Dut Pwøc 104_1 - Wëël Jwøk

Duut Mo Pwøca Wuuö Jwøk Kiper Tïïe Moe Bëët

¹ Aani Wuuö Jwøk pwøa pwøø ki cwïnya bäre. Wui Wuuö Jwøk, ï na Jwøk mara, karï dwøŋ døc; wödö ka ajiem na en jïrï iï røø dëërï kaamar abïï.

² Tar iï rïëp dëërï kaamar aleeŋŋa, ni maal iï peerø kaamar oduŋkaara.

³ Wuuö Jwøk paare ee geer maal, ni tïïc pøøl na jääy mare, ni cäädhi ka bäät jamø.

⁴ eni jamø wø di jääŋŋö na nyïïatwiel mare, ni tïïc agaackøth na gïr tïïc mare.

⁵ Piny acwääe ni këël tiet gø piny ni teek, nee bëëde na bäre bäre ni ba nëëŋŋi.

⁶ Wui Wuuö Jwøk, naama dwøŋ apeedhï bäät piny kaamar abïï, ni ö pïïyi ni macge wïth kïte.

⁷ Kanya joogï geni, gena døøk, ni putge mølø kanya määr dwørï.

⁸ Wïth kïte anyänh maal, ni dööŋ agäm-kïte piny, ni dööŋ pïïyi kwöra näk iï jiiŋŋø kiperge.

⁹ Ïïna tïïö ki kee mo ba løny ki man kaali ya nämmi, nee piny ba cäŋge mayø këët.

¹⁰ Wuuö Jwøk pï jøøro wø wëëge kwödö ki yïth agäm-kïte, ni muulge ki yïthakic kïte.

¹¹ Ni ö lääyi bëët ni jïtge ki pïï mo maathge, ni jït ogwari ki pïï mo riemma riew marge.

¹² Wec maal wø bëëdö bäät pïïögø, ni bëëtge ni ge lweelli bäät jenni.

¹³ Wuuö Jwøk køth wø jääŋŋe jääŋŋö bäät kïte ni eni ena maalø, ni ö gïïa en bäät piny ni jäŋge ki cam ki køør man wø tïïe.

¹⁴ Wuuö Jwøk luum wø wëëge twöö kiper lääy, ni gïï wø duunni ki cam wø wëëge twöö jï dhaanhø, nee dhaanhø jïte ki cam ri gïï wø ciek yïth ŋøøm;

¹⁵ ni jïte ki køøŋø mo døøya yie mo met, ki maaw mo tïïya täärnyïme ni lem, ki cam ni wø cïpi ki teek dëël.

¹⁶ Jer lur Libaanø na piith Wuuö Jwøki wø di jwøø ki pïï na karge.

¹⁷ Weny wø gëëdö ki uudi bäätge, ni ö ajaae ni jïtge ki kwör bëëte bäät jera døøŋŋø.

¹⁸ Kïte moa bäyö bëëdö na kar bëëtö jï adëëlli, ni ö kwöra no okaaŋŋø røk kïte ni tïmge na kar kan røk jï athinaaki.

¹⁹ Wuuö Jwøk dwääy atïïe nee cwiir pääŋŋe, ni ö cäŋŋi ni ŋäc kany wø pädhe yie.

²⁰ Muudhö wø jääŋŋe jääŋŋö, ni tïm pinynyi na wäär, ni ö lääc paapi bëët ni täkge ki ööny wøk;

²¹ ni ö ŋuuwe ni märge ni ge manynya gïï camge, ni cam marge man wø cacge käla baŋ Jwøk.

²² 'Ba kany wø tuul cäŋŋi ge tägö ki døøn kwörge, ni butge piny kwör bëëte moge.

²³ Køøre dhaanhø wø aa baŋ tïïc mare, ni tïïc tïïe moe këël kanyo päth cäŋŋi.

²⁴ Wui Wuuö Jwøk, gïïa tïïyï thööth døc kiree. Gïïögø bëët tïïyï ka køør leec wïc marï, ni ö gïïa cwääyï bëët ni pääŋge piny bäre.

²⁵ Naama dwøŋ nut, ni bëëdö ni dwøŋ ni kany mo päl ee maaø, ni yie da gïï mo kwøw mo døøŋŋø ki mo therø mo kwäänge ba thum.

²⁶ Ni baabuure wø cäädha yie, ni Lëëwatan, lääna dwøŋ na cwääyï, nut yi naam kaace ni tuuk yie.

²⁷ Gïïögø bëët raŋŋa jïrï, kiper nee caapge cïpï jïge ki yïth kwöra näk karge.

²⁸ Kany wø cïpï cam jïge, lwørge lwørø, ni jäŋge ki caammi mo met kany wø japï cerï jïge.

²⁹ Kany wø paanyï täärnyïmï, dëëtge wø puta tïmö ni kwanynyi; ni kany wø lwørï jwïëcge, ge thøw, ni putge døø yi ŋöömö.

³⁰ Møøk wø cäŋ ka cwääyö kany wø jääŋŋï jwïëyï bäätge, ni cäŋï bäät piny tïïyö ni nyään.

³¹ Beerra man ö ajiem mar Wuuö Jwøk ni bëëde na bäre bäre. Beerra man ö Wuuö Jwøki ni mïn yie ki tïïe moe.

³² Wuuö Jwøk bäät piny di raŋø, ni tïm pinynyi ni jäŋŋi, ni gut kïte, ni putge duuŋ ki jïrö.

³³ Aani, a wär ki duut jï Wuuö Jwøk kany pooda naa poot kwøw en, ni wära thuwø ki dut pwøc jï Jwøa kany pooda naa nut bäät piny.

³⁴ Beerra man tïm acaare 'moa ni kännö ki met ec jï Wuuö Jwøk; aani thuwø a bëëdö ni yia met ki eni.

³⁵ Beerra man thum jø raayi bäät piny, ni bäŋe jø wø tem gïï mo reyø mo joot këët. Aani Wuuö Jwøk pwøa pwøø ki cwïnya bäre. Alëluya, pwøc en jï Wuuö Jwøk.