Dut Pwøc 17_1 - Wëël Jwøk

Duut Mo Kwaca Jwøk Kiper Ŋøl Mare Na Näk Adïëri

¹ Wui Wuuö Jwøk, wïny luumma ni beer, ni cegï ïthï ko oduuya, wïny lam mara man lama ni bäŋ cwøk yie en.

² Beerra man ŋølï mara na kare, ni raŋï gïna na adïëri.

³ Ni näk miï lïïmmö baŋa ki wäär, ni neenï cwïnya, ni raŋŋï aani døc, bäŋ gïn mo raac mo jootï ri bëëtö mara. A bëëdö ni dhaa yaa gwøø kiper naa ba bääya kany wø cääna.

⁴ Ki køør luummï, dëëra yaa gwøø ki tïïe mo wø tïïc jiyi; ni dëëra yaa mänö ki uutjïëth dïwït.

⁵ A wø caatha jöörï cooth, ni bäŋ gïn mo cwanynya tieta.

⁶ Wui Jwøk, a kwaya ïïni, kiper ŋääa ni gïno kwaa tïïyï tïïö jïra; cek ïthï ni wïnynyï luumma.

⁷ Ï na dïkunyi mar jø wø kan rege buutï kiper nyïïmän moge; nyooth mëër marï ni wø ba jøøl ki jöö mo rëëma ec.

⁸ Gwøk aani kaamar guu waŋ, ni kanï aani tiet bwöpï,

⁹ kiper jø raay ni wø many man raanyge aani, ni beege nyïïmänna moa näk a ege tii dïër wø many aani naa 'näkge.

¹⁰ Wïthge ege cïëgö ki gïï wø jwør jø møøki, ni ge cäänö ni ge töödö.

¹¹ Gena nø lään bääta, ni ennø, a ege tii dïër; ni ge manynya jöö man raanyge aani ki gø.

¹² Ge caala ŋuu mo manynya gïn jaae nee came, ni caalge nyi ŋuu mo omøør piny.

¹³ Wui Wuuö Jwøk, ö maal, ni päärï yïthakicwa ni böötï geni. Køny aani ceŋ jøøa reyø ki køør mano tïïyï ko opëëllö marï.

¹⁴ Wui Wuuö Jwøk, ki køør teegï, køny aani ceŋ jiy, ni beege jøøa näk ojäŋ ki jap bäät piny. Yïthge opääŋï ki gïïa näk iï kanø kiperge, ni jïtge ko obwöre mo thööth ki køør mana manyge, ni wecge japge jï obwöre moge.

¹⁵ 'Ba aani ki dëëra, täärnyïmï oneena ni bäŋ ajäla bääta këët. Kanyo pääa, a puta bëëtö ni yia met ki køør mano bëëda buutï.