Dhekaraya 8 - Wëël Jwøk

Luum Gwïëth Mana Caan Wuuö Jwøki Kiper Jø Icriel

¹ 'Ba dwør Wuuö Jwøk, eni na wïth jammi bëët, acäŋ ö bääta na ennønø:

² ni «A na Wuuö Jwøk na en wïth jammi bëët, dwøra mana caana bee en: ‹Aani, aana këëyö døc kiper Dhayan; cwïnya awaaŋ ki këëny mana këëya kipere.› »

³ Wuuö Jwøk aköö, ni «Aani, a duua yi Dhayan ni beeye Jerucalem, naa bëëda yie. Kanyøgønø Jerucalem ocwøl ni Pääny Mar Adïëri, ni cwøl kïdi mar Wuuö Jwøk, eni na wïth jammi bëët, ni Kïnna En Kur Keere.»

⁴ Wuuö Jwøk, eni na wïth jammi bëët, aköö, no «Ocäŋ tïmö ni da cwøw mo ojal ki mään mo ojal mo opï piny nyeŋ jïëthe mo Jerucalem, ni ŋati man nø cere da athøra mo kwömö ki gø kiper jalø mare.

⁵ Ni ö nyeŋ jïëthe mo pääny ni cäŋge päŋŋö ko obwöc cwøw ko obwöc mään mo kwääk yïthge.»

⁶ Wuuö Jwøk, eni na wïth jammi bëët, aköö, na «?Aŋø, këël na bëëde ni luummögø nëëni keda gïn mo ba tägi ki jï thäk jøøi moo bøth ni kwøw kar kaace, dhäthö jïra thuwø ki man täge?» Luummögø caana Wuuö Jwøki, eni na wïth jammi bëët.

⁷ Wuuö Jwøk, eni na wïth jammi bëët, aköö, ni «Ka adïëri møn, aani jiya moa en jï løø kur tuul-cäŋ ki moa en jï løø kur pänh-cäŋ piema piemø,

⁸ ni duua geni nee bëëtge yi Jerucalem, ni tïmge na jiya ni tïma ni aana Jwøk marge ki ra adïëri ki bëëtö mo thïïŋ.»

⁹ Wuuö Jwøk, eni na wïth jammi bëët, aköö, ni «U ni wø wïny luup moi ennø dhøk nyïïkuk 'moa ki mana täge ki kanya cak tier Øt Jwøk ki geer, ni beeye øtø mara, a na Wuuö Jwøk na en wïth jammi bëët, magu dëëtu ki tïïc nee Øt Jwøk geer.

¹⁰ Kiper kanya poot nïrögø, bäŋ tïïc mo di cunnö ki gwel kiper dhaanhø wala lääy; ni bäŋ dhaanhø mo duny yi paac wala mo dønynya wøk ki yi paac, kiper mana tïme ni bäŋ bëët-mëër kiper nyïïmän. Aani jiy bëët atïïa nee ŋati man nø døø ri nyawatge ki tïï gïn mo raac.

¹¹ 'Ba aani, a na Wuuö Jwøk na en wïth jammi bëët, a caana gø jïïu ni teeŋ gïna tïïa røk nïne moa pöödhö, ba tïïa këët dëët thäk jiy moi no odööŋ ni kwøw en.

¹² Kiper maalø køth ojääŋŋe piny, ni ö köödhi ni tucge, ni ö omøki ni nywølge ki nyïëdi, ni ö jap pinynyi ni ciekge. Japøgø bëët wëëga tägö kiper thäk jøøi moa dööŋ ni kwøw.

¹³ Wui, u na jø Juuda ki jø Icriel, kaa mana bëëdu ni uuno cienø dï wïth juurre, u piema piemø ni tïmu ni uuna jiy mo ogwïëdhö. Käru lwäyö; beerra man magu dëëtu ki tïïc.»

¹⁴ Kiper Wuuö Jwøk, eni na wïth jammi bëët, aköö, ni «Aana bëëdö ki kwäyu ni ge temma temmø ki gïï mo leth kanya bëëtge ni ge raanynya cwïnya naa goota, ni bëëda ni bäth ec mara kära nyoodhø jïge;

¹⁵ 'ba ennø, yïth nïne moi aana cäŋ cädö ki man tïïa ki gïn mo beer kiper jø Jerucalem ki dhi øt Juuda. Käru lwäyö këët nø!

¹⁶ 'Ba jammi moi tïme ni beege moo tïïyu: ŋati man nø dëëtu wär tïme ni cäänö ka adïëri jï watge maya; ni ŋøøllu luup na adïëri, nee paac maru jïte ki bëët-mëër.

¹⁷ Kär dee ŋat mo tudö ki luubö mo raac kiper wati, ni ba mëërru ki man kööŋŋu ki luup tööt. Kiper aani, japøge bëët beege jap wø mäna ki ge.» Luummögø caana Wuuö Jwøki.

¹⁸ Køøre dwør Wuuö Jwøk, eni na wïth jammi bëët, acäŋ ö bääta ni kööe,

¹⁹ ni «A na Wuuö Jwøk na en wïth jammi bëët, dwøra mana caana bee en: ‹Wödö mar kwier cam man wø tïïyu ki dwää aŋween, ki dwää abïïc, ki dwää abïriiø, ki man wø tïïyu ki dwää apaar, tïmö na mar met ec ki kanynyø, na kany wøør ajwöm-cam yie kiper dhi øt Juuda. Kiper manøgønø, mëërru ka adïëri ni mëërru ki bëët-mëër.› »

²⁰ Wuuö Jwøk, eni na wïth jammi bëët, aköö, ni «Wïth juurre mo thööth ki jø päänye mo thööth poot dagø mo öö,

²¹ ni ö jø päänynyi man nø ni köge jï jø pääny møga, ni ‹Beerra man cøø ennø kuna wøørø Wuuö Jwøk ni manynyø Wuuö Jwøk, eni na wïth jammi bëët. Waani, wa cøø!›

²² Kanyøgø jiy mo thööth ki wïth juurre mo teek geno put ö Jerucalem kuna manyge Wuuö Jwøk, eni na wïth jammi bëët, nee wøørge.»

²³ Wuuö Jwøk, eni na wïth jammi bëët, aköö, ni «Yïth nïne moøgø, jiy apaar ki røk wïth juurre ki dhøgi bëët abïïn ŋat Juuth man nø omakge ni köge, ni ‹Beerra man aa ki uuni na aciel, kiper awïnywa ni Jwøk ena buutu.› »