Dut Pwøc 109_1 - Wëël Jwøk

Duut Mo Kwaca Jwøk Nee Kwör Coole Dëët Nyïïmän

¹ Wui Wuuö Jwøk, ï ni wø pwøa, kärï lïŋö,

² kiper jøøa reyø ki jø cwøk dhøkge ena raa, ni ge kïtha bääta ki luup tööt.

³ Aana cielge dïër ki luup män, ni bëëtge ni dhøkge ena dëëra ki luup mo bäŋ tietge.

⁴ Këël na bëëda naa mëër ki geni, gena duu raa ni kïthge bääta ki luup; 'ba aani, a bëëdö naa lämö.

⁵ Gena tïmö ni ge duua gïn mo raac baŋa na kar gïna beer, ni duuge män na kar mëër mana mëëra ki geni.

⁶ Wui Wuuö Jwøk, cuumï ki dïŋut luup mo raac bäät ŋata kïth bääta ki luup, ni ö nyimän mar ŋata kïth bääta ki luup ni kïth bäät gø ki luup kar løøk.

⁷ Kanyo ŋøl luumme, beerra man jääl eni, ni tïm lammi mare ni duua raay bääte.

⁸ Beerra man tïm nïr kwøwi moe ni nøk, ni ö kare ni lwøri ya ŋat mørri.

⁹ Beerra man tïm obwöre moe ni bäŋ wääge, ni tïm cïïe na cï thøø.

¹⁰ Beerra man thääy obwöre moe ni ge kwääö, ni bëëtge ni ge määnyö ni tïm karge ni bäär ki wï poge.

¹¹ Beerra man ö ŋat pïïdö ni käl japa en jï gø bëët, ni ö jøøa pathi ni twierge japa joode ki køør öölö mare.

¹² Beerra man ba jïte ki ŋat mo nyootha mëër jïre, ni bäŋe ŋat mo cwïnye pädhi kiper obwöre moe kanyo dööŋge ni bäŋ wääge.

¹³ Beerra man dït wïïe, ni put nyeŋŋe rwäänyö yi beenhnhø mano ööi.

¹⁴ Beerra man ö Wuuö Jwøki ni paac wïïe ki raay moa tïïc kwäye, ni ö bääyö mar menni ni ba wëënni.

¹⁵ Beerra man bëët Wuuö Jwøki ni raŋŋa raay mo gø cooth, ni rwääny nyeŋŋe bäät piny, ni bäŋe ŋat mo par wïïe ki eni.

¹⁶ Kiper eni wïïe käre caarø ki man nyooth mëër; 'ba ena tïmö ni caanna jøøa no ocaarø ki moa can, ki moa näk cwïnyge opädhö, këël mano thøwge.

¹⁷ Eni bëëdö ni yie met ki man cien dhaanhø, 'ba acïëni ööa bääte; ni eni bëëdö ni yie ba met ki man gwïëth dhaanhø, 'ba gwïëth otïmö ni kare bäär ki eni.

¹⁸ Eni acïëni ee røø dëëre kaamar abïï, ni ci dëëre kaamar pïï, ni twaa yi cöönne kaamar maaw.

¹⁹ Beerra man ö acïëni ni bëëde dëëre kaamar aleeŋŋa man wø kääre, ni tïme kaamar kaw man wø twöö piere cooth.

²⁰ Beerra man tïm gïïögø bëët na gïïo tïïc Wuuö Jwøki dëët jøøa kïth bääta ki luup, jøøa car gïï mo reyø dëëra.

²¹ 'Ba ï na Wuuö Jwøk, ïïni na kwäärö mara, beerra man tïïï ki gïn mo beer kipera nee nyeŋŋï pwøc; ni piemï aani ki køør mëër marï na beer ni wø ba jøøl.

²² Kiper aano caannø naa bëëdö naa can, naa bëëdö ni cwïnya opädhö na bäre bäre.

²³ Aani, a rwäänyö kaamar tïm abøøya, ni jar aani wøk kaamar twöŋö.

²⁴ Wïth cøŋŋa atïmö ni nhønhnhi ki køør mana kweera ki cam, ni dwada ni tïma ni aana cöö.

²⁵ Aana tïmö na gïr ajøøŋ jï nyïïmän 'moa, ni kany wø neenge aani, wïthge wø putge ka kiinynyø.

²⁶ Wui Wuuö Jwøk, ï na Jwøk mara, køny aani; piem aani ki køør mëër marï ni wø ba jøøl.

²⁷ Beerra man ö pïëmmi manøgø ni ŋäyi ya nyïïmänni 'moa ni käla baŋï, ni beeye ïïni ki dëërï, ï na Wuuö Jwøk, na tïïc gø.

²⁸ Geni, marge acïëni, 'ba ïïni, marï gwïëth; kanyo öge maal bääta, wïthge olääi, 'ba a na dhaanhnhï, aano bëëdö ni yia met.

²⁹ Beerra man räny nyeŋ jø wø kïth bääta ki luup, ni bëët lään wïci dëëtge kaamar abïï.

³⁰ Aani Wuuö Jwøk pwøa pwøø ki cwïnya bäre, ni pwøa eni dï acooŋ jøøa thööth.

³¹ Kiper eni cuŋŋa kur ŋata can, nee jwïëc gø pieme ceŋ jø wø ŋøl thøø bääte.