Dut Pwøc 1 - Wëël Jwøk

Wëëlö 1 Dudi 1—41 Duut Mo Nyootha Luum Bëëtö Mar Jøøa Beyø Ki Bëëtö Mar Jøøa Reyø

¹ Gwïëth en jï ŋat wø ba cäädhi køør pwöc jøøa reyø, ni wø ba cäädhi jöör jø adhala, ni wø ba bëëdö buut jø abuua.

² 'Ba met ec mare wø joode ka ri luup moa no ogöörö yi wëël Jwøk, ni eni cädö ki waŋcäŋ ki wäär cooth kiper luup moøgø.

³ Eni caala jaath mo opiith deŋ naam, ni wø nyïïe ciek kany wø näk ma kare, ni bøøge moe ba när. Teeŋ ŋatøgø, gïï wø tïïe bëët thura karge.

⁴ 'Ba bëëtö mar jøøa reyø patha enøgønø; ge caala lethø ni wø køøl jame.

⁵ Kiper manøgønø, jøøa reyø ba cuŋŋi kar løøk mar Jwøk ni nyeŋge teek, ni ge na jø adhala, ge ba cuŋŋi ya acooŋ jøøa beyø,

⁶ kiper Wuuö Jwøk bëët jøøa beyø ŋääe, 'ba bëët jøøa reyø cäätha baŋ ränynyö.