Dut Pwøc 19_1 - Wëël Jwøk

Duut Mo Pwøca Jwøk Kiper Gïïa Tïïe Këël Gïïa Ceme

¹ Maal cara ajiem Jwøk, ni bëëdö ni nyøtha tïïe mo cere.

² Dïcäŋ man nø bëëdö ni køpa ajiem Jwøk jï dïcäŋ maya, ni wäär man nø bëëdö ni nyøtha tier ajiem manøgø jï wäär maya.

³ Geni, ge bäŋ dhøkge mo ge cäänö ki ge, ni bäŋ luup mo caange mo wïnyö;

⁴ 'ba döötge poot pïï dï piny bäre, ni ö luupge ni këët teegi mo piny bäre. Jwøk atïïö ki kar bëëtö maal kiper cäŋ,

⁵ ni tuul cäŋŋi wøk ki yie kaamar ŋat nywöm mo ö wøk ka yi øde, ni ö wøk ni caala ŋat ŋwïëy mo teek mo rïïŋi ni yie met.

⁶ Eni tuulö ki kare ni wø tuule ki yie, ni caath maal bäre këël kanyo pïïe kany wø päth yie, ni bäŋe gïn mo bøth ni ba lëënhnhi.

⁷ Ciik Wuuö Jwøk tiir, ni jwïëc dhaanhø wø døøye mo nyään. Luum Wuuö Jwøk di ŋäädhö, ni ŋat wø poot bäŋ gïn mo ŋääe wø di mooø ki leec wïc.

⁸ Ciik Wuuö Jwøk beege karge, ni cwïny dhaanhø wø døøcge mo met. Gïïa cem Wuuö Jwøki bäŋ gïn mo raac rege, ni nyeŋ dhaanhø di jabø ni døøcge ge mo tøŋ.

⁹ Ki man lwäär Wuuö Jwøk beeye gïn mo beer, ni beeye gïn mo bëëdö na bäre bäre. Luup ŋøl mo Wuuö Jwøk beege adïëri, ni ge bëëdö ni beyø karge bëët.

¹⁰ 'Ba gïïögø bëët di manynyø døc ni kaala man wø many warkey; di manynyø møn ni kaala warkey mana tøŋ døc. Gïïögø bëët met døc ni kaala maar kïc, ni met marge kaala ŋweeth maar kïc ma tëëma.

¹¹ Wui Wuuö Jwøk, ciik moï beege ni wø kööm aani, a na laŋŋï; ni näk mo geno gwøø, da gïn mo dwøŋ mo duuge duuö.

¹² ?'Ba aŋa ni maar bääyö mare caar e keere? Wui Wuuö Jwøk, wec gïïa baaa ni kuua, ni wëënnï aani.

¹³ Män aani thuwø ki gïïa reyø nee ba kama ki teek wïc mara; kära tïmö ni aana laŋŋø mar gïïa reyø. Køøre nø, a bëëdö ni bäŋ ajäla bääta, ni dööŋa wøk ki bëët adhala kare bäre.

¹⁴ Wui Wuuö Jwøk, ï ni wø kana raa buutï, ni bee ï ni wø piem aani, beerra man ö luupa ka acaare 'moa ni tïmge ni mïërö nyïmï.