Dut Pwøc 18_1 - Wëël Jwøk

Duut Mo Pwøca Wuuö Jwøk Kiper Køny Mare

¹ Wui Wuuö Jwøk, ï na teek mara, a mëër ki ïïni.

² Wui Wuuö Jwøk, ïïna teek mara, ni ïïna kar gwøk røk kipera, ni beeye ïïni wø piem aani. Ïïna Jwøk mara møn, ni teek mara wø jooda baŋï, ni beeye ï wø kana raa buute. Ï caala kwöt leny naa gëëŋŋï gëëŋŋö ki gïï mo leth, ni beeye ï na pïëmi mara, niï caala kiir kipera mo ogeerø ni teek.

³ Wui Wuuö Jwøk, ï na näk orømø ki pwøc, kany wø kwaa ïïni, a wø putï ka køny ceŋ nyïïmänna.

⁴ Aana bëëdö ni aano ciel thøø dïër kaamar dhaanhø mo omeenø ki thøøl, ni ö ränynyö mo päl ni pïïe bääta kaamar naam mo pänhnhö.

⁵ Kar thøø atïmö ni cään ki aani, naa ee meenø kaamar thøøl møn, ni thøø bëëdö naa ee ciiø kaamar abïëp.

⁶ Wui Wuuö Jwøk, kanya ena yïth gïï mo leth, aana jwöŋö dëërï; aana jwöŋö dëërï møn kiper køny, ï na Jwøk mara, ni ö dwøra ni wïnynyï gø niï ena kar bëëtö marï. Aana jwöŋö kiper køny, ni putï gø wïnynyö møn.

⁷ 'Ba ki køør teegï, piny aput tïmö ni kwanynyi ni jäŋŋi, ni ö tiet kïte ni putge rege tuk, ni putge tïmö ni jäŋŋi ki køør wëër marï.

⁸ 'Ba kanya jwïëyï ki jwïëy mo dwøŋ, jïrö mo päl aput nitul ki ummï, ni ö maaci ki cuk mo oäpö mo jiy di thöörö ni öge wøk ki dhiï.

⁹ Wui Wuuö Jwøk, maal ajapï ni ööï piny, ni kanya cäädhï, kuna näk da tietï piny da pöölö mo cøl døc.

¹⁰ 'Ba ïïna put mäännö niï ena bäät nyïïatwiel maal mana cwøl ni kirubël; niï määnni ka yi jamø.

¹¹ 'Ba deŋŋï bäre atïïyï na muudhö, ni tïme na gïn gëëŋ ïïni, ni ö pøølli mo nëëni na køth ni put maal gääbö.

¹² Ni tar mo dwøŋ cäädhö nyïmï, ni ö peyi ka agaackøth mo malla yi pöölö mo odhïŋ ni putge pöödhö ki nyïmï.

¹³ Wui Wuuö Jwøk, dwørï awïnyö kaamar køth mo pöödö maal, ni caanï marï, ï na Jwøa Dwøŋ ni en Maal.

¹⁴ Ni tïïyï køth ni pöödö bäät nyïïmän, ni caala man wø thöödhö ka athëëre, ni ö nyïïmänni ni putge keethø, ni putï wïthge kier ka agaackøth mo mal døc.

¹⁵ Wui Wuuö Jwøk, kanya wëërï ki nyïïmännï niï jooga geni, kanya jwïëyï ki jwïëy mo dwøŋ, tiet ŋøøm aput nëënö, ni ö pï naama dwøŋ ni pääŋge rege këël mana nëën ŋøømmi.

¹⁶ Ï na Wuuö Jwøk, cerï arwääï niï ena maal, ni lwørï aani; ni kälï aani wøk ki yi bëëtö mo leth, ni caala man wø lääm dhaanhø wøk ki tiet pïï.

¹⁷ Aana piemï ceŋ nyïïmänna moa bëëdö ni teeka ge bääta, ni beege nyïïmänna moa teek døc ni kaala aani, ni beege jøøa bëëdö ni män ki aani.

¹⁸ Kanya bëëda ni aano ränynyö, nyïïmänna aö maal bääta, 'ba ï na Wuuö Jwøk, ïïna bëëdö niï køønynya aani;

¹⁹ ni kälï aani wøk ki kany mo diiny mo jwïëya omiiø yie; ni japï jöö jïra ni dunynya wøk ki yïth gïï mo leth, ni kønyï aani kiper mana bëëdï niï mëër ki aani.

²⁰ Ï na Wuuö Jwøk, aana cunnï ki køør bëëtö mara na beer; ni ŋatï aani ki køør mana waany dëëra ni bäŋ raay.

²¹ Kiper aana bëëdö ni luupï yaa gwøø, ï na Wuuö Jwøk; ni bäŋ gïn mo raac mo yaa tïïö mo pää aani ki ïïni, ï na Jwøa;

²² kiper aani luup ŋøl moï bëët ena nyïma, ni kära gaa wøk ki ciik moï.

²³ Aana bëëdö ni bäŋ gïn jøøŋŋi ri bëëtö mara nyïmï, ni bëëda ni raa yaa gwøø ki raay.

²⁴ Kiper manøgønø, ï na Wuuö Jwøk, aana cunnï ki køør bëëtö mara na beer, ki køør bëëtö mara na bëëda ni dëëra waany nyïmï, ni bääta bäŋ raay.

²⁵ Wui Wuuö Jwøk, mëër marï ni wø ba jøøl wø nyoothï nyoodhø jï jø wø bëëdö ki bëët-mëër, ni nyoothï bëëtö marï na näk kare jï jø wø bëëdö ki bëëtö ma kare.

²⁶ Tac cwïny marï wø nyoothï nyoodhø jï jø wø bëëdö ni cwïnyge tar; 'ba ï wø bëëdö ni waŋï riek bäät jø wø bëëtö marge ba tiir.

²⁷ Jøøa no ocaarø wø kønyï kønyø; 'ba jø wø töödö, wïthge wø dwøgï piny.

²⁸ Wui Wuuö Jwøk, beeye ï ni wø cïpi ki tar jïra; ni beeye ï na Jwøa ni wø wiil muudhö mara na tar.

²⁹ Ki køør teek marï, a wø reŋŋa baŋ jø wø ö baŋ twëër; ni beeye ï na Jwøa ni wø mooc aani ki teek mo päära yi kiir mar nyïïmän ki gø.

³⁰ 'Ba ï na Jwøk, bäŋ gïn jøøŋŋi ri bëëtö marï, ni luubö marï adïëri; niï bëëdö niï caala kwöt leny jï jiy bëët mo wø kan rege buutï.

³¹ ?Aŋø, da jwøk mør këët mo caala ïïni, ï na Wuuö Jwøk? ?A da ŋat mo teek mo caala ïïni, ï na Jwøwa?

³² Beeye ï Jwøk ni wø tïïc aani ni teek; ni beeye ï wø tïïc bëëtö mara ni bäŋ gïn jøøŋŋi ree.

³³ Tieta akwathï ni tïmge ni jööt ni caala tiet aŋer, ni tïïyï aani naa cuŋŋa naa teek kwöra perge leth na en bäät thuuri.

³⁴ Aana pwönynyï ki uutjïëth leny, ni tïme ni løny jïra ki man thöödha ka atheerø ma atum mare tïïc ka nywïënyö ma jwïël.

³⁵ 'Ba ï caala kwöt leny jïra ni wø piem aani, ni beeye ï wø jøl aani ki cer cwïïï, ni ö kønynyi marï ni put kara tïïc ni dwøŋ.

³⁶ Waŋjöö ajapï ni dwøŋ nyïma, ni kära tiera cwaanyø.

³⁷ Aani, køør nyïïmän 'moa aŋwiea ni puta ge mak, ni kära duu ŋääa këël mana ö nyïïmänna na thumge.

³⁸ Nyïïmän 'moa wïthge adïïra møn, ni puta ge nyath na bäre, ni tïme ni ba løny jïge ki man öge maal këët; ni putge bëëtö ni geno pädhö tieta.

³⁹ Ï na Wuuö Jwøk, aana mooyï ki teek mo këëda ki gø ri leny, ni ö jøøa ö maal bääta ni putï wïthge dwøk piny jïra.

⁴⁰ Ïïni, nyïïmänna atïïyï nee ŋäthge luuge baŋa ni reŋge, ni ö jøøa bëëdö ni män ki aani, ni puta ge thöör.

⁴¹ 'Ba kanya jwöŋge nee ge køny, bäŋ ŋat mo okøny geni; këël mana kwacge ïïni, ï na Wuuö Jwøk, bäŋ gïn mo iï løø jïge.

⁴² Køøre nø, gena puta nyath këël mana tïmge ni caala tør mo okwør jamø, ni nyøra geni kaamar odhöönh mo ena dï jöö.

⁴³ Aana kønyï ceŋ jø powa moa bëëdö ni gëëmö ki aani; ni tïïyï aani nee wïth juurre tïmge ni ena tiera; këël wïth juurre mo kuua, ge puta bëëtö ni ge bëënna aani.

⁴⁴ Juurre mo path, a wø wøørge wøørø ni dëëtge rïïŋö ki lwär, ni kany wø cäänna geni, dwøra wø wïnyge wïnynyö.

⁴⁵ 'Ba geni, bäätge opädhö, ni öge wøk yïth kiiri moge moa no ogeerø ni teek ni dëëtge kwanynyi.

⁴⁶ Wui Wuuö Jwøk, ï nut niï kwøw møn. Pwøc en jïrï, ï na teek mara; beerra man ö nyeŋŋï ni wïnye, ï na Jwøk ni wø piem aani.

⁴⁷ Beeye ï na Jwø wø cool kwöra dëët nyïïmänna, ni wø tïïc wïth juurre nee bëëtge ni ena tiera.

⁴⁸ Beeye ï thuwø ni wø køny aani ceŋ nyïïmänna; ni tïïyï jøøa ö maal bääta nee bëëtge ni ena tiera; ni kälï aani wøk ceŋ jø kwöri.

⁴⁹ Wui Wuuö Jwøk, ï pwøa pwøø dï wïth juurre, ni wära ki duut naa pwøya nyeŋŋï.

⁵⁰ Beeye ï wø køny aani, a na tïïyï na nyeya; ni ö mëërri marï na näk ba jøøl ni putï gø nyooth jïra, a na tïïyï nee wïïa thïïmmi ki maaw niï røønya aani; ni ö mëërri manøgø ni put bëëtö ni nut kipera, a na Deebit en, ni pïïe baŋ nyïïkwaaya ni ba cuŋ.