Dut Pwøc 10_1 - Wëël Jwøk

Duut Mo Kwaca Wuuö Jwøk Nee Jø Raay Jääle

¹ ?Wui Wuuö Jwøk, aŋø ni bëëdï ni karï bäär en? ?Na aperŋø wø kanï dëërï kany wø näk ri gïï mo leth en?

² Jøøa reyø töödö ni caange jøøa can; beerra man ö luup moa tuutge ni døøge dëëtge.

³ Ŋat raay wø ŋwöö keere ki køør mana manynye ki cwïnye, ni ö ŋat mo cwïnye päl ni jany Wuuö Jwøk ni kwier gø.

⁴ Ŋat raay bëëdö ni töödö, ni eni ba many Jwøk; ki yïth acaare moe bëët, eni cädö ni bäŋ Jwøk.

⁵ Eni gïï wø manynye joode joodø cooth, 'ba eni ba cädö kiper ŋøl mar Jwøk. Eni bëëdö ni nyïïmän moe bëët ee taaø.

⁶ Eni wø cädö ki cwïnye ni kööe, ni «Bäŋ gïn mo pïï dëëra; a puta bëëtö ni bäŋ gïn mo raac mo tägi dëëra na bäre bäre.»

⁷ Eni bëëdö ni dhee bëënna acïëni ki cwøk ki ŋwöny jiy, eni wø laara cäänö ki gïï mo leth ki jap rääö.

⁸ Eni wø møøra piny töök paac, ni kan ree kiper nee jøøa beyø nääe, ni eni raŋŋa jøøa näk rege ba løny køny, ki man tïïc gïn mo raac dëëtge.

⁹ Eni dëëre wø di kanø kaamar ŋuu ni wø møør piny, ni eni kurö kiper ŋata no ocaannø nee maae. Ŋata no ocaannø wø di cøøgø ni mak gø kaawat man wø cek lääy ka abïëp.

¹⁰ Ŋat mo ree ba løny køny wø gøøe piny ni pädhe, ni eni pädhi ka køør teek mar ŋat raay.

¹¹ Ŋat raay cädö ki cwïnye ni kööe, ni «Jwøk bëëdö ni wïïe owïl, ni nyeŋŋe ee miiø. Eni gïï wø tïïa ba joode na bäre bäre.»

¹² Wui Wuuö Jwøk, ï na Jwøk, ö maal ni tïŋï cerï maal niï nyootha teegï; kär wïïï wïl ki jøøa no ocaannø.

¹³ ?Aŋø, ŋat raay kwier Jwøk aperŋø, ni cäde ki cwïnye en ni kööe, ni «Aani, a ba pëëny Jwøki.»?

¹⁴ 'Ba ï na Wuuö Jwøk, gïïögø bëët ŋäyï møn, kiper ïïni gïïa reyø ki caan jiy nëënö jïrï, ni løny jïrï ki man tïïyï mana manynyï. Ŋat mo ree ba løny køny, dëëre cïbe cïbö jïrï, ni beeye ï ni wø køny ŋat ma kïïc.

¹⁵ Raany teek mar ŋat raay ki ŋat wø tïïc gïï mo reyø; kwaan raay moe bëët bääte, ni bäŋe aciel mo dööŋ.

¹⁶ Wuuö Jwøk bëëdö na nyeya na bäre bäre, ni ö wïth juurre ni wø wøør juu møøk ni thumge bäät ŋøøpe.

¹⁷ Wui Wuuö Jwøk, lam mar jøøa can wïnynyï wïnynyö. Cwïnyge cømï cømø, ni cegï ïthï ki kwac marge,

¹⁸ nee gïn mo beer nee tïïyï kiper jøøa näk kïïe ki jøøa näk ocaannø, ni ö dhaanhø ni bëën thøø en ni ba døøc jiy mo lwäär këët.