køør teek marï.

⁹ Kanyo nyoothï dëërï, geno raanynyï kaawat man wø ö maaci wø räänye; ge raany Wuuö Jwøki raanynyø ni thumge ki køør wëër mare ni wø liel kaamar maac.

¹⁰ Nyïïge oraanynyï bäät piny na bäre bäre; këël nyïïkwaacge thuwø wïthge odïïrï yïthakic jiy.

¹¹ Këël nyïïmän moï doo cädö ki gïï mo reyø kiperï, ni tutge ki luubö, luummeca ba thur kare jïge.

¹² Geno thööyï ka athëëre, ni døøge køørge.

¹³ Wui Wuuö Jwøk, bëëdï ni karï dwøŋ ki køør teegï. Waano wär ki dudi ni pwøcwa ïïni kiper teek marï.