Dut Pwøc 143_1 - Wëël Jwøk

Duut Mo Kwaca Wuuö Jwøk Nee Dhaanhnhe Kønye Nee Bwødhe Ki Jööre

¹ Wui Wuuö Jwøk, wïny lam mara, ni cegï ïthï ki kwac mara, ni løgï mara ki køør beenynyï ka adïëri marï.

² Kärï kän bääta ka ajäla, a na dhaanhnhï, kiper bäŋ dhaanhø mo mare beer nyïmï.

³ Kiper nyïïmänna aana caange, ni raanyge aani, ni wëëkge aani bëëtö yi muudhö kaamar jiy moa thøw cøøn.

⁴ Kiper manøgønø, bääta apädhö, ni ö yia ni neethay.

⁵ 'Ba ennø, a caara gïr nïne moa cääŋŋe, naa cädö bäät tïïe moï bëët, naa caara gïïa tïïyï bëët ki cerï.

⁶ Ceŋŋa wø thaaŋa maal baŋï, ni bëëda naa lääŋŋa ïïni kaawat man wø ö ŋøømmi mo otal wø manyge pïï.

⁷ Wui Wuuö Jwøk, laar mara løk, kiper bääta opädhö. Kär täärnyïmï kanï ki aani, naa ba tïma kaamar jø wø koony yi bwörö.

⁸ Beerra man wëëgï aani wïny luum mëër marï ni wø ba jøøl kany wø pääa ka amöölla, kiper a bëëdö niï yaa gum cwïnya. Pwöny aani ki jöör bëëtö mana daa bëëdö ki gø, kiper acaara mara bäre ena baŋï.

⁹ Wui Wuuö Jwøk, käl aani wøk ceŋ nyïïmänna, kiper raa yaa kan buutï.

¹⁰ Pwöny aani naa bëëda naa tïïya mana manynyï, kiper beeye ïïni na Jwøk mara. Beerra man ö jwïëyï na beyø ni bwøthge aani ki jöö mo beer.

¹¹ Wui Wuuö Jwøk, cäŋ a mooyø ki kwøw ki køør nyeŋŋï, ni kälï aani wøk yïth gïïa leth ki køør beenynyï.

¹² Raany nyïïmänna ki køør mëër marï ni wø ba jøøl, ni dïïrï wïth jø wø caan aani, kiper aana dhaanhnhï.