Dut Pwøc 135_1 - Wëël Jwøk

Duut Mo Pwøca Wuuö Jwøk Kiper Tïïe Moe Na Døøŋŋø

¹ Alëluya, pwøc en jï Wuuö Jwøk. Pwøyu nyeŋ Wuuö Jwøk; pwøyu eni, u na jic Wuuö Jwøk,

² uuni ni en Øt Wuuö Jwøk, ni en dï kal mare, eni na Jwøk marø.

³ Pwøyu Wuuö Jwøk, kiper Wuuö Jwøk beer, pwøyu nyeŋŋe ki dudi, kiper beeye gïn mo mïërö.

⁴ Kiper Wuuö Jwøk nyïïkwaac Jeekap ee jierø kiper dëëre, ni beege jø Icriel na näk thööge.

⁵ Aani ŋääa ni Wuuö Jwøk dwøŋ, ni eni na Jwøk marø kaala juu bëët.

⁶ Wuuö Jwøk gïn wø met yie ki gø di tïïö maalø ki piny, ki yïth näpa døøŋŋø ki yïth kudi bëët.

⁷ Maal wø mooe mooø ki pøøl bäät piny bäre; ni tïïc køth nee pädhe ni mal, ni wëëk jamø kwön wøk ki yi kany wø kan gø yi gø.

⁸ Eni kaai moa nywøl Ijep bëët anääe, ni beege jiy ki lääc paac bëët.

⁹ Ena tïïö ki nyuuthe ki gïï mo rëëma ec dï Ijep, ni tïïe bäät Peerø ki jiye bëët.

¹⁰ Eni tiet mïëri mo thööth araanynye, ni 'näk nyeye moa teek,

¹¹ ni beege Cëëwön nyeny jø Amör, ki Ög nyeny Baacan, ki nyeye mo mïëc Keenan bëët;

¹² ni cïp ŋøøm moge jï jiye ma jø Icriel nee tïmge na moge.

¹³ Wui Wuuö Jwøk, nyeŋŋï bëëdö na bäre bäre, ni bëëdï niï ŋäc ki yïth beenhnhe bëët, ï na Wuuö Jwøk.

¹⁴ Wuuö Jwøk jiye di ŋunnö, ni eni cwïnye wø pädhö ki gïrge.

¹⁵ Gïï wø lam wïth juurre wø tïïc ka warkey ki gwel-bïrö, ni beege gïï mo tïïya jiyi ki ceŋge.

¹⁶ Gïïögø jïge da dhøgi, 'ba ge ba luubö; ni jïge da nyeŋŋi, 'ba ge ba nëënö.

¹⁷ Jïge da ïdhi, 'ba ge ba wïnyö; ni ge ba jwïëy.

¹⁸ Jøøa tïïc geni otïmö ni bäŋ teek jïge ni caala geni, këël jøw bëët mo wø ŋääth geni.

¹⁹ Wui, u na jø Icriel, pwøyu Wuuö Jwøk. Wui, u na jø dhi øt Aran, pwøyu Wuuö Jwøk.

²⁰ Wui, u na jø dhi øt Libay, pwøyu Wuuö Jwøk. Uuni ni wø lwäär ki Wuuö Jwøk, pwøyu Wuuö Jwøk.

²¹ Pwøyu Wuuö Jwøk Dhayan, ni beeye Jerucalem na näk kar bëëtö mare. Alëluya, pwøc en jï Wuuö Jwøk.