Dut Pwøc 103_1 - Wëël Jwøk

Duut Mo Pwøca Jwøk Kiper Mëër Mare

¹ Aani Wuuö Jwøk pwøa pwøø ki cwïnya bäre, ni pwøa eni na en kur keere ni dëëra yaa cïbö jïre bäre.

² Wuuö Jwøk pwøa pwøø ki cwïnya bäre, ni ba wïl wïïa ki tïïe moe bëët na beyø.

³ Beeye Wuuö Jwøk ni wø wec gïïa baaa bëët, ni wø køny täwe moa en dëëra bëët.

⁴ Bee eni ni wø käl aani wøk cer thøø, ni wø nyooth bäth ec ki mëër mo ba jøøl jïra.

⁵ Bee eni ni wø tïïc aani nee gïï mo beyø tïmge ni dagø jïra ki yïth nïr kwøw 'moa bëët, ni tïïc teek mara ni nyään ni tïma naa teek kaamar odhuuth.

⁶ Wuuö Jwøk wø tïïya tïïc ma adïëri, ni ŋun jøøa näk othiel piny bëët.

⁷ Acaare moe anyoodhe jï Modhe, ni nyooth tïïe moe jï jø Icriel.

⁸ Wuuö Jwøk yie bäth ni mëër ki jiy; eni ba laar wëër, ni mëër mare päl ni ba jøøl.

⁹ Eni ba bëëdö ni jääla øøni cooth, ni wëër mare thuwø ba bëëdö na bäre bäre.

¹⁰ Eni kär kännö bäätø ka ajäla mo orømø ki raay moø, ni käre øøni cunnö ki gïn mo orømø kiper moa baaø.

¹¹ Kaawat man bëët maalli ki piny ni dwøŋ en, Wuuö Jwøk mëër mare ni wø ba jøøl dwøŋ døc bäät jø wø lwäär ki eni.

¹² Ka teeŋ man bëëde en ni yïthakic kur tuul-cäŋ ki kur pänh-cäŋ bäär, Wuuö Jwøk gïïa baaø akäl wøk ni tïïc karge ni bäyö ki øøni.

¹³ Ka teeŋ man wø bëët wää obwöre ni yie ee bäädhö ko obwöre moe, Wuuö Jwøk bëëdö ni yie ee bäädhö ki jø wø lwäär ki eni.

¹⁴ Kiper eni cwääc marø ŋääe, ni wïïe wø di caarø ki man näk mo øøna tør jaak.

¹⁵ Nïr kwøw mo dhaanhø caala nïr luum; dëër dhaanhø wø døøŋŋø ni mïërö kaamar luum mo oløth yi pwöla.

¹⁶ 'Ba luum, kany wø kwön jame bääte, puta ränynyö, ni put kare rwäänyö na bäre bäre.

¹⁷ 'Ba Wuuö Jwøk mëër mare ni wø ba jøøl bëëdö na bäre bäre bäät jø wø lwäär ki eni, ni ö adïëri mare ni bëëde ni nut bäät nyïïkwaacge,

¹⁸ ni beege jø wø gwøk gïna tuude ki geni, ni wïthge ba wïl ki man kïthge gïïa ceme bäät tïïc.

¹⁹ Wuuö Jwøk tier wäl nyec mare ee nø këël piny maalø, ni eni bëëdö na wïth jammi bëët.

²⁰ Pwøyu Wuuö Jwøk, u na nyïïatwiet maal moe, uuni na teek ni wø kïth luumme bäät tïïc, ni wø wïny dwøre man wø caane.

²¹ Pwøyu Wuuö Jwøk, u na lwaae moe bëët ni en maal, uuni ni wø tïny eni nou tïïya mo wø manynye.

²² Beerra man ö gïïa cwääc Wuuö Jwøki bëët ni pwøcge eni kwöra enge yïthge bëët, ni beeye bäät piny bäre na en cere. 'Ba aani, Wuuö Jwøk pwøa pwøø ki cwïnya bäre.