Dhekaraya 9 - Wëël Jwøk

Luum Ajäla Mano Jääl Nyïïmän Jø Icriel Ki Gø

¹ Luum Wuuö Jwøk na caal tëër ena bäät ŋööm Adrak ni jääla gø, këël mano këët Damacka; kiper jiy ki wïth tuŋi bëët mo Icriel, nyeŋge atïmö ni ena dëër Wuuö Jwøk.

² 'Ba ŋööm Amath na kïïö ki mïëyögø di jäälö thuwø, këël mano këët Tayar ki Caydan, këël na bëët mïëri moøgø na mïëri mo wïth jiy moge leer døc.

³ Tayar dëëre ee gëënnö ki kwör gwøk røk mo teek, ni gwet-bïrö ee löör piny kaamar ŋøøm, ni löör warkey piny ni päl jaak kaamar odhöönh man wø en nyeŋ jïëthe.

⁴ 'Ba kwär mare oraany Kwäärö Wuuö Jwøki, ni leeŋ jap kwär moe yi naama dwøŋ; ni put eni waaŋ ki maac, ni puti ya maaci thöör.

⁵ 'Ba eno joot pääny Ackelön, ni put pääny Ackëlön lwäyö; ni jooti ya pääny Geedha, ni ö pääny Geedha ni put dëëre nikem. 'Ba eno joot pääny Akarön thuwø, ni put ŋäädhe mar pääny Akarön ränynyö. Geedha nyeya mare otïmö ni bäŋgø, ni ö pääny Ackëlön ni tïme ni bäŋ jiy yie.

⁶ Wuuö Jwøk aköö, ni «Wëëlle ŋööm Acdöt omacge, ni ööa ni raanynya atöör mar jø Pilitin.

⁷ Aani rïŋ moge mo wø camge ni rege jääbö ki rem käla wøk dhøkge; ni ö caammi moge mo wø camge na näk ba waany ni gwëëna ge wøk tiet lak moge. 'Ba jiy moo dööŋ ni kwøw rege, otïmö na jiy 'moa, a na Wuuö Jwøk, ni putge tïmö na bwöthe yi Juuda; ni ö jø Akarön ni tïmge kaamar jø Jeebuc.

⁸ 'Ba aani ŋöömö mara ogwøa, nee bäŋe jø leny mo ŋutö ki yie wala mo duuö ki yie. Bäŋ jø dïïm mo ö kuna caarge jiya këët, kiper ennø a nut naa kurö.

Luum Nyeny Jø Icriel Mano Ööi

⁹ «Wui, Dhayan, iï mïnne døc! Ni kwöŋŋï ki met ec, ni bee ï na Jerucalem! Raŋï, nyeya marï ööa baŋï, ŋat mo mare beeye adïëri, mo käära pïëm man piem jiy ki gø; eni mwöl, ni ena bäät arëën, ni beeye bäät nya arëën mana thiinh.

¹⁰ Jïëth leny mo wø tut okwëënyi mo Ipariem, ko okwëënyi mo leny mo wø en Jerucalem, otïïa ni bäŋ tïïc ceŋge, ni tøya tøøk leny bëët. Nyeya manøgø öö kuna køp mëër jï jiy bëët, ni käär piny ni tägi ka jï løø kur tuul-cäŋ, këël mano këët jï løø kur pänh-cäŋ, ni cäŋ tägö ki Naam Upareeti këël cuŋ piny.

¹¹ 'Ba kiperu thuwø, ki køør rem luumma tuuda ki uuni, u käla wøk yi buura bäär na näk otal na twöö uuni yie.

¹² Wui, u na jø twöc mo cwïnyge da ŋäädhe en, døøu kar gwøk røk mana teek; kiper a caana gø jïïu dïcäŋi ni jammi moa jwørru coola coolø jïïu ki gwïëth mo opöödhö.

¹³ Aani jø Juuda ge tïïa tïïö kaamar atummi, ni ö jø Ipariem ni tïmge na athëëre moge. Wui, ï na Dhayan, jiy moï tïïa tïïö kaamar opëël leny, ni öge maal ki leny bäät jø Gïrïïk.»

¹⁴ Kar kaace Wuuö Jwøk ree onyoodhe bäät jiye ki man køny geni, na atheerø mare nadaaŋ kaamar agaackøth. Kwäärö Wuuö Jwøk tuuŋ okoodhe, ni wëëk atuunna kwönnö ni teek ki jï løø tier-piny.

¹⁵ Wuuö Jwøk, eni na wïth jammi bëët, jiye ocwaae, ni ö jiye ni dïïrge wïth nyïïmän moge, ni put tïmö ni ge nyøra kïte moa thööc geni ki ge ri leny. Geno twäädö bäät nyïïmän moge kede geno meer ki køøŋø. Dëëtge opäŋ ki rem jiy moa 'näkge, ni tïmge kaamar athaanh olämme mo päŋ ki remø man wø ker teegi mo gïn wø cïp olämme bääte.

¹⁶ Wuuö Jwøk, Jwøk marge, geno pieme dïcäŋöca kaa man wø ö dïkwääyi wø piem dïëk moe cer gïn mo raac; kiper geno tïmö ni ge mïërö yi ŋöömö mar Wuuö Jwøk kaamar nyeŋ kïte moa perge leth ni wø en dëër aduda.

¹⁷ A teeŋ kïdö mo nyïëdi ki mïërö mano tägi dëëtge! Beel mo ŋöömmögø obwöc cwøw owëëk piith ni dëëtge teek, ni ö kwøk nyïïomøki moe moa nyärö ni wëëk obwöc mään piith ni dëëtge teek.