Dut Pwøc 138_1 - Wëël Jwøk

Duut Mo Pwøca Wuuö Jwøk Kiper Gïïa Beyø Na Tïïe

¹ Wui Wuuö Jwøk, met ec duua duuö jïrï ki cwïnya bäre, ni wära ki dut pwøc jïrï nyïm juu mo juurre.

² Cøŋŋa këëlla piny ni nyïma yaa løø baŋ øtø marï na en kur keere, ni pwøa nyeŋŋï kiper mëër marï ni wø ba jøøl ka adïëri marï; kiper nyeŋŋï ki luummï atïŋï maal bäät jammi bëët.

³ Dïcäŋa kwaa ïïni, mara aløgï jïra, ni mooyï aani ki teek ni jït cwïnya ki cer.

⁴ Wui Wuuö Jwøk, nyeye mo bäät piny bëët met ec duuge duuö jïrï, ki køør mano wïnyge luummo caanï ki dhiï,

⁵ ni wärge ki dudi kiper gïïa tïïyï, ï na Wuuö Jwøk, kiper ajiem marï dwøŋ.

⁶ Këël na bëët Wuuö Jwøki ni kare dwøŋ, eni poot bëëdö ni raŋŋa jøøa kwörge bäŋgø; 'ba mar jø atöör ŋääe këël na bëëtge ni kwörge bäyö.

⁷ Këël a doo bëëdö naa ena yïth gïï mo leth, jwïëya poot gwøgï gwøø; cerï wø rwieyï rwieø ni joogï wëër mar nyïïmänna, ni piemï aani ki teek badï.

⁸ Wuuö Jwøk gïïo manynye kipera tïïe tïïö ni thurge karge. Wui Wuuö Jwøk, mëër marï ni wø ba jøøl bëëdö na bäre bäre; Wui Wuuö Jwøk, kär gïna tägï ki tïïc wiiï piny.